“Ingakine mulere, mughalha wethu omukulhu iniakanyaghalhaya kinyamubiri n’erinyitsuma obuli kiro. Nabere nabiringira omwa butheke, nyoko-byalha waghe nayu mwabya akanyaghalya. Iyo na Thatha-byalha waghe ibakanyithwalha ng’omukobe. Munasamo amalengekania w’eriyitha.”—Madhu, a India.

 E World Health Organization yikabugha kithi: “Erinubya abakali likanyirire omwa kihugho kyosi.” Yikabugha yithi hakuhi omukali mughuma okwa basathu akanubibawa kinyamubiri kutse omwa by’emyatsi y’engyingo okwa buthuku bulebe omwa ngebe yabo.

 Eki kyamabya ikyabirikubyako, iwanganayowa wuthi ehosi-hosi eyo wanga ghenda wukendi bwirwa ebinywe by’ebitsumi kutse erinubibwa kinyamubiri kutse omwa by’emyatsi y’engyingo. Busana n’ebikalhwiririra omw’inubya abakali n’eribakolha nabi, iwangana yowa wuthi abandu bangyi bakalengekanaya bathi ‘Abakali si bawithe mughaso.’ Aliwe mbwino kwenene abakali nina b’omughaso embere sya Nyamuhanga?

 Erisako: “[Nyamuhanga] mwahangikabo omulhume n’omukali.”—Enzuko 1:27.

 Ekya kikamanyisaya: Nyamuhanga mwahangika abalhume n’abakali. Anzire abosi ibasikibwa. Eryongera okw’ekyo, anzire omulhume inianza “mukali wiwe ngoku akayanza iyuwene,” butsira erilengaho erimuthabalhako, omw’imubwira ebinywe by’ebitsumi kutse omw’imunubya. (Abanya Efeso 5:33; Abanya Kolosai 3:19) Omo kwenene, eritheya abakali ni ky’omughaso embere sya Nyamuhanga.

 “Ingakine mulere, abahughu baghe ibakanyikolhako eby’obuthundirya. Nabere ngahikya myaka 17, oyunyihere omubiiri mwanyihayira athi namathendi kolha emyatsi y’engyingo nayu iniakendi nyibinga. Lino inganakulire, mwira waghe, ababuthi baghe, n’abataka sibali nyisikaya. Aliwe, erighunzerera nabirigha oku Yehova, b Omuhangiki. Iyo akasikaya abakali. Eki kyabirileka ingaminya ngoku anyanzire kandi ku ngali w’omughaso embere siwe.”—Maria, Argentina.

 Erisako: “Hali omwira oyukamathana n’omundu kwilhaba mughalha wabo.”—Emisyo 18:24.

 Ekya kikamanyisaya: Omunywani w’okwenene akendi kusighika. Wamayowa ikyangana kuwathikya, bwira omundu oyo wukayikethera y’eriyowa lyawu.

 “Munaghunza myaka 20 isindi nathabwira mundu wosi-wosi ngoku nabirikolhwako eby’obuthundirya. Busana n’ekyo, munabulha etseme, namahangya-hangya, n’erituntura. Aliwe nabere ingabwira omundu mulebe oyuwabya inianayitheghekire erinyihulikirira y’ebyo nalhabiremo, munathekana ndeke.”—Elif, Türkiye.

 Erisako: “Muhire erihangya-hangya lyenyu lyosi oku Nyamuhanga, kusangwa akabatheghaya [akabatsomana].”—1 Petero 5:7.

 Ekya kikamanyisaya: Omughulhu wukasaba, okwenene kuli kuthi Nyamuhanga akahulikirira. (Esyonyimbo 55:22; 65:2) Kundi akatsomana, iniakendi kuwathikya eriminya ngoku wuli w’omughaso munene.

 “Erigha oku Yehova mukyatsukiraho erinyihumulikania okwa bironda ebyo nabya ngwithe oko muthima. Lino erilhabira omw’isaba nanganabwira Nyamuhanga ebyosi ebiri okwa muthima. Ali ng’omunywani oyukayitheghereraya ndeke eriyowa lyaghe.”—Ana, Belize.

 Erisako: “Omwami Mukulhu . . . wasyowa erilhaka ly’esyongubi, n’abakanubibawa, neryo abandu abakaholha sibabye bakubahya kandi.”—Esyonyimbo 10:17, 18.

 Ekya kikamanyisaya: Nyamuhanga akisiya iniaghunzaho obuthe bulingirirania obwosi, imwamune eriaghalya abakali n’eribanubya.

 “Eriminya ngoku Yehova akisiya iniaghunzaho eriaghalibwa ly’abakali n’abasika kyabiribya ng’omubatsi owakanyihumulikanaya. Kyabirileka ingathekana omwa bulengekania.”—Roberta, Mexico.

 Eriminya bingyi ngoku e Biblia yikaha amaha, ekyangaleka iwayikethera emilhaghe yayo, kandi ngoku munabwire Abema ba Yehova bakakolesaya e Biblia eriwathikya abandi, saba eribungirwa.

 Kimaya omwatsi ono omwa mulingo owangana printingwa.