Ebinywe bya Samuel, Teresa, na Magdalene bikakanganaya ngoku hali nzumwa nyingyi esikaleka abandu ibasaba, esindi obundi isirengire esindi. Abandi bakanasaba erilhua okwa muthima; n’abandi iryabya ng’ibugha buyira. Aliwe mbulha abandu bakasaba banga lhaba ebizamu, kutse erisaba bathi esyotimu syabu syanga singa, eryanza Nyamuhanga abasondole omwa butheke bwabu, kutse mbulha ni sindi nzumwa, abandu bangyi bakanza ibasaba. Erisekulya likakanganaya ngoku nibya n’abathatsomene edini bakabya ibanemusaba.

Wukanasaba? Wamabya iwukanasaba, ni byahi ebya wukasaba? Mbulha wukanasaba kutse eyihi, iwanganayibulya: ‘Erisaba linawithe mughaso? Mbwino hane oyuk’owa emisabe?’ Omusomi mughuma mwabugha athi erisaba “wukabya iwukathayihumulikanaya ng’omundu kw’anganakania n’akasoro ak’athungire.” N’abadokita abandi bakasighika ekyo, bathi erisaba, nayo ni “yindi nzira y’erithambira.” Mbwino abakasaba bakabya ibali okw’iberererya mukoro buyira, kutse erithabya nga bakayihumulikanaya?

E Biblia siyirilighirana n’ekyo. Yikathubwira yithi hane oyukahulikirira abakasaba omwa nzira eyitholere n’erisaba ebitholere. Ekyo nina kwenene? Thulebaye ebikakanganaya ekyo ku ni kwenene.