OMWATSI W’OKWA KIDIPA | ERISABA NINA LY’OMUGHASO?
Hane Oyuk’owa Emisabe?
Abandi bakanayowa erisaba nga ni tsandya buthuku, ibayowa nga sihali oyukowa emisabe. N’abandi bakabugha bathi babirisaba, aliwe sibathasubwamu. Omughuma w’okwa bakabugha bathi sihali Nyamuhanga akabugha athi mwanamusaba athi: “Thakania nayi hakiri omwa bihwehwe.” Aliwe athi Nyamuhanga “mwayihunira.”
Aliriryo e Biblia yikathukakasaya ndeke ngoku hane Nyamuhanga oyuk’owa emisabe. Omwa Biblia mune ebyabwirawa abandu kera bino: “Asyabakwa [Nyamuhanga] olhukogho busana n’omulenge w’erilhaka lyawu; omughulhu asyowalyo asyabasubirya.” (Isaya 30:19) N’owundi mulhondo akabugha athi: “Erisaba ly’abathunganene ni butseme Bwiwe.”
Yesu mwasaba oku Thatha wiwe, “kandi Nyamuhanga mwamwowa.”
E Biblia yine mw’eby’erileberyako by’abasaba bamasubwamu. E Biblia yikabugha yithi Yesu “mwasaba n’erilemba-lemba. . . oyuwabya n’amaka w’erimulhamya” kandi “mwamwowa.” (Abaebrania 5:7) N’ebindi by’erileberyako bine omu Danieli 9:21 n’omwa 2 Emyatsi y’Emigulu 7:1.
Neryo busana naki abandi ibayowa emisabe yabu nga siyirisubawamu? Emisabe erisubwamu, thutholere ithwasaba oku Nyamuhanga oyo e Biblia yikabugha yithi y’ow’okwenene musa, Yehova, * butsira esindi nyamuhanga. Kandi na Nyamuhanga oyo, anzire ithwasaba “omw’isonda liwe”
Hane bangyi ababiriminya ndeke ngoku erisaba si murwa buyira ow’edini, aliwe n’ikania na Nyamuhanga oyukasubirayalyo. Isaac, owe Kenya, akabugha athi: “Munasaba Nyamuhanga angwathikaye eriyitheghererya e Biblia. Buthuku buke enyuma w’aho, omundu mwambikako n’eringwathikya ngoku nabya nganza.” Hilda owe Philippines aby’anzire eritsira ethaba. Mwabya abirilemwa, mwira wiwe mwamuhabulha athi, “Busana naki iwuthasaba Nyamuhanga y’obuwathikya?” Mwakolha ekyo. Neryo akabugha athi: “Munasweka ngoku Nyamuhanga anamathangwathikya. Munayowa inamatsuka erihwa mw’ekyaka ky’ethaba. Ethaba munatsirayo.”
Nawu Nyamuhanga ananzire iniakuwathikya omwa bitsibu byawu wamasaba erikwamana n’erisonda liwe.
