Nabuthirawa omwa kyalu e Saxony, omwa kihugho ekyabya kikahulhwamo German Democratic Republic (GDR) okwa buthuku obo. Omw’eka yethu mwabya emibere eyuwene kandi ey’olhwanzo, n’ababuthi baghe mubanyikangirirya esyongeso esyuwene. E GDR kyabya kihugho ekikathabalhawa n’egavumente y’ekikominisiti, neryo abandu bangyi e Saxony isibalilhangira edini ng’ekindu kikulhu. N’okw’ingye, Nyamuhanga syabyaho. Erilhua bulere erihika aho nahikiraya emyaka 18, engebe yaghe yabya yikasondolhwa n’esyongangirirya ibiri hino, ey’erithendikirirya omu Nyamuhanga n’ey’Ekikominisiti.

Busana naki munanza egavumente y’Ekikominisiti? Kundi munanza amalengekania wabu awakabugha athi abandu abosi bingene. N’ekindi, ing’ikirirye indi ebindu bitholere ibyaghabwa omwa bulingirirania, kundi eki kyanga ghunzireho ekitsibu eky’abandi eribya bagaga kutsibu n’abandi eribya banakwa kutsibu. Neryo munayihwerya omwa kithongole ky’eminyethu Abakominisiti. Nabere ngahikya myaka 14, munaghunza buthuku bunene ingane musorokya ebipapura ebikolesibirwe n’erikolha mubyo mw’ebindi bindu, omubiiri owuwanaya ekihugho. Abandu ab’omwa tawuni eya Aue mubatsema kutsibu busana n’omubiiri owanakolha, neryo kyamaleka ab’obuthoki ibanyisima, n’erimba ekihembo, kandi namaminywa. Nomunganabya mulere, munathunga akaghisa ak’eriminya abanya politiki abakulhu-bakulhu omwa GDR. Munayowa ng’angane mukwamirira ebilhubirirwa ebitholere kandi munalhangira obuthuku bwaghe bw’embere nga bukendisyabya ndeke.

Neryo ebindu mubyahinduka lhuba-lhuba. Omwa 1989, olhuhimbo olhwasibwe omwa Berlin Wall mulhwatheribwa kandi n’esyogavumente sy’Ekikominisiti esyabya sikathabalha omwa bihugho by’Ebulhua lyuba bwe Yuropu nasyo musyahwaho. Ebikathikaya mubyabya, ekindi erikolya okwa kindi. Munakiminya ngoku obuthe bulingirirania bwabya bwoswire omwa GDR. Ng’eky’erileberyako, abandu ababya isibalisighika egavumente y’Ekikominisiti babya bakasolholhwa kutsibu. Ekyo mukyathokekana kithi? Ithwe Bakominisiti thwabya thwikirirye thuthi abandu bosi bingene, kwa bithe? Mbwino Ekikominisiti kyamalemwa? Eki mukyaleka ingahangya-hangya kutsibu.

Neryo byabere byabiribya bithya, munahindulha amalengekania n’eritsuka erihira amalengekania w’okw’imba n’erithera ebisasani omwa rangyi. Kundi munasomera okwa sukuru eyikakangiriraya eby’eriimba​—inganawithe ekighendererwa eky’erighenda okwa yunivasite—​munanza eribya mwimbi n’oyukathera ebisasani omwa rangyi. Eryongera okw’ekyo, munalekeraho erighendera okwa by’esyongeso ebyo nakangiriribawa ingakine mulere. Ekyanabya nganzire okwa buthuku obo lyabya iry’eriyitsemesya, imwamuli erithetha abasika bangyi okwa buthuku bughumerere. Aliwe eriimba, erithera ebisasani, n’erithwalha engebe ngoku nganzire mubithaghunzaho erihanga-hangya eryo nabya nalyo. Nibya n’ebisasani ebyo nathera omwa rangyi ibik’itha obuba. Obuthuku obukasa bukendibya buthi? Ekighendererwa ky’engebe ni kyahi?

Omughulhu nabana eby’erisubirya okwa bibulyo ebi, munasweka. Erigholho lighuma ingane okwa sukuru, munikalha n’egurupu y’abanya-sukuru ababya bakakania okwa buthuku obukasa. Omughuma okw’ibo abya akahulhwamo Mandy * kandi ini mughuma w’okwa Bema ba Yehova. Erigholho eryo mwamba amenge awuwene. Mwambwira athi, “Andreas, wamanza eby’erisubirya okwa bibulyo byawu ebihambire okwa ngebe n’obuthuku obukasa, wutholere iwasoma ndeke e Biblia.”

Nomwakine indi munathika-thikira ebyo ambwira aliwe munathwamu erisondya eby’erisubirya omwa Biblia. Mandy mwambwira athi ngasome Danieli esura 2, kandi ebyo nasomamo mwabyanyiswekya. Esura eyi yiri mw’obuminyereri obukakanaya okwa mathabali w’ekihugho kyosi, esyogavumente esyanga bere isinemuthabalha erihika munabwire. Mandy mwanyikangania awandi maminyereri we Biblia awahambire okwa buthuku obukasa. Erighunzerera munatsuka eribana eby’erisubirya okwa bibulyo byaghe! Aliwe nindi oyuwahandika amaminyereri aya, kandi nindi oyuwanga thoka eriminyerera ndeke ebikendi syabya omwa buthuku obukasa? Mbwino ikyanganabya indi Nyamuhanga aneho?

Mandy mwanyiha Abema ba Yehova babiri, iya Horst na mukali wiwe Angelika abanyiwathikaya eriyitheghererya Ekinywe kya Nyamuhanga kya ndeke. Munalhuaho inakilhangira ngoku Abema ba Yehova n’ibo basa abakakolesaya kutsibu erina lya Nyamuhanga, Yehova, abakalibwirako abandi. (Esyonyimbo 83:18, NWT; Matayo 6:9) Munaminya ngoku Yehova akaha abandu b’amaha aw’erisyabyaho kera na kera okwa kihugho paradiso. Esyonyimbo 37:9 hakabugha hathi: “Nikwa abakayikethera Omwami Mukulhu [Yehova] basyikala buholho omo kihugho.” Mukyanyitsemesya eriminya ngoku abandu abosi abakalengaho erighendera okwa bihano bya Nyamuhanga eby’esyongeso ebiri omwa Biblia banganabya n’amaha aya.

Aliwe, mukyanyikalira erihindulha emibere yaghe nuku engebe yaghe yihambangane n’ebye Biblia yikabugha. Eribya mwimbi kandi oyukathera ebisasani mukyaleka ingabya mw’emiyiheko, neryo mukyanyiyithaghisya eritsuka erigha eriyikehya. Aliwe kandi sikyabya kyolho erileka emibere y’obutswatswa eyo nabyamo. Ngasima kutsibu kundi Yehova akakanganaya erighumisirizya, olhukogho, n’obuyitheghererya okwa bakalengaho erighendera okwa bye Biblia yikakangiriraya!

Ekikominisiti n’erithendikirirya omu Nyamuhanga by’ebya sondolha engebe yaghe erilhua bulere erihika aho nahikiraya emyaka 18; e Biblia yabiribya iyinemuhindulha engebe yaghe eritsukana n’aho. Ebyo n’igha mubyaghunzaho erihangya-hangya lyaghe busana n’obuthuku bukasa kandi byamaleka ingabya n’ekighendererwa omwa ngebe. Omwa 1993, munabatizibwa ng’Omwema wa Yehova, n’omo mwaka wa 2000, munathahya Tabitha, omwikirirya mulikyethu ow’omuhwa. Thukaghunza buthuku bunene ngoku thwanga thoka eriwathikya abandi erigha e Biblia. Abangyi abathukeghaya bawithe engebe eyiri ng’eya ngabyamo enyuma, eyikosondolhawa n’amalengekania w’Ekikominisiti n’erithendikirirya omu Nyamuhanga. Kikanyitsemesaya kutsibu ingabakangania ngoku banga minya Yehova.

Nabere ngatsuka erihindana haghuma n’Abema ba Yehova, ababuthi baghe mubakukubalha. Aliwe, erilhwiririra naho, babirilhangira ngoku eribya n’Abema ba Yehova kyabirihamba okwa ngebe yaghe omwa nzira eyuwene. Ekikanyitsemesaya kiri kithi, lino bakasoma e Biblia n’erihindana okwa mihindano y’Ekikristayo ey’Abema ba Yehova.

Ingye na Tabitha thutsemire omwa butheke bwethu kundi thukalengaho erighendera okw’ihabulha eriri omwa Biblia ery’abatheke. Ng’eky’erileberyako, erighendera okw’ihabulha eririmu erihambire okwa bathahenie erisighalha bathaleghulha okwa banze babu likalholha embere erighumya obutheke bwethu.​—Abaebrania 13:4.

Singakiwithe eriyilhalikirira omwa ngebe n’erihangya-hangya busana n’obuthuku obukasa. Ngayowa ingali omw’ihiika ly’ekihugho kyosi ery’abaramya balikyethu, erihiika eriri mw’obuholho n’obughuma. Omw’ihiika lino, thukathwalhana nga bingene. Ekyo ky’ekindu ekyanabya inganza eritsuka omwa bulere bwaghe.