Thatha waghe mwahuma Germany amayikalha e Australia omwa 1949. Mwasa erisondya omubiiri omwa makolero w’eby’erithakulha eby’obughuli omwa kithaka n’eby’amasenyerezi neryo amikalha okwa kyalu kye Victoria. Eyo mwathahya mama waghe, neryo munabuthwa 1953.

Myaka mike enyuma waho, mama waghe mwatsuka erigha e Biblia n’Abema ba Yehova, neryo munaminya esyongangirirya sye Biblia ingakine mulere. Aliwe thatha waghe isyawithe dini. Mwabya mutsurumi kandi oyukalire, neryo mama iniakamusagha. Mama mwalholha embere erigha e Biblia omwa bubiso-biso kandi mwanza ebya yikakangiriraya. Thatha amabya isyaliho, mama iniakabwira ingye na mwali wethu okwa ebyo ak’igha. Mama mwathubwira okwa paradiso ey’obuthuku obukasa kandi ngoku thwanga tsema thwamaghendera okwa bihano bye Biblia eby’esyongeso.—Esyonyimbo 37:10, 29; Isaya 48:17.

Ingane w’emyaka 18, munayowa ingatholere eriyilhwira eka busana n’obutsurumi bwa thatha. Nomwakine indi nabya iniabirikirirya ebyosi ebya Mama waghe abya iniabirinyikangirirya erilhua omwa Biblia, nabya isindi nalhangira omughaso wabyo. Munalemwa eribighenderako. Munatsuka erikolera omwa by’amasenyerezi omwa by’erithakulha eby’obughuli omwa kithaka. Nabere nahikya emyaka 20, munathahya. Enyuma w’emyaka isathu muthwabutha omwana w’obukali, neryo kandi munathasyalengekania okwa kikulhu omo ngebe yaghe. Munaminya ngoku e Biblia yangana wathikya eka yaghe, neryo munatsuka erigha e Biblia n’Abema ba Yehova. Aliwe mukali waghe mwahakanisya kutsibu Abema. Nabere ingahindana okwa mughuma w’okwa mihindano yabu, mwambwira kighuma athi—wuleke erigha e Biblia kutse wulhue hano. Eriyowa ibyamakalha, munalighirana nayu neryo namakya okwa by’erigha n’Abema. Enyuma waho munayikubyabwomo busana n’erilemwa erikolha ekyo nabya inganasi ku kihikire.

Kiro kighuma, abangakolha nabu mubanyikangania eponografe. Yabya iyikatsemesaya kandi iyikathikaya, kandi muyaleka ingayowa ingaliko olhubanza. Eryibuka ebyo nabya inabirigha omwa Biblia, mukyaleka ingalengekania indi Nyamuhanga akendi syanyisuyira. Aliwe nabere nganemwongera erilebya eponografe, amalengekania waghe okw’iyo mwahinduka. Endambi muyahika amanyibera mutse.

Eyindi myaka 20 eyakwamako, munongera erisighania ebihano ebya mama waghe abyo abya iniabirilengaho erinyikangirirya. Emibere yaghe muyakangania ebyo nabya ingahira omwa bulengekania bwaghe. Iningabugha ebitsumi, kandi inganzire amasatha w’eby’obutswatswa. Munabya n’amalengekania awathuwene okwa by’emyatsi y’engyingo. Nomwakine indi nabya ingane na mukali waghe, munayingirya omwa by’eribya n’abandi bakali. Kiro kighuma munayilebya omwa kiyo n’eribugha indi, ‘Singakwanzire.’ Ekitsumbi kyaghe kyabya ikyabirisubamo eriyipona.

Obutheke bwaghe mubathwika, neryo engebe yaghe muyabya omo kabi. Neryo munasaba Yehova n’omuthima waghe wosi. Munatsuka kandi erigha e Biblia, nomwakine indi habya ihamabirilhaba emyaka makumi abiri. Okwa buthuku obo thatha waghe abya iniabiriholha, na mama iniabiribatizibwa ng’Omwema wa Yehova.

Muhabya embaghane nene ahakathi-kathi k’engebe yaghe n’ebihano bye Biblia. Aliwe oko ndambi eyi nabya inabirithwamu eribana erithekana eryo e Biblia yikalhaghanisaya. Munathwamu eryuwania emibughire yaghe n’erileka obutsurumi bwaghe. Kandi munathwamu erileka engebe yaghe ey’eby’obutswatswa, emisathu ey’esyosente, ethamiro, n’erileka er’iba oyunyihere omubiiri.

Abangakolha nabu mubathayitheghererya ekikaleka inganza erikolha esyombinduka nene-nene ng’esyo. Ahabw’emyaka isathu, ibakanyihathikana bathi nga subire emibere yaghe yakera. Iningabya namasubira hake omutse wakera, ng’erikangania erihithana kutse eribugha ekinywe ekithuwene, omwa mulenge munene ibakabugha bathi: “Aha! Joe owakera amasubulha.” Ebinywe ebyo ibikanyiponesaya! Mughulhu mungyi iningayowa ingalemirwe.

Aho ngakolera ihoswire eponografe, ey’ekielekitroniki n’eyiri okwa syombapura. Abangakolha nabu ibakabera erighaba ebisasani by’eponografe erilhabira okwa syokompyuta syabu, ngoku nanabya ingakolha kera. Nabya inganemulengaho erileka omutse waghe w’erilebya eponografe, aliwe mubakangania ku banzire kutsibu ingasubiragho. Munasaba oyuwabya akanyeghesya e Biblia y’obuwathikya n’erinyihumulikania. Omw’ighumisirizya mwanyihulikirira ingamubwira ebyosi ebiri okwa muthima. Omw’ikolesya amasako malebe we Biblia, mwanyikangania ngoku nangarwanisya omutse waghe oyo, kandi mwanyihira mw’omuhwa w’erisaba Yehova y’obuwathikya omw’isaba buthumbya.—Esyonyimbo 119:37.

Kiro kighuma munathunga emithingi n’abosi abo ngakolha nabu. Emithingi yabere iyinemo, munababwira nyithi bahe abalhume babiri be biya ababya bathamiri kera. Egurupu eyosi muyabugha yithi: “Siwanga kolha ekyo! Abalhume aba banemurwanisya ekyaka ky’obwabu!” Munasubirya nyithi: “Ee, naghe kuthya.” Eritsuka-tsukana n’ekiro ekyo, abalhume abo mubaminya akaghalha ako ngahiraho erileka omutse w’erilebya eponografe neryo mubalekeraho eribya bakanyihathikana erisubira emitse yaghe eya kera.

Kandi endambi muyahika, busana n’obuwathikya bunene bwa Yehova, munakinda omutse waghe w’erilebya eponografe. Omwa 1999, munabatizibwa ng’Omwema wa Yehova, munatsema habw’erithasyahebwa akaghisa akakabiri ak’eribya omo ngebe eyuwene kandi eyitsemire.

Lino nabiriyitheghererya ekikaleka Yehova iniapona ebindu ebyo nabya inabiryanza habw’obuthuku buuli. Iyo nga Thatha w’olhwanzo, aby’anzire erinyitheya okwa kitsibu ekikalhua omw’ilebya eponografe. Kwesi ebinywe ebiri omwa Emisyo 3:5, 6 bihikire! Ebinywe ebyo bikabugha bithi: “Wikiriraye Omwami Mukulhu n’omuthima wawu wosi, suyeghemeraye obuminya bwawu. Omo syonzira syawu syosi wumwahule, nayu asyathunganania esyonzira syawu.” Si bugha ambu ebihano bye Biblia bikatheghaya lisa aliwe kandi bikaleka iwabana etseme nene.—Esyonyimbo 1:1-3.

Kera, ingayiponire, aliwe lino ngawithe ekitsumbi kandi ngathekene. Ngawithe engebe eyihenirye kandi ngayowa Yehova iniabirinyighanyira kandi akanyiwathikaya. Omwa mwaka 2000, munathahya Karolin, dada mubuyanga oyuwanzire Yehova ya kutsibu ng’ingye. Eka yaghe yirimo obuholho. Omo kwenene thukayowa ini lhusunzo eribya omwa lhughanda lhw’abalikyethu olhw’ekihugho kyosi olhuhenirye olhuli mw’olhwanzo.