OMWATSI W’OKWA KIDIPA | ERISABA NINA LY’OMUGHASO?
Erisaba —Ngoku Lyanga Kuwathikya
Mughulhu mungyi wukabya wukanza erikolha ekindu kyosi-kyosi, wukayibulhaya, ‘Kikendi nyighasira kithi?’ Nina kibi eriyibulya wuthya okwa mwatsi w’erisaba? Eyihi. Thukabya ithwanzire eriminya nga lyanganathughasira.
Omwa myatsi eyihwere, muthukaminya ngoku erisaba si murwa buyira ow’edini kutse erithanza eriyihumulikania omwa malengekania. Aliwe omwa kwenene, Nyamuhanga ow’okwenene akahulikirira emisabe ey’abakamusaba. Thwamasaba omwa nzira eyitholere, n’erimusaba ebitholere, iniakendi thuhulikirira. Kundi nibya akabugha athi thuyithunde hakuhi nayu. (Yakobo 4:8) Neryo, thwamabya thukasaba ithukendighasirwa thuthi? Thuthakania okwa bike.
Obulengekania obuthekene.
Omughulhu wukabana ebitsibu, wukanayowa iwabirihanga-hangya kutsibu? E Biblia yikathuhabulha yithi ithwasaba “butsira eryumbya” omughulhu ekyo kikabya, kandi yithi ithwabwira Nyamuhanga y’obwagha bwethu. (1 Abanya Tesalonika 5:17; Abanya Filipi 4:6) Kandi yikathukakasaya yithi thwamasaba, “obuholho bwa Nyamuhanga obulhabire amenge wosi bwasyatheya emithima [yethu] n’amaghaniryo[wethu] wosi.” (Abanya Filipi 4:7) Eribwira Thatha wethu w’elhubulha y’ebikathulyambaya, iryangana leka ithwayowa buholho. Ekyo ky’anzire ithwakolha. Esyonyimbo 55:22 hathi: “Wughusire Omwami Mukulhu y’amalighe wawu, nayu akendi kuhanganira.”
“Wughusire Omwami Mukulhu y’amalighe wawu, nayu akendi kuhanganira.”
Abangyi erithimba omwa kihugho kyosi ibo babiriyibanira obuholho obu. Hee Ran, owe South Korea, akabugha athi: “Nomunangathunga ebitsibu ebikalire, ngabya namabirisaba, ngayowa inamahumulikana n’eriyowa inamabirithunga akaghalha k’erisika.” Cecilia, omwa Philippines, akabugha athi: “Ingye ng’omubuthi, ngahanga-hangaya busana na bali baghe na mama waghe oyuthakinyiminyerera busana n’obulhwere. Aliwe busana n’erisaba, nganemukolha emibiiri yaghe isingayilhalikirire kutsibu. Nganasi ngoku Yehova akendinyiwathikya eribalembera.”
Erihumulikana n’erisika omwa bitsibu.
Mbwino wune omwa birengekanio ebikakw’aghalhaya kutse omwa bitsibu ebikalire ebyangan’itha n’omundu? Erisaba “Nyamuhanga w’erikirania lyosi” ikyangana kuwathikya kutsibu. E Biblia yikabugha yithi “yukathukiranaya omwa malighe wethu wosi.” 2 Abanya Korinto 1:3, 4) Ng’eky’erileberyako omughulhu Yesu abya omwa bulighe bunene, “mwakukama, mwasaba.” Mumwalhwiririraki? “Omulaika oyukalhua elhubulha, mwamubuthukirako, mwamuha amaaka.” (Luka 22:41, 43) N’oghundi muthaleghulha, Nehemia, abandu babi muba mw’endererya kutsibu n’erilengaho erimw’imania okwa mubiiri wa Nyamuhanga. Mwasaba athi: “Nikwa lino wuhe ebyalha byaghe by’akaghalha.” Ebyakwamako bikanganaya ngoku kwenene Nyamuhanga mwamuwathikya erithendibya mw’obuba n’erimuthokesya erikolha omubiiri wiwe. (Nehemia 6:9-16) Reginald, owe Ghana, akabugha ngoku akayowa okw’isaba, athi: “Ngabya namasaba, na kutsibu-tsibu omughulhu ngali omwa bitsibu ebikalire, ngayowa inamabiribibwira oyuli n’obuthoki bw’eringwathikya kandi oyukanyighumaya athi singakwe buba.” Omwa kwenene, Nyamuhanga iniakendi thuhumulikania thwama musaba.
(Amenge erilhua oku Nyamuhanga.
Ebya wukathwamu byangana kuhambako n’ab’okw’iwe omwa ngebe yosi. Ni kyahi ekyanga thuwathikya erithwamu ndeke? E Biblia yikabugha yithi: “Hamabya omundu omo kathi-kathi kenyu, oyukabulha amenge abulhaye Nyamuhanga oyukaha ndeke, oko bandu bosi butsira buhemu neryo omundu oyo asyahabwa amenge ayo.” (Yakobo 1:5) Thwamasaba amenge, Nyamuhanga iniakendi kolesya omulimu wiwe erithusondolha erithwamu ndeke. Nibya ithwangana saba Nyamuhanga y’omulimu abuyirire, kundi Yesu akathukakasaya athi “Thatha w’elhubulha asyaha omulimu abuyirire okwa bakamubulhayagho.”
“Munasaba Yehova ya kutsibu eringwathikya erithwamu ndeke.”
Na Yesu mwalhangira ini ky’omughaso erisaba Thatha wiwe y’obuwathikya akathwamu okwa myatsi y’omughaso munene. E Biblia yikathubwira ngoku abere akayasombolha abakwenda biwe 12, “mwasiba omwa kiro kyosi akasaba Nyamuhanga.”
Nga Yesu na munabwire hane ababirisika bakalhangira Nyamuhanga akasubirya emisabe yabu bakamusaba amenge w’erithwamu ndeke. Regina, owe Philippines, akabugha athi mwabana ebitsibu binene nga eriyilhwako n’erilhabirira eka yiwe iyuwene abiriholerwa mwira wiwe, eriherya omubiiri, n’erikulya abaana. Ni kyahi ekyabirimuwathikya erithwamu ndeke? Akabugha athi: “Ngabana obuwathikya omw’isaba.” Iya Kwabena owe Ghana, akathubwira ekyaleka iniasaba Nyamuhanga y’obuwathikya: “Munaherya omubiiri w’obuhimbe ogho nabya ingathunga kw’esyosente esyuwene.” Abere akanza eriminya eky’erihikako, akabugha athi: “Munasaba Yehova ya kutsibu angwathikaye erithwamu ndeke.” Akathasyabugha athi: “Ngayowa Yehova imwangwathikya kutsibu omw’isombolha omubiiri owakanyithokesaya erikolha eby’obunyakirimu n’eby’ekinyamubiri.” Nawu kuthya wangana bana obuwathikya bwa Nyamuhanga omw’isaba busana n’ebindu ebyanga hamba okwa ngolangana yawu nayu.
Ni mighaso mike buyira eya thwamathakaniako eyathwanga bana thwamasaba. (Eribana eby’erileberyako bingyi, lebaya akasanduku “ Omughaso w’Erisaba.”) Aliriryo iwe erithoka eribana emighaso eyi, wutholere iwatsuka eriminya Nyamuhanga n’erisonda liwe. Wamabya eki ikyawukayithagha, thukakuhira mw’omuhwa ow’erisaba Abema ba Yehova erikuwathikya erigha e Biblia. * Eki ky’ekindu ky’erimbere ekyangakuwathikya eriyithunda hakuhi ‘n’Oyukasubiraya erisaba.’
^ enu. 14 Eribana mwatsi mungyi bulhaya Abema ba Yehova ab’ewenyu kutse ghenda okwa muthahulha wethu owe, www.pr418.com.