1, 2. Thwangana yibulya thuthiki thwamalhwalha, kandi ni by’erileberyako byahi ebya thwang’ibuka omwa Biblia?

WUNE wathalhwalha, iwabulha nga wunemwendi lhama? Kutse wanganabya imuwabulha omuhughu kutse munywani wawu ng’anemwendilhama. Ni kya bulikiro eriyilhalikirira omundu amalhwalha obulhwere obukalire. Ekyo mukyanabya okwa bami babiri omwa buthuku bw’abaminyereri Eliya na Elisa. Omwami Ahazia, mughalha wa Ahabu bana Yezebeli, mwathogha amayisina kutsibu, neryo mwabulya athi: “Nanasyalhama?” Enyuma w’aho, Omwami Beni-hadadi owe Suria mwalhwalha kutsibu. Mwabulya: “Nanasyalhama oko ndwalha eyi?”—2 Bam. 1:2; 8:7, 8.

² Mughulhu mungyi thukabya ithunawithe amaha thuthi thukendi lhama kutse oyo thukathwanira. Aliwe abangyi bakabya ibanemubulha Nyamuhanga ng’anemwendi wathikya. Omwa buthuku bw’abami abathukabirikaniako, Nyamuhanga anabya akakolha ebithiko-thiko by’erilhamya abandu. Yehova nibya mwakolesya abaminyereri biwe erilhubukya abandu. (1 Bam. 17:17-24; 2 Bam. 4:17-20, 32-35) Mbwino munabwire Nyamuhanga akinakolha ebiri ng’ebyo?

3-5. Ni maaka wahi agho Nyamuhanga na Yesu bawithe, kandi kikaleka ihabya bibulyo nga byahi?

 ³ Ahathe erithika-thika, Nyamuhanga anawithe obuthoki bw’erikolha ekyosi-kyosi okwa maghalha w’omundu. E Biblia yikakanganaya ekyo kyo ndeke-ndeke. Ihakanayira iniaswirya omundu y’omwa bulhwere, ng’eky’akolha oku Farao ow’omwa buthuku bwa Abrahamu n’eky’akolha oku Miriamu mwali wabu Musa. (Enz. 12:17; Emig. 12:9, 10; 2 Sam. 24:15) Nyamuhanga mwabwira Abaisraeli athi bamathendi mwowa, iniakendi baswirya omo ‘ndwalha kutse ebihunzo.’ (Ebi. 28:58-61) Aliwe kandi, Yehova iniakanakakiraya amalhwere. (Eri. 23:25; Ebi. 7:15) Kandi iniakanalhamaya n’abandu. Yobu abere aghunza mughulhu muuli inianalhwere erihika okw’anza athi ambi ahole, Nyamuhanga mwamulhamya!—Yobu 2:7; 3:11-13; 42:10, 16.

⁴ Omwa kwenene, Nyamuhanga anawithe amaaka w’erilhamya oyulhwere. Na Mughalha wiwe kuthya. E Biblia yikakanganaya ngoku Yesu mwanalhamya abahagha, abathutsa, n’esyondime-thime, n’abasanyarere. (Soma Matayo 4:23, 24; Yn. 9:1-7) Ka kikatsemesaya eriminya ngoku ebithiko-thiko by’erilhamya ebyo Yesu akolha byakanganaya ebingyi eby’akendisyakolha omwa kihugho kihya-kihya! Okwa buthuku obo “sihali endulhani eyikendi syabugha yithi: ‘Nyilhwere.’”—Isa. 33:24.

⁵ Aliwe thunatholere munabwire ithwasaba Nyamuhanga kutse Yesu y’ebithiko-thiko by’erilhamya? Thutholere ithwabya n’amalengekaniaki okwa malhwere kutse amakoni awakalha-kalire, kandi thutholere ithwakolhaki?

6. Ni kyahi ekya thwasi okwa nzunzo sy’erilhamya esyo abandi Bakristayo b’omwa kighonye ky’erimbere babya nasyo?

⁶ E Biblia yikathukanganaya ngoku omwa kighonye ky’erimbere, Nyamuhanga mwanaha abandi bahakabibwa b’amaaka w’erikolha ebithiko-thiko. (Emib. 3:2-7; 9:36-42) Omwa syonzunzo muthina-muthina sy’omulimu mwabya imune n’olhusunzo “lhw’erilhamya esyondwalha.” (1 Kor. 12:4-11) Aliwe esyonzunzo esyo n’esindi ng’esy’eribugha omwa mibughe musindo-musindo n’eriminyerera, syabya ini sy’erihwaho. (1 Kor. 13:8) Munabwire sisikiriho. Kwesi sihali ekyanga leka munabwire ithwalengekania thuthi Nyamuhanga akendi kolha ekithiko-thiko nuku thulhame kutse ab’okw’ithwe.

7. Omwa Esyonyimbo 41:3 muli mwatsiki ow’akahumulikanaya?

⁷ Aliwe nomwabine bithya, omughulhu thulhwere, thutholere ithwasaba Nyamuhanga y’amenge, obuwathikya, n’erithuhumulikania, ng’abandi baramya abakera ku bakolha. Omwami Dawudi mwahandika athi: ‘Obutseme buli oko mundu oyukatsomana ow’amalighe; Omwami Mukulhu asyamuwathikya oko kiro ky’obulighe. Omwami Mukulhu asyamuhanganira n’eritheya engebe yiwe.’ (Esy. 41:1, 2) Thunasi ngoku n’ababya bakatsomana ab’amalighe omwa buthuku bwa Dawudi, endambi iyikahika ibaholha. Neryo kwesi Dawudi sy’amanyisaya athi oyukakolha ekyo iniakendi kolerwa ekithiko-thiko, iniabyaho kera na kera. Dawudi amanyisaya athi Nyamuhanga iniakendi wathikya oyukatsomana abandi. Athi? Dawudi mwabugha athi: “Omwami mukulhu asyamuwathikya omughulhu alhwere n’erimusubya ndeke.” (Esy. 41:3) Ni bugha ambu, omundu oyuwabya akatsomana ab’amalighe iniakabya inianayikethere ngoku Nyamuhanga analhangire eby’akakolha omwa buthaleghulha. Nyamuhanga obundi iniangana leka inialhama erilhabira omwa maaka w’eriyilhamya aw’ali omwa mubiri wethu.

8. Ngoku kiri omwa Esyonyimbo 41:4, Dawudi mwasaba athiki?

⁸ Dawudi mwabugha athi: ‘Munabugha nyithi: Iwe Mwami Mukulhu, wunyighanyire.  Wunyilhamaye, nabirikuhalyako.’ (Esy. 41:4) Angabya iniahandika ebyo omughulhu Abusaloma anza eriyimirya ekithumbi ky’obwami Dawudi inianalhwere isyanga thoka eriyilhwirako. Nyamuhanga nomwanabya iniabirimughanyira, Dawudi mwathibirirwa ekibi kiwe ky’erisingira na Batiseba n’ebitsibu ebyalhwiririramu. (2 Sam. 12:7-14) Nomubyanabya bithya, Dawudi abya inianasi ngoku Nyamuhanga akendi muwathikya omwa bulhwere bwiwe. Mbwino Dawudi abya akasaba athi Nyamuhanga akole ekithiko-thiko erimulhamya n’erimwongera ebiro by’eribyaho?

9. (a) Omwatsi w’obulhwere bwa Dawudi ni wa mbaghane athi okwa w’Omwami Hezekia? (b) Dawudi angabya inianzaki akasaba Yehova?

⁹ Myaka mingyi enyuma w’aho, Nyamuhanga mwalhamya Omwami Hezekia, oyuwabya iniabiririlhwalha kutsibu n’erisonda eriholha. Omwa buthuku obukalire obo, Nyamuhanga mwamuwathikya. Hezekia mwalhama amathasyabyaho habw’emyaka 15. (2 Bam. 20:1-6) Aliriryo, Dawudi sy’asaba athi Nyamuhanga akole ekithiko-thiko erimulhamya. Dawudi asaba Yehova amuwathikaye omwa mibere ey’akawathikirayamu oyukatsomana abandi. Ni bugha ambu asaba eriwathikibwa omwa bulhwere. Kundi Dawudi abya inianasi kw’abirighanyirwa, angabya iniasaba athi Nyamuhanga amuhumulikanaye n’erimusikya omuthima, kandi athi ambi amaaka awali omwa mubiri wiwe amuthokesaye erilhama. (Esy. 103:3) Nethu thwangana saba thuthya.

10. Omwatsi wa Trofimo na Epafrodito akathweghesayaki?

¹⁰ Ngoku Dawudi athalhamibawa omwa kithiko-thiko kutse eryongerwa ebiro bingyi, ku byanabya bithya n’oku Trofimo oyuwabya akakolha n’omukwenda Paulo. Thunasi ngoku Paulo mwanahebwa obuthoki bw’erilhamya abalhwere. (Soma Emibiri 14:8-10.) Mwanalhamya ‘ise wa Publio oyuwabya alhwere ekihuhania n’erinia omusasi.’ Paulo ‘mwasaba, amamuhira kw’ebyalha, amamulhamya.’ (Emib. 28:8) Aliwe Paulo mwathalhamya Trofimo nomubanabya haghuma nayu omwa mubiiri w’erithulira. (Emib. 20:3-5, 22; 21:29) Omughulhu Trofimo alhwalha, Paulo mwathamulhamya, aliwe mwamusigha e Mileto erihika aho alhamira. (2 Tim. 4:20) Kuthya, n’omughulhu Epafrodito “abya alhwere hakuhi n’eriholha,” sihali ekikakanganaya indi Paulo mwakolha ekithiko-kithiko erilhamya munywani wiwe oyu.—Fil. 2:25-27, 30.

11, 12. Luka mwawathikya athi Paulo, kandi thwanga bugha thuthiki okwa budokita bwiwe?

¹¹ Luka oyuwahandika ekitabu ky’Emibiri y’Abakwenda abya dokita kandi iniakaghenda na Paulo. (Kol. 4:14; Emib. 16:10-12; 20:5, 6) Luka anganabya inianabya akakangirira Paulo y’omubatsi w’erirya kutse erimuthambira haghuma n’ababya nayu omw’ithulira. Ekyo iniakakikolha busana naki? Kundi Paulo iniakanalhwalira omwa nzira. (Gal. 4:13) Luka iniakanathambira, kundi nibya Yesu mwanabugha athi: “Abakalire sibali n’obwagha bw’omunganga, nikwa abalhwere.”—Lk. 5:31.

¹² E Biblia siyiri kanganaya Luka ng’asoma obudokita mughulhu wahi kandi ng’abusomera hayi. Aliwe kikabughawa indi Paulo akaniraya Abanya Kolosai oku Luka ng’omudokita kundi kubabya bamwasi bathya. Nibya n’ekindi, omwa Laodikia, hakuhi ne Kolosai yabya iyine esukuru y’abadokita. Ebya Luka abya akabugha okwa by’emithambirire sibyabya by’eriyipika-pikira; iyo abya dokita. Ekyo kikaminyikalha omwa binywe eby’abya akakolesya omwa Biblia omwa kitabu kya Luka n’eky’Emibiri y’Abakwenda kandi n’eribya imwakania buuli okwa mibere Yesu abya akalhamirya mw’abandu.

13. Thutholere ithwabya na malengekaniaki okwa by’erikangirira emibatsi?

¹³ Munabwire sihali Mukristayo oyuwithe olhusunzo lhw’erikolha ebithiko-thiko by’erithulhamya. Aliwe abandi balikyethu bakana  kangirira abandi b’emibatsi, nibya isibathabasaba nayu. Aliwe kwenene, omundu angana habulha okwa mithambirire eyangana kolha. Paulo mwanakikolha omughulhu Timoteo abya alhwere omwanda, obundi busana n’erinywa amaghetse awathuwene. * (Soma 1 Timoteo 5:23.) Aliwe ekyo kiri mbaghane okw’ikangirira mulikyethu y’emibatsi y’ebithi kutse ebyalya ebyo wuthasi ndeke obundi nibya ebyangana kolha n’omundu ya nabi. Abandi bakanabya bakakangirira emibatsi ng’eyo, wukan’owa ibabugha bathi: ‘Nanga kw’anabya alhwere athya, neryo amalya enanga . . . Neryo mwalhama.’ Omundu nomwanga thukangirira inianakakasirye bungahi, ambi ithwabya ithunasi ngoku n’emibatsi kutse emithambirire eyasibwe kutsibu yikanalhua mw’ebitsibu.—Soma Emisyo 27:12.

14, 15. (a) Abandi bakanathwalha erilhwalha ly’abandi ng’akaghisa k’erikolhaki? (b) Emisyo 14:15 hakathuwathikaya hathi okw’ithwamu okwa mithambirire?

¹⁴ Ithwe ng’Abakristayo thwanzire eribya n’amaghalha mabuya nuku thwangathoka eritsemera engebe n’erisangira ndeke omwa mubiiri wa Nyamuhanga. Nomwabine, thwabirisighalya obuthahikana. Eki kikalhangirika thukalhwalha. Omughulhu thukalhwalha, hanganabya mithambirire muthina-muthina eyanga kolesibwa. Obuli mundu awithe obughabe bw’erithwamu emithambirire ey’anga kolesya. Eky’obulighe, omwa kihugho kino ekiri mw’omururu, hane abakalhangira erilhwalha ly’abandi ng’akaghisa k’eribanira mw’esyosente. Abandi bakahamaya kutsibu emithambirire mirebe nibya n’eribugha amabehi bathi abandu bangyi babirilhamibwa muyo. N’abandi bakahira omuwatho w’oko mibatsi mirebe eyikalire ebeyi nuku bangaghoba kutsibu. Okwa mundu oyulhwere, kandi oyuwanzire erilhama, emyatsi ng’eyi iyikendibya nga ni kwenene. Aliwe ekinywe kya Nyamuhanga kikathuhabulha kithi: “Omukiru ak’ikiriraya obuli kinywe, nikwa omugherekania akalebaya ndeke ngoku anga ghenda.”—Emi. 14:15.

¹⁵ “Omugherekania” iniakendi yitheya, na kutsibu-tsibu amathika-thikira oyuwama mukangirira emithambirire mirebe. “Omugherekania” iniangana yibulya: ‘Akabugha athi ambu ebithi, kutse othunini, kutse ebyalya birebe mubyalhamirye omundu, aliwe hane obwema obukakanganaya ndeke-ndeke kwenene ku mwanalhama? Ithwe bandu sithusosene. Amabya imwalhamya olya, ngaminya indi naghe kw’akendi ndamya? Mbwino nganatsuke eribulya abasomire ndeke eby’obulhwere bwaghe?’—Ebi. 17:6.

16. Thutholere ithwayibulya bibulyo nga byahi thukanza eriyitheya okwa mithambirire mibi?

¹⁶ Ekinywe kya Nyamuhanga kikathuhabulha kithi “thuyitheghaye” okwa mughulhu ono. (Tito 2:12) Kutsibu-tsibu thutholere ithwayitheya n’erikolesya ndeke amenge, emithambirire eya bamakukangirira wamabya isiwuli wath’owa kuyo, kutse ilhuli nga lhuthahwa-thahwa. Oyuwamakukangirira, mbwino angana soborera ndeke emikolere y’omubatsi oyo? Nina mithambirire eyasibwe ndeke, n’abasomire eby’erithambira bakanalighirayo? (Emi. 22:29) Kutse bakakanaya kuyo ibanemuhira mw’ekisehya? Bamabugha ambu omubatsi mulebe akine muhyaka, sy’ali aminywa n’abandi badokita, mbwino wunatholere iwaligha ekyo? Kutse ibabugha ambu hane ekyuma ekiri ‘mw’amaaka awathasibwe’ aw’akawathikaya. Okw’ekyo, ibbwa wutholere iwayitheya kutsibu, kundi Nyamuhanga akathukunga okw’ikolesya ebindu ebiri mw’obuli nga bukumu.—Law. 19:26; Ebi. 18:10-12.

17. Sikibi eribya n’eriyisunza lyahi?

¹⁷ Akathunga akakasondolha ak’omwa kighonye ky’erimbere mukathumira ebithunga ebaruha ey’omughaso. Omwa baruha mubabya babirithondogholha ebindu bingyi eby’Abakristayo batholere ibayihighulhako, muyaghunzerera yithi: “Mwamayitheya okwa myatsi eyi, mwasyakolha ndeke. Mubye n’obuholho!” (Emib. 15:29) Omwa sindi Biblia, ebinywe “mubye n’obuholho” bikabugha bithi “mubye n’amaghalha awuwene.” Nomwakine indi ebinywe ebi lyabya ilhagha buyira ery’erighunzerera ebaruha, bikathw’ibukaya ngoku si kibi eryanza eribya n’amaghalha awuwene nuku thwanga kolera Nyamuhanga wethu.

18, 19. Ni kyahi ekya thulindirire omwa kihugho kihya-kihya?

¹⁸ Omughulhu mubi ono amabya akineho kandi ithune omwa buthahikana, erilhwalha siryangahwaho. Munabwire sihali bithiko-thiko by’erilhamibwa. Aliwe, Eribisulirwa 22:1, 2 hakakanganaya ngoku obuthuku bukisiya ibwahika ithwabana erilhamibwa erya kera na kera. Omukwenda Yoane mwalhangira “olhusi lhw’amaghetse w’engebe” haghuma “n’omuthi w’engebe” ikune ebikoma “by’erilhamya ebihanda.” Sibugha ambu ebi bik’imanira emibatsi y’ebithi eyathukakolesaya munabwire kutse eyathukendi syakolesya omwa buthuku bw’embere. Aliwe, bik’imanira endegheka ya Yehova ey’eriha abandu b’engebe y’erikotha erilhabira omu Yesu—ekindu kwenene ekya thulindirire.—Isa. 35:5, 6.

¹⁹ Thune mulindirira emibere mibuya eyi, thukyasi ngoku Yehova atsomene obuli mughuma w’okw’ithwe, nibya n’omughulhu thulhwere. Nga Dawudi, nethu thwangana yikethera Nyamuhanga ngoku akendi thuwathikya omughulhu thulhwere. Kandi nga Dawudi, nethu ithukendi bugha thuthi: “Wukanyiwathikaya, kusangwa ngakolha ebithunganene; wukanyitheghaya embere syawu kera na kera.”—Esy. 41:12.