Abanywani bakabya ibanemukanirania nuku baghumaye obunywani bwabu. Kuthya, na Nyamuhanga akabugha athi ithwabya ithunemukania nayu nuku obunywani bwethu nayu bwanga ghuma. Akabugha athi: “Mwasyanyilhakira, kandi mwasyasa n’erinyisaba, naghe nasyabahulikirira.” (Yeremia 29:12) Wukendibya wunemukania na Nyamuhanga, wukendi “yithunda hakuhi [nayu], nayu akendiyithunda hakuhi [nawu].” (Yakobo 4:8) E Biblia yikathukakasaya yithi: ‘Yehova ali hakuhi n’abosi abakamubirikira.’ (Esyonyimbo 145:18) Thwamasaba Nyamuhanga ya kutsibu, obunywani bwethu nayu buk’ongera.

Yesu mwabulya athi: “Nindi okw’inywe abathatha oyuwangaha mughalha wiwe y’eribwe akamubulya obundu kwehi? Kutse amamubulya erihere, anganamuha enzoka kwehi? Neryo. . . munasi eriha abaana benyu b’olhusunzo lhubuya, Thatha wenyu oyuli elhubulha syalhabire aho eriha ebindu bibuya oko bakamubulhaya kwehi?” (Matayo 7:9-11) Kwenene Nyamuhanga akabugha athi iwamusaba kundi akakutheghaya kandi anzire erikuwathikya. (1 Petero 5:7) Nibya akabugha athi iwamuhikira n’erimubwira ebitsibu byaghu. E Biblia yikathubwira yithi: “Simuhanga-hangaye emithima yenyu nikwa omwa buli mwatsi, mubwire Nyamuhanga obwagha bwenyu, imukamusaba n’erimuhathikana imunemuha ewasingya.”—Abanya Filipi 4:6.

Abasomire eby’emibere y’abandu, babirilhangira ngoku abandu bangyi bakayowa ibatholere erisaba. Nibya n’abakabugha bathi sihali Nyamuhanga kutse abakathika-thika ng’aneyo, nabu bakana saba. * Eki kikanganaya kwesi abandu ku bahangikirwe ibane mw’obwagha bwa Nyamuhanga. Yesu mwabugha athi: “Obutseme buli oko basi ko bali n’obwagha bwa Nyamuhanga.” (Matthew 5:3) Enzira nguma y’eryughuthya obwagha obo ly’eribya ithune mukania na Nyamuhanga mughulhu wosi.

Thwamasaba Nyamuhanga ngoku akathubwira athi ithwakolha, ithukendi ghasirwa thuthi?