Ngoku olhuhi olhuli omwa Ukraine lhwabirikangania, abakulhu bangyi b’amadini w’Ekikristayo banemuhira omwa bangyi mw’omuhwa ow’eribya n’olhuhandi omwa lhuhe. Lebaya ngoku abandi bakulhu b’edini bakasighika olhuhandi lhughuma n’abandi ibasighika olhundi:

•   “Erisikya linene kutsibu n’erisima okw’abalhwi bethu bosi abakalhwira ekihugho kyabu ekye Ukraine . . . Emithima yethu, emisabe yethu eyikalhua okwa mithima, n’erisighika lyethu bine nenyu mughulhu wosi.”—Metropolitan Epiphanius I owe Kyiv, ngoku kyahulhukibawa omwa The Jerusalem Post, Okwakasathu 16, 2022.

•   “Omukulhu w’edini y’Abaothodokisi owe Russia mwakolha emisa Kyasande busana n’abasirikali be Russia omwa abahirira mw’omuhwa athi balhwire ekihugho kyabu ‘kundi Abarussia basa babanga thoka’ e Moscow yinemulholha embere n’amalhwa omwa Ukraine.”—Reuters, Okwakani 3, 2022.

 Abakristayo banatholere ibasangira omwa lhuhi? E Biblia yikabugha yithiki?

 E Biblia yikakanganaya ngoku abakakwama Yesu Kristo omwa kwenene sibali sangira omwa syonyuhi.

•   “Subaya omuyali w’omwa lhubo lhwawu; kusangwa abosi abakawatha oko muyali, basyahera omo muyali.”—Matayo 26:52.

   Mbwino omundu oyukasighika olhuhi kutse oyukasangira omwa lhuhi kwenene-kwenene anemughendera okwa binywe bya Yesu ebyo?

•   “Ngabaha ekihano kihya-kihya nyithi, mwanzane. Ngoku nabiribanza, nenyu mwanzane muthya. Neryo mwamabya n’olhwanzo, omughuma busana n’owundi, abandu abosi basyaminya ko muli bigha baghe.”—Yoane 13:34, 35.

   Mbwino omundu oyukasighika olhuhi anemukangania olhwanzo olhwa Yesu abugha athi lhwanga minyikerye abigha biwe, ni bugha ambu abamukwamire?

 Eriminya bingyi, soma omwatsi “Ekikristayo Kikanasighika Olhuhi?”

 Mbwino nina ky’amenge Abakristayo eriyitheya okw’isangira omwa syonyuhi munabwire? Ee. E Biblia muyabugha yithi omwa buthuku bwethu, obuthuku obukahulhawamo “ebiro by’enyuma,” hangabere abandu erilhua omwa bihanda byosi abathendi ‘syaswaghesibwa amalhwa,’ erikwamana n’esyongangirirya sya Yesu.—Isaya 2:2, 4.

•   Eriminya bingyi soma emyatsi eyikabera eryasira omwa Kaleberyo eyiwithe omuthwe “Nyamuhanga Akalhangira Athi Esyonyuhi?”

 Omwa buthuku obuthe bwahali Yehova, a “Nyamuhanga omwinye obuholho,” akendi kolesya egavumente yiwe y’elhubulha erilhamya abandu “okw’inubya n’obwagha.”—Abanya Filipi 4:9; Esyonyimbo 72:14.

•   Erilhangira ng’akendi syakikolha athi, lebaya evidiyo Obwami bwa Nyamuhanga Niki?