OMWATSI W’OKWA KIDIPA | WANGANA YITHEGHERERYA E BIBLIA
Busana Naki Kitholere Eriyitheghererya e Biblia?
“E Biblia ni kitabu ky’edini ekyasibwe kutsibu. Aliwe abanya Chaina sibakyasi ng’ekitabu ekyanga wathikya.”—LIN, owe CHAINA athya.
“Namabya isindi kenga n’ebiri omwa bitabu by’edini yethu y’Ekihindu, ebiri omwa Biblia byananga yitheghererya?”—AMIT, owe INDIA athya.
“Ngasikirye e Biblia ng’ekitabu ekya kera, kandi ng’owa ambu yikaghulhawa kutsibu. Aliwe sindi nathalholha n’okwa nguma.”—YUMIKO, owe JAPAN athya.
Abandu bangyi omwa kihugho kyosi basikirye e Biblia. Aliwe kandi ibanganabya ibasi bike kutse nibya isibasiki okwa biri muyo. Abangyi abali omwa bihugho bye Asia ku bali bathya, aliwe hane n’abangyi abali bathya nibya ibane n’omwa bihugho ebikakolesibawamu e Biblia kutsibu.
Aliwe wangana yibulya, ‘Ni kyahi ekyanga leka inganza eriyitheghererya ebiri omwa Biblia?’ Eriyitheghererya ebiri omwa kitabu kya Nyamuhanga eki irikendi kuwathikya omwa bino:
-
Iwukendibana obuthekane n’etseme
-
Iwathoka erirwanisya ebitsibu by’amaka
-
Erirwanisya amaghaniryo
-
Eryuwania obughuma bwawu n’abandi
-
Erikolesya ndeke esyosente
Ng’eky’erileberyako, Yoshiko, owe Japan akabugha athi iniakabulha e Biblia nga yikakanaya okuki. Neryo mwathwamu eriyisomerayo. Ekyalhwiririramu ni kyahi? Akabugha athi, “E Biblia yabiringwathikya eriminya ngoku nanga kolesya engebe yaghe omwa nzira eyitholere n’eribya n’amaha awuwene. Singakiri ng’oyuthawithe eky’aliko.” Amit, iyo mwathwamu eriyisomera e Biblia. Akabugha athi, “Munasweka, ingalhangira ngoku e Biblia yiri mw’ebyanga ghasira obuli mundu.”
E Biblia yabiriwathikya abandu bangyi bo kutsibu. Busana naki iwuthayisomerayo wanalhangira ngoku yanga kughasira?
