Ebindi bihembo bikabya by’obughuli kundi biryahebawa n’ab’ehamuli kutse abo thusikirye kutsibu. Aliwe n’ebindi bihembo nomubyangabya ini by’ebbeyi nyike bikathwalhawa mwa by’obughuli busana n’eribya ekihembo ikiryalhua okwa muhughu oyo thwanzire kutsibu kutse erilhua okwa munywani oyo thuyikethere. Ku byabya bithya okwa kihembo ekikanibweko omwa mwatsi w’erimbere ekya Russel aha Jordan. Eki kikathwibukayaki okwa mbanulho?

Eky’erimbere, e Biblia yikabugha yithi ‘Nyamuhanga mwathuma Mughalha mubuthwa mughuma omwa kihugho, ithwathoka eribana engebe busana nayu.’ (1 Yoane 4:9) Ekyo omwa kwenene kikaleka ekihembo eki ikyabya ky’obughuli. Sihali oyuwithe ehamuli eyilhabire eya Nyamuhanga. Omuhandiki w’esyonyimbo Omuebrania mwamubughako athi: “Iwe wukahulhawa mwa Yehova, n’iwe musa oyuli Endatha Kutsibu okwa kihugho kyosi.” (Esyonyimbo 83:18, NW) Nawu thalebya, erithunga ekihembo erilhua okwa w’endatha kutsibu!

Ekyakabiri, Nyamuhanga ni “Thatha wethu.” (Isaya 63:16) Omu nziraki? Mwathuha engebe. Kandi akathutsomana buthaleghulha, ngoku thatha oyutsomene akanatsomana abaana biwe. Nyamuhanga abere akakania oku Efuraimu ng’ekihanda ky’abandu biwe, mwabulya athi: ‘Efuraimu si mwana waghe mwanze kwehi? Omuthima waghe akamukwa olhukando. Kwenene nasyamughanyira.’ (Yeremia 31:20) Nyamuhanga kw’akanayowa athya n’okwa baramya biwe abamunabwire. Syalisubulira okw’ibya Muhangiki omuthoki w’ebyosi lisa, aliwe kandi ni Thatha wethu oyutheleghulha kandi Munywani wethu. Mbwino ekyo sikirileka ekihembo kyosi-kyosi eky’akathuha kikabya ky’obughuli bunene kutsibu?

Ebindi bihembo bikabya by’obughuli kundi isibiryahebawa indi ni kilhaghiro, aliwe busana n’olhwanzo. Oyukahithaya omwa kwenene syalilindirira nayu erisyahebwa.

Busana n’erithwanza, Nyamuhanga mwahayo Mughalha wiwe. E Biblia yithi: ‘Olhwanzo lhwa Nyamuhanga lhwabiriminyikalha okw’ithwe omwa mwatsi ono athi Nyamuhanga mwathuma Mughalha wiwe mubuthwa mughuma omwa kihugho.’ Ekyalhwiririramu? “Ithwathoka eribana engebe busana nayu.” (1 Yoane 4:9) Kyanabya kilhaghiro indi Nyamuhanga akole ekyo? Eyihi nahake! “Erithongolibwa erikabanika busana na Kristo Yesu” likakanganaya ‘olhukogho’ lhwa Nyamuhanga.—Abanya Roma 3:24.

Busana naki ekihembo kya Nyamuhanga ekyo ni “lhukogho”? E Biblia yithi: “Nyamuhanga akakanganaya olhwanzo lhwiwe busana nethu, kusangwa omughulhu thwabya thukine bakolha-nabi, Kristo mwathuholera.” (Abanya Roma 5:8) Olhwanzo lhwa Nyamuhanga olhuthe mw’eriyikukumirira mulhwaleka iniayira eky’akakolera abandu abathe banga thoka eriyilhwako, abatseke, kandi ab’ekibi. Sihali ekya thwakolha erikanganibwa olhwanzo olho, kandi sithwangathoka erimuthuha. Sihali kindi kihembo ekyabirithakangania ndeke olhwanzo ng’eki.

Ebindi bihembo bikanabya by’obughuli busana n’akaghalha akalyahirawaho n’oyulyaha ekihembo. Omundu erithwamu eriyihako ekindu ky’obughuli neryo iniathuhakyo, ekihembo ekyo thukakyanza kutsibu, busana n’akaghalha ako.

Nyamuhanga mwathuha ‘Mughalha wiwe, ekyusa kiwe.’ (Yoane 3:16) Sihali owundi oyo anzire kutsibu ng’oyo athuha. Omwa buthaghanzika bw’emyaka Nyamuhanga inianemuhangika, Yesu iniakakolha haghuma nayu kandi abya “n’obutseme bwiwe obuli kiro.” (Emisyo 8:30) Yesu ni Mughalha “mwanze” kandi “ni kisosekanio kya Nyamuhanga oyuthelholhawako.” (Abanya Kolosai 1:13-15) Sihali ababirithabya n’obughuma obuli ng’obuli na Nyamuhanga na Yesu.

Nomwabine bithya, “Nyamuhanga mwathabalya Omughalha wiwe-wiwe.” (Abanya Roma 8:32) Yehova Nyamuhanga mwahayo mughalha wiwe oyo anzire kutsibu busana nethu. Sihali kindi kihembo ekikakanganaya eriyihayo ng’eri.

Ebindi bihembo ni by’obughuli busana n’erihika okwa kiyithawa ekyonyine-nyine eky’oyulyahebawa, kandi ekilhue kikayithaghisibwa omwa bya lhuba. Ng’eky’erileberyako, wanga sima bungahi omundu oyulyayihayo erikuthuhira omubatsi owakendi balya engebe yawu kandi iwulhue isiwanga thoka erithuhagho! Omwa kwenene ekihembo ekyo, ikikendibya ky’obughuli, kwa bithe?

‘Kandi ngoku abandu bosi ba Adamu bakaholha, lithya abosi ababirimathikana na Kristo basyalhubukibwa omwa ngebe.’ (1 Abanya Korinto 15:22) Ithwe eribya ithulhuire omu Adamu, ‘thukaholha,’ sithwanga thoka eribalha eritsimitha ly’amalhwere n’olhuholho kutse erithoka eriyisangania oku Nyamuhanga neryo ithwabya isithuwithe lhubanza embere siwe. Kandi eribya ithuli bandu buyira, sithwanga thoka eriyilhubukya kutse erilhubukya owundi wosi-wosi. E Biblia yikakanganaya kino: “Omundu syangathongolya mulikyabu na kera, syanga thoka eririha Nyamuhanga obughuli bw’engebe yiwe . . . Syangathoka eribana endihi y’engebe eyo, kandi endihi eyo yikabulha.” (Esyonyimbo 49:7, 8) Thukayithagha kutsibu eriwathikibwa kundi ithwe sithwanga thoka ebbeyi y’embanulho. Ithwe ahabw’ethu, sihali ekya thwanga thoka.

Busana n’olhwanzo lhwiwe lhunene, Yehova mwathuthuhira “omubatsi” ogho thukayithagha erithoka eribyaho, nuku erilhabira omu Yesu abosi basyabana engebe.  Embanulho yikaberereraya yithi eki? “Omusasi wa Yesu Omughalha wa Nyamuhanga akathweraya kw’ebibi byosi.” Omo kwenene, eribya n’erikirirya omwa musasi wa Yesu owuthibawa kikathukyungulira olhukyo lhw’erighanyirwa ebibi n’erisyabana engebe y’erikotha. (1 Yoane 1:7; 5:13) Kandi ibbwa embanulho yikendi syakoleraki abanze bethu ababiriholha? “Kusangwa ngoku olhuholho lhwahika busana n’omundu mughuma, lithya erilhubuka oko baholi mulyahika busana n’omundu mughuma [Yesu].”—1 Abanya Korinto 15:21. *

Sihali kindi kihembo ekyabirithakangania ndeke olhwanzo ng’ekihongwa kya Yesu ekyabirihebwa busana n’ow’obuthoki bunene. Kandi sihali wundi oyuwabirithahayo kingaha n’ekya Yehova Nyamuhanga ahayo. Kandi sihali kindi kihembo ekikathughasira ng’ekikaleka ithwabya bwiranda okwa kibi n’olhuholho. Omwa kwenene, sihali kihembo ekyangahika okwa kihembo ky’embanulho.