Omwaka owa 2023 abere akatsuka, ithwe bosi muthwathungire amaha awuwene kutsibu busana nethu ithw’ibene-bine na busana n’esyofamile syethu. Busana naki ithwathunga amaha?

 E Biblia yikaha engulhu yuwene ngoku ebitsibu ebyo thukabana lino ni by’akathuku kake kandi ngoku bikisiya ibyahwaho. Kundi nibya, e Biblia ‘yasakawa busana n’erithukangirirya n’erithuha erihanda omuthima, ithwathoka eribya n’amaha.’—Abanya Roma 15:4.

•   Eriminya bingyi okwa ebya e Biblia yikalhaghanisaya, lebaya omwatsi “Amaha Awuwene aw’Obuthuku Obukasa.”

 Amaha we Biblia anganabya “ng’enaanga ey’engebe” yethu. (Abaebrania 6:19, NWT) Amaha ayo angana leka ithwasika. Angana leka ithwaghumira ebitsibu byethu ebya munabwire, ithwabya n’amalengekania awatholere, n’eribana etseme ya kera na kera. Ng’eky’erileberyako:

•   Minya ngoku amaha we Biblia awathikaya omulhume oyuwabya akarwanisya ekyaka kinene. Lebaya evidiyo Munatamwa Engebe eya Nabyamu.

•   Lhangira ngoku amaha we Biblia angana thuwathikya thukaholerwa. Lebaya evidiyo Erihumulikania Abali omo Bulighe bw’Eriholerwa.

 Abandu bangyi bawithe amaha w’eribana ebindu ebyuwene, aliwe sibasi amaha wabo ng’anemwendisya bererera. Ebya e Biblia yikalhaghanisaya biri mbaghane. Busana naki? Kundi emilhaghe ye Biblia yikalhua oku Yehova Nyamuhanga a, “oyuthebiha.” (Tito 1:2) Yehova musa yuwithe amaaka w’eriberererya emilhaghe yiwe yosi; angana “kolha ebyo anzire.”—Esyonyimbo 135:5, 6.

 Thukakuhira mw’omuhwa w’erighasirwa omwa maha we Biblia aw’eriyikethera. Wangana ghumya eriyikethera lyawu mugho omw’ilebya ndeke Amasako. (Emibiri 17:11) Yiminyire ekyo omw’ilengesya endegheka y’eryeghesibwa e Biblia ahathe erithuha. Tsuka omwaka owa 2023 iwunawithe amaha awuwene ow’obuthuku obukasa!