Obunakwa bunene bunemuleka esyomiliyoni sy’abandu isyakwa n’enzalha n’amalhwere. N’omwakine indi ebindi bitsweka omwa kihugho binakulha-kulhene, hane eyindi myanya mingyi eyiri mw’abandu abali omwa bunakwa obukalire. E Biblia yikanganaya yithi obunakwa sibuthatsuka munabwire.—Soma Yoane 12:8.

Erithoka erighunza h’obunakwa, ihakendi yithagha eribya egavumente eyanga lhangira yithi obuli mundu omwa kihugho amahikwako ndeke ebyosi ebiriho omwa bulingirirania. Egavumente eyo iyitholere iyaghunza h’esyonyuhi, kundi kutsibu-tsibu sy’esikaletha obunakwa. Nyamuhanga abirilhaghanisya egavumente ng’eyo.—Soma Danieli 2:44.

Nyamuhanga abirisombolha mughalha wiwe, Yesu, erithabalha okwa bandu abosi. (Esyonyimbo 2:4-8) Yesu akendisy’usulha abanakwa n’erighunza h’erinubibwa n’amalhwa.—Soma Esyonyimbo 72:8, 12-14.

Yesu ‘ng’Omunyamwami w’obuholho,’ akendisyahira h’obuholho n’obutheya. Neryo obuli mundu okwa kihugho akendisyabya omwa nyumba eyiwe, inyatsemera emibiiri yiwe, kandi ihane bingyi eby’erirya.—Soma Isaya 9:6, 7; 65:21-23.