MUBYE IMUNATHEGHIRYE!
2022: Omwaka w’Ebitsibu Ebikalire—E Biblia Yikabugha Yithiki?
Omwa mwaka 2022, esyonyonyi, ebitsibu by’esyosente, n’ebitsinduli by’ebyabya bikakanibwako kutsibu omwa makuru. E Biblia nyisa y’eyikasoborera ekyaleka ebyosi ebi ibyabya.
Ebyabya omwa 2022 bikakanganayaki?
Ebyabya omo mwaka owahwere bikongera erikangania ngoku thuli omwa buthuku obo e Biblia yikahulhamo “ebiro by’enyuma-nyuma.” (2 Timoteo 3:1) Obuthuku obo bwatsuka 1914. Lhangira ngoku ebyabya lino-lino bihambene n’ebya Biblia yabya iyabirilhaghulha ebihambire okwa buthuku bwethu:
“Amalhwa.”—Matayo 24:6.
“2022 w’Omwaka Ogho Abanya Yuropu Bathasyaghalhawamo Busana n’Esyonyuhi.” a
Lebaya omwatsi “E Russia Yikathahirira e Ukraine.”
“Esyonzalha.”—Matayo 24:7.
“2022: Omwaka w’Enzalha Nene Kutsibu.” b
Lebaya omwatsi “Olhuhi Lhwe Ukraine Lhwabirileka Ebyalya Ibyabulha omo Kihugho Kyosi.”
“Esyondwalha.”—Luka 21:11.
“Erithasyabuthuka ly’epoliyo, kuthya n’erikanyirira kutsibu ly’obulhwere bw’ebiturughunyu n’ekorona (COVID-19), mukyakanganirye ngoku amalhwere awakasighalira akalire kutsibu kandi ngoku abandu banganalhuaho ibahambwagho.” c
Lebaya omwatsi “Abandu Miliyoni 6 Abamathaholha Busana n’Ekorona.”
“Eriubahirirya.”—Luka 21:11.
Ahathe erithika-thika, obuthuku bw’omwisi obwa 2022 sibwendi syabiriranwa busana n’ebyabya habw’erihinduka-hinduka erikalire ery’obuthuku eryaleka ihabya eritsandalikana linene, esyongumi sy’abandu eriholha, n’esyomiliyoni sy’abandu erithimba omwa kihugho kyosi erihumibwa.” d
Lebaya omwatsi “Ekihuhania Eribya Kinene Kutsibu Omwa Kihugho Kyosi.”
“Erithwa eyisesi [“akatabanguko,” NWT].”—Luka 21:9.
“Abandu eryongera erihithana busana n’ebitsibu by’esyosente, kwilhabirirya ebbeyi y’ebindu eripanda, ekyo mukyalekire eriyisamambulha okwa syogavumente iryayongera kutsibu omwa 2022.” e
Lebaya omwatsi “Ebbeyi y’Ebindu Eripanda Omwa Kihugho Kyosi.”
Mbwino bikendibya bithi omwaka owakasa?
Omo kwenene sihali oyuwanga minya ebikendibya omwa 2023. Ekya thwasi kiri kithi, Obwami bwa Nyamuhanga, kutse egavumente ey’elhubulha yikisiya iyayira ekya yikakolha busana n’ekihugho. (Danieli 2:44) Egavumente eyo yikendi ghunzaho ebikaleka abandu ibaghalhwa n’erilhangira yithi erisonda lya Nyamuhanga likakoleka okwa kihugho.—Matayo 6:9, 10.
Thukabahira mw’omuhwa w’erighendera okw’ihabulha lya Yesu Kristo n’eribya ‘imunatheghirye’ erilhangira ngoku ebikabya omwa kihugho bikaberereraya amaminyereri we Biblia. (Mariko 13:37) Kisi thuhikeko erithoka eriminya bingyi e Biblia nga yanga kuwathikya yithi lino kandi ngoku yangaha iwe n’ab’eka yawu amaha aw’okwenene aw’obuthuku obukasa.
a AP News, “2022 w’Omwaka Ogho Abanya Yuropu Bathasyaghalhawamo Busana n’Esyonyuhi,” byabughawa na Jill Lawless, Okwerikuminibiri 8, 2022.
b World Food Programme, “Ebyalya Eribulha Omwa Kihugho Kyosi.”
c JAMA Health Forum, “Eribyaho Omwa Buthuku bw’Ebihunzo—Erilhua Omwa COVID-19 erisuba omwa bulhwere bw’ebiturughunyu, epoliyo, n’Obulhwere X,” byabughawa na Lawrence O. Gostin, JD, Okwomwenda 22, 2022.
d Earth.Org, “Ni Byahi Ebyaleka Ihabya Ekihuhania Kinene Kutsibu Omwa Buthuku bw’Omwisi Obwa 2022?” byabughawa na Martina Igini, Okwerikumi 24, 2022.
e Carnegie Endowment for International Peace, “Abandu Erihithana Kutsibu Busana n’Ebitsibu by’Esyosente Mukyalekire Ihabya Eriyisamambulha Omwa Kihugho Kyosi Omwa 2022,” byabughawa na Thomas Carothers na Benjamin Feldman, Okwerikuminibiri 8, 2022.
You May Also Like
AKALEBERYO
Nyamuhanga Akisiya Iniaghunzaho Eriaghalhwa Lyosi
Thukaminya thuthi ngoku Nyamuhanga akisiya iniaghunzaho eriaghalhwa lyosi n’obuthe bulingirirania?
ESSENTIAL BIBLE TEACHINGS
Obwami bwa Nyamuhanga Niki?
Omw’ithulira liwe eryosi, Obwami bwa Nyamuhanga bwa Yesu akangirirayako kwilhaba owundi mwatsi wosi-wosi. Ahabw’ebighonye bingyi, abigha biwe babirisaba bathi Obwami obo bwase.
ESYONGANGIRIRYA NGULHU-NGULHU ESYE BIBLIA
Obwami bwa Nyamuhanga Bwatsuka Erithabalha 1914
Enyuma w’emyaka eyilhabire omu 2,600, Nyamuhanga mwalhothesya omwami w’amaaka manene y’ekilhotho ekinemubererera lino.
EBITHUHAMBIREKO
Saba Eribungirwa
Kanaya okwa kibulyo ekiseghemere okwa Biblia, kutse minya bingyi ebihambire okwa Bema ba Yehova.
