1, 2. Nibyahi ebyaleka Yesu inianza Marata, aliwe nikyahi ekikakangaya ngoku nayu syabya ahikene?

WUK’IBUKAKI wukalengekania oku Marata oyukanibweko omwa Biblia? Nomwa kine indi Yesu abya amwanzire, n’eribya iyuk’ahulhawa okwa lina ng’omukali omunywani wiwe, Yesu anabya anzire n’abandi ababya bak’ubaha Nyamuhanga, nga mama wiwe Maria, na Maria mwali w’obu Marata. (Yn. 11:5; 19:25-27) Neryo ibbwa busana naki Marata yukathwalhawa ng’omunywani omwa mwatsi oyu?

² Yesu abya anzire Marata busana n’omubere w’erikokya n’eribya mukali mukoli. Aliwe ibbwa kandi kutsibu-tsibu busana n’obunyakirimu bwiwe. Abya ikirirye ndeke-ndeke ebya Yesu abya akakangirirya. Marata iny’ikirirye ngoku Yesu ni Masiya. (Yn. 11:21-27) Nayu anabya ng’ithwe, syabya ahikene. Ng’ekyerileberyako, kiro kighuma Yesu iniabiribabungira ewabu, Marata, mwahithana kutsibu oku mwali wabu, Maria, n’eryanza athi ambi Yesu amuhabule. Mwabugha athi: “Mukama sulithanyikwira obulighe kusangwa mwali wethu abirinyithekera emibiiri  yosi kwehi? Wumubwire wuthi anyiwathikaye.” (Soma Luka 10:38-42.) Eky’erileberyako ekiri omwa mwatsi oyu kikathweghesayaki?  

3, 4. Maria mwayisogha “omwatsi mubuya” omu nziraki, kandi Marata angabya imw’igha isomo lyahi? (Lebaya ekisasani ekiri okw’itsuka.)

³ Yesu abere akanza erikangania erisima liwe oku Marata na Maria busana n’erimukokya, neryo mwathwamu eribakangirirya omwatsi w’obunyakirimu. Maria iyo mwathwamu eriyithungira amenge awakalhua omwa buno bw’Omukangirirya Mukulhu am’ikalha “hakuhi n’ebisando bya Yesu n’eriowa ekinywe ky’omukama.” Ekyo kya Marata nayu abya atholere iniakolha. Yesu angamusimire.

⁴ Aliwe Marata mwayisulhusuthya omw’ithegheka ebyalya n’eyindi mibiiri nuku Yesu atseme ndeke. Aliwe ebyosi ebyo mubyaleka nibya Marata iniahithana oku Maria athi syathamuwathikya. Yesu mwalhangira Marata iniamayisulhusuthya kutsibu, neryo omwa bwolho-bwolho amamubwira athi: “Marata, Marata!, wukayighanyira n’erighanga-ghanga busana n’emyatsi mingyi.” Neryo amamubwira athi sihaliyithagha na byalya binganabi. Aliwe erikangania Maria ku si w’eriswekera, Yesu mwabugha athi: “Kusangwa Maria abiriyisogha omwatsi mubuya ow’athe angasaghulhwa.” Endambi yangabya imuyahika Maria nibya am’ibirirwa ebyo balya ekiro ekyo, aliwe isyang’ibirirwa erisimwa, n’akalyo k’obunyakirimu ak’abana busana n’erihulikirira Yesu ya ndeke. Myaka nga 60 enyuma w’aho, omukwenda Yoane mwahandika athi: “Yesu abya anzire Marata na mwali wabo.” (Yn. 11:5) Ebinywe ebi bikakanganaya ngoku Marata mwaghendera okw’ihabulha eryo Yesu amuha omwa lhwanzo kandi ngoku mwalholha embere erikolera Yehova buthaleghulha.

5. Munabwire ekihugho kiri kithi kyamalinganisibwa n’ekya kera omwa mughulhu we Biblia, kandi eki kikaletha kibulyo kyahi?

⁵ Omughulhu owa thulimu munabwire, abiribya athi mw’ebikalengemeraya binene kw’ilhaba ow’omwa buthuku bwe Biblia? “Abandu sibali bathabya n’eby’erikolesya omw’ikanirania ngoku bikanyirire munabwire, amakolero w’ebitabu omuli ebyuma ebik’anguhiraya ighuma, esyogazeti esyuswire mw’ebisasani muthina-muthina, amarediyo, esyofilimu ne tivi. Ebyosi ebi bikabya ibinemwasira mw’ebikathulengemeraya buli kathambi. . . Omughulhu wethu ono alhue asibwe ‘ng’Omughulhu w’Erilibukalha kw’Ameso.’ Aliwe hathya ak’ongera eribya ‘Mughulhu w’Erilengemeribwa.’” Ebinywe ebi byabwirawa abanya sukuru omwa Amerika emyaka eyilhabire omu 60 enyuma. Ne Watchtower ey’ebiro 15, Okwomwenda 1958, muyabugha yithi: “Ebikalengemeraya bikendi ghenda bik’ongera ekihugho kino kikaseghera okw’ihwaho lyakyo.” Ekyo kyabiribya kwenene! Neryo eki kikaletha ekibulyo kino: Thwanga kolhaki eriyihighulha okwa bikalengemeraya nuku thuhweraye amalengekania wethu okwa by’obunyakirimu nga Maria?

6. Abandu ba Yehova babirikolesya bathi ndeke etekinologia?

⁶ Ekithunga kya Nyamuhanga kinemukolesya e tekinologia erilholya eriramya ly’ekwenene ly’embere. Ng’eky’erileberyako, kera e tekinologia muyakolesibwa omw’ihulhukya e filimu eya “Photo-Drama of Creation,” n’ebisasani ebiri omwa mulingo w’evidiyo, ebyosi imune emirenge n’esyorangyi ndeke. Olhuhi olhw’Ekihugho kyosi olhwa I lhuthe lhwatsuka, n’omwa mughulhu lhwabya, abandu bangyi mubabana erihumulikanibwa omwa mwatsi ow’abya omwa filimu eyi, kundi iyikaghunzerera  yikakangania eryasa ly’Obuthabali bwa Yesu Kristo obw’Emyaka Rukumi obw’obuholho. Enyuma waho, omwatsi w’Obwami mwatsuka erilhabibwa okwa maradiyo kandi abandu bangyi omwa kihugho kyosi mub’owagho. Munabwire, esyokompyuta ne Intaneti binemukolesibwa omw’ithulhughania engulhu yuwene, erileka iyahika n’okwa bandu abikere hali kutsibu.

7. (a) Busana naki ni ky’akabi erilhabirirania omw’ikolesya ekihugho? (b) Ni kyahi ekya thuthatholere thuka ghalhaghandya? (Lebaya n’omwatsi ahikwa.)

⁷ Aliwe ngoku e Biblia yikanathubwira, erikolesya ekihugho kya kutsibu, ni kithegho. (Soma 1 Abanya Korinto 7:29-31.) Omukristayo iniangana yisanga iniamabirikolesya buthuku bunene kutsibu okwa bindu ebithawithe ambu ni bibi, ng’emisathu, erisoma ebitabu, erilebya e tivi, eriyalebya emyanya mirebe, n’eryanza eriyibanira ebindu eby’etekinologia ebiri okwa mulembe. Erikanirania n’abanywani okwa Intaneti n’amasimu, obuli kathambi erilebya emyatsi ey’amakuru n’eby’amasatha, byangana thutsandirya obuthuku, iniakubera mutse owa wuthe wanganza erileka. * (Omu. 3:1, 6) Thwamathendi kehya okwa buthuku obwathukahweraya okwa bindu ebithawithe mughaso, ithwangana yisanga ithwamabiri ghalhaghandya ekindu ekikulhu kutsibu—eriramya Yehova.—Soma Abanya Efeso 5:15-17.

8. Busana naki erihano ery’erithendianza emyatsi y’ekihugho ni ry’omughaso munene?

⁸ Ebiri omwa kihugho kya Sitani bikolire omwa mibere y’erithukura n’erithulengemerya. Ku byanabya bithya omwa kighonye ky’erimbere, ibbwa munabwire kyabirilhabirirania. (2 Tim. 4:10) Kwesi ni kikulhu eritheya ekihano kino: “Simwanze . . . emyatsi y’ekihugho kino.” Thwamalengaho kutsibu erighendera okw’ihano eri, isithwendi lengemeribwa, ikyaleka ithwathoka erikulha-kulhania “olhwanzo lhwa Thatha.” Eki ikikendi leka ithwathoka erikolha erisonda lya Nyamuhanga, neryo ithwasimwa nayu erihika kera na kera.—1 Yn. 2:15-17.

9. Yesu mwabugha athi ambi ameso ithwahiragho okuki, kandi mwathuhiriraho athi eky’erileberyako?

⁹ Ebinywe ebyo Yesu akolesaya akahabulha Marata ibikalhangirika ndeke omwa by’abya akakangirirya n’eby’abya akakolha. Mwahana abigha biwe athi ameso wabu abye okwa by’omughaso bakasyalengemeribwa  okw’ikolera Yehova n’Obwami bwiwe. (Soma Matayo 6:22, 33.) Yesu mwathayilhuhya omw’ibya n’ebindu bingyi, sy’aby’awithe nyumba kutse eririma.—Lk. 9:58; 19:33-35.

10. Yesu mwayitheya okuki omw’ithulira liwe?

¹⁰ Ni bingyi ebyanga lekire Yesu inialengemeribwa okwa mubiiri wiwe w’erithulira, aliwe ekyo mukithamubyako. Abere anemuthulira n’erikolha ebithiko-thiko omwa Kapernaumu, abandu mubamusaba bathi syalhue omwa tawuni yabu. Yesu mwana ghendera okw’isaba lyabu eri? Mwabasubirya athi: “Litholere inathulha Engulhu Yowene y’Obwami bwa Nyamuhanga n’oko yindi miyi nibya, kusangwa Nyamuhanga mwanyithuma erikolha omwatsi oyu.” (Lk. 4:42-44) Yesu mwakolha ngoku anabugha, amathulira n’erikangirirya omwa Palestina eyosi. Nomwanabya ahikene, iniakanalhuha busana n’erikolha kutsibu omw’ithulira.—Lk. 8:23; Yn. 4:6.

11. Yesu mwabwira omulhume oyuwabya omwa malhwa na mughalha wabo y’athiki, kandi mwa kunga athiki?

¹¹ Okwa wundi mughulhu, inianemukangirirya abigha biwe ngoku bangaghumira eryendereribwa, omulhume mwamubughiramu athi: “Mukangirirya wubwire mughalha wethu wuthi, thughabe obusoki obo thatha athusighira.” Yesu mwaghana eriyingirya omw’ebyo. Mwamusubirya athi: “Mulhume, nindi wanyiyira mo mutsweri wenyu, kutse mo mughabi w’obusoki bwenyu kwehi?” Neryo Yesu mwalholha embere n’erikangirirya liwe, eribakanirya okwa kabi akali omw’ilighira omuthima w’eryanza ebindu aka kulengemerya okwa mubiiri wa Nyamuhanga.—Lk. 12:13-15.

12, 13. (a) Yesu mwakolhaki ekyaleka Abagiriki ibanza erihindana nayu?(b) Yesu mwakolhaki nuku syalengemeribawe?

¹² Eyenga y’erighunzerera eya Yesu eribya okwa kihugho yabya yoswire mw’amalighe. (Mt. 26:38; Yn. 12:27) Abya awithe bingyi eby’erikolha kandi abya inianasi kw’akay’aghalhawa kutsibu n’er’ithibwa. Ng’eky’erileberyako, thalengekania okwa byabya Kyasande ekya Nisani biro 9 omwaka owa 33 E.K. Ngoku kyanabya ikyabiribughwa omwa buminyereri, Yesu mw’ingira omwa Yerusalemu iniane okwa kyana ky’epunda, n’abandu bangyi mubamupipa bathi, “Omwami oyukasa omwa lina ly’Omukama.” (Lk. 19:38) Ekiro ekyakwamako Yesu mw’ingira omwa hekalu, neryo omwa buthubaha, ababya bakakolera omwa nyumba ya Nyamuhanga mw’esuburu amabahighira eyihya.—Lk. 19:45, 46.

¹³ Omwa bangyi ababya bakahulikirira Yesu e Yerusalemu mwabya imune Abagiriki balebe abayighomba Yesu busana n’eby’akolha. Mubathuma omukwenda Filipo bathi banzire ibahindana na Yesu. Aliwe, Yesu mwathaligha bakamulengemerya okwa lhumimbi lhukulhu olhw’abyako. Mwathabya ng’oyukanza aminyawe n’eryanzwa nuku angabalha okw’ithwa n’esyonzighu sya Nyamuhanga. Abere abirisoborera ngoku endambi yikendi hika iniaholha, mwabwira Anderea na Filipo athi: “Oyukanza engebe yiwe, akathalhayayo; n’oyukakwa engebe yiwe y’obusu omwa kihugho kino asyabikayo oko ngebe y’erikotha.” Mwahabulha athi ambi obuli mundu iniabya n’omubere w’eriyihayo ng’iyo n’eribugha athi: “Omundu amanyikolera, Thatha asyamusikya.” Ahathe erithika-thika Filipo angabya imwakolya omwatsi oyo okwa Bagiriki abo.—Yn. 12:20-26.

14. Nomwakine indi Yesu abya atsomene kutsibu erithulira, ni kyahi ekikanganaya indi iniakana kolha n’ebindi?

¹⁴ Nomwakine indi Yesu mwathaligha akalengemeribwa okwa kighendererwa kiwe eky’erithulira, iniakanakolha n’ebindi. Mwanaligha erighenda okwa bugheni, nibya amawathikya n’omwa bugheni obo omw’ikolha  ekithiko-thiko ky’erihindulha amaghetse mwa bwabu. (Yn. 2:2, 6-10) Kandi banywani biwe n’abanzire eribya bigha ibakamukoya okw’irya, inialigha. (Lk. 5:29; Yn. 12:2) Ekikulhu kutsibu, Yesu iniakalhangira athi akabana obuthuku bw’erisaba, erighanirya iniane iyuwene, n’erilhuhuka.—Mt. 14:23; Mk. 1:35; 6:31, 32.

15. Omukwenda Paulo mwahabulha athiki, kandi mwabya athi ky’erileberyako kibuya?

¹⁵ Omw’ilinganisaya engebe y’Omukristayo ng’amathibitho, omukwenda Paulo, mwahandika athi: “Thuyilhusaye kw’ebyosi ebikathukakiraya.” (Soma Abaebrania 12:1.) Kwenene, Paulo iniakakolha ngoku abya akakangirirya. Mwasighania omubiiri ow’angalekire iniabana ekitsumbi n’obugaga bunene. Mwahira amalengekania w’okwa by’omughaso kandi amakolha kutsibu. Iniakaghenda e Suria, Asia, Makedonia, ne Yudea. Paulo abere akakania okwa maha wiwe aw’erisyabana engebe y’erikotha omwa lhubulha, mwahandika athi: “Nyanzire eryibirirwa emyatsi eyabirilhaba, erisimbirira emyatsi eyiri emuliro. Ngayitsinga erithibitha erihika okwa nduli, eribana olhuhembo.” (Fil. 1:10; 3:8, 13, 14) Kundi nibya abya muhuru, mwathoka eriyiha “okwa mubiiri w’omukama, butsira awandi maghaniryo.”—1 Kor. 7:32-35.

16, 17. Mbulha thuli bahuru kutse omwa butheke, thwangagherererya thuthi Paulo? Bugha okwa kyalholirweko.

¹⁶ Nga Paulo, abandi baghombe ba Nyamuhanga babirithwamu eribya bahuru nuku sibabye n’emisulhusutho mingyi ey’amaka. Eki kikaleka ibayihwerya omwa mubiiri w’Obwami. (Mt. 19:11, 12) Abaghombe ba Nyamuhanga abali omwa butheke bakabya n’emisulhusutho mingyi ey’amaka. Mbulha wuli muhuru kutse wuli omwa butheke, ithwe bosi thwanganayilhusya kw’ebyosi ebikathukakiraya neryo ithwakolera Nyamuhanga ithunawithe misulhusutho mike. Eki kyanganayithagha erikehya okwa bikathulira endambi nuku thukolere Nyamuhanga ya kutsibu.

¹⁷ Ng’eky’erileberyako mughalha wethu Mark na mukali wiwe Claire, abe Wales. Abosi mubatsuka obutemburi bakaghunza esukuru kandi bamalholha embere n’obutemburi babirithahania. Mark akabugha athi: “Muthw’olhobya engebe yethu omw’ighulya enyumba nene eyo thwabyamu n’erileka omubiiri owa thwabya thukakolha nuku thwang’ingira omwa mubiiri w’obuhimbe bw’amanyumba w’ekithunga kya Yehova.” Emyaka 20 eyihwere, bamabirithimba omwa Afirika bakawathikya erihimba okwa Bisenge by’Obwami. Ihakanayira ibabya ibali n’obusente buke kutsibu, aliwe Yehova iniakabatsomana. Claire akabugha athi: “Kikathutsemesaya kutsibu erikolera Yehova buli kiro. Thwabiribana abanywani bangyi kandi sihali ekyathubulirwe. Ebike ebyathwabirisighania sibyangalingana n’obutseme obwa thukabana thukakolera Yehova.” Abangyi abali omwa mubiiri w’omughulhu wosi ku bakana bugha bathya. *

18. Ni bibulyo byahi ebya mundu angana yibulya?

¹⁸ Kandi ibbwa iwe? Wangakolhaki wamalhangira isiwukikwamirira emyatsi y’Obwami n’omuhwa busana n’ebithawithe mughaso ebikalengemeraya? Obundi aho, wutholere iwuwania emibere yawu y’erisoma e Biblia n’eriyeghesya. Ekyo wangakikolha wuthi? Omwatsi ow’akakwamako akendisya thubwira.