THUTHOLERE ithwakangania erisima linene busana n’ekihembo kikulhu eki. Yesu mwakania okwa mwatsi oyu omughulhu alhamaya abalhume ikumi ababya bakwire obulhwere obukalire obwabya isi bwanga lhama omwa buthuku obo. Omughuma w’okwa balhume ikumi “mwasubulha iniakapipa Nyamuhanga n’omulenge munene.” Yesu mwabugha athi: “Abosi ikumi, mubathalhamibwa kwehi? Nikwa, abandi mwenda bali hayi kwehi?” (Luka 17:12-17) Thukighaki? Thukibirirawa kutsibu ebibuya eby’abandi bakathukolera.

Embanulho yilengire ekihembo kyosi-kyosi. Ky’ekihembo kikulhu ekya thwabirithahebwa. Neryo kwesi, wanga kangania wuthi ku wukasima ekya Nyamuhanga abirikuha eki?

• Minya ndeke Oyuwahakyo. Sikirimanyisaya kithi obuli mundu akendi syabana engebe y’erikotha busana n’embanulho. Ky’ekyaleka Yesu iniasaba Nyamuhanga athi: ‘Neryo eyi ni ngebe y’erikotha, abandu bakuminye iwe Nyamuhanga mughuma ow’okwenene, n’eriminya Yesu Kristo oyowathuma.’ (Yoane 17:3) Omundu amakubwira athi omundu mulebe mwalhamya engebe yawu iwukine mulere, mbwino si wanganza eriminya bingyi ebihambire oko omundu oyo kandi n’ekyaleka iniakulhamya? Yehova Nyamuhanga oyuwahayo embanulho, anzire iwamuminya ndeke  kandi iwabya munywani wiwe. E Biblia yikabugha yithi: “Muyithunde hakuhi na Nyamuhanga nayu akendi yithunda hakuhi nenyu.”—Yakobo 4:8.

• Ibya n’erikirirya omwa mbanulho. “Oyukikiriraya Mughalha awithe engebe y’erikotha.” (Yoane 3:36) Kikamanyisayaki eribya n’erikirirya? Wutholere iwayira ekya wukakolha; erikirirya omwa mbanulho kikayithaghisaya erihira ebya wikirirye by’omwa mikolere. (Yakobo 2:17) Emikolere eyiri yithi? Ekihembo kikabya kyawu omughulhu wukak’imaya n’erikiligha. Neryo kwesi wutholere iwaligha embanulho. Wuthi? Minya Nyamuhanga nganzire iwabya n’engebe eyiri yithi, kandi kikanganaye. * Saba Nyamuhanga y’ekighanyiro n’obunya muthima-thima obuwene. Wukasaba, ibya n’eriyikethera erighumire ngoku embanulho yikendi syaleka abosi abakikiriraya muyo ibasyabana obuholho, obwiranda, n’obutheya omwa buthuku obukasa!—Abaebrania 11:1.

• Hindana okw’Ibuka Olhuholho lhwa Yesu. Yesu mwatsukisya omukonga owakabya buli mwaka erithwibukya ekihembo ky’embanulho. Eryibuka omukonga oyu, Yesu mwabugha athi: “Mukole muthya erinyibuka.” (Luka 22:19) Abema ba Yehova bakendi sy’ibuka olhuholho lhwa Yesu ebiro 11 Kyakabiri, Okwakani 2017, eryuba lyabirilenga. Endegheka eyi yikendi syaghunza saha nga nguma, mukendi syabya omukania owakasoborera omughaso w’olhuholho lhwa Yesu kandi ngoku lhukaletha emighisa lino n’omwa buthuku obukasa. Omwaka owahwere, abandu nga miliyoni 20 erithimba omwa kihugho kyosi mubahindana okw’ibuka olhuholho lhwa Yesu. Thukakukokaya erisyabya haghuma nethu thukasima ekihembo kikulhu kya Nyamuhanga eki.