MUBYE IMUNATHEGHIRYE!
Abandu Miliyoni 6 Abamathaholha Busana n’Ekorona—E Biblia Yikabugha Yithiki?
Erikwamana n’ekithongole World Health Organization (WHO), ahathwahikira biro 23 Okwakathano, 2022, abandu miliyoni 6.27 babya ibabamathaholha busana n’obulhwere bw’ekorona (COVID-19). Aliwe, omwa makuru awahulhukibawa biro 5 Okwakathano, 2022, ekithongole eki mukyalhangira omughanzo oyu ini munene okw’aho. Mukyabuwa indi omwa 2020 na 2021, “omughanzo wosi ow’abamathaholha busana n’ekihunzo ky’ekorona . . . ahikire hakuhi miliyoni 14.9.” Mbwino e Biblia yikanabugha ekyosi-kyosi okwa bindu ebik’itha obulighe ng’ebi?
E Biblia muyalhaghulha ku hakendi syabya esyondwalha esik’itha
Yesu mwabugha athi hakendi syabya ebihunzo ‘by’esyondwalha,’ omwa buthuku obukahulhawamo ‘ebiro by’enyuma-nyuma.’—Luka 21:11; 2 Timoteo 3:1.
Obuminyereri bwa Yesu obo bunemubererera munabwire. Eriminya bingyi, soma omwatsi “Ekiminyikalho ‘ky’Ebiro by’Enyuma-nyuma’ ky’Ekyahi?”
E Biblia yikahumulikanaya
“Nyamuhanga w’erikirania lyosi . . . yukathukiranaya omo malighe wethu wosi.”—2 Abanya Korinto 1:3, 4.
Abanene ababiriholerwa abanze babu babiribana erihumulikanibwa omo mwatsi we Biblia. Minya bingyi omo mwatsi “Obulighe bw’Eriholerwa—Ngoku Wanga Ghumirabo Munabwire” na “Obuwathikya Obuwene Kutsibu Busana n’Abali Omwa Bulighe bw’Eriholerwa.”
E Biblia yikabisaulha ekikendi syaghunziraho ighuma ekitsibu eki
“Obwami bwawu bwase. Erisonda lyawu liyirawe, omo kihugho ngoku liri omo lhubulha.”—Matayo 6:10.
Omwa buthuku obuthe bwa haali “Obwami bwa Nyamuhanga” bukendi lhangira buthi “sihali endulhani eyikendi syabugha yithi, Nyilhwere.” (Mariko 1:14, 15; Isaya 33:24) Lebaya evidiyo Obwami bwa Nyamuhanga Niki? eriminya bingyi oko buthabali bw’elhubulha obu n’ekya bukendi syakolha.
Thukakukokaya eriminya bingyi ebihambire okwa kya Biblia yikabugha nuku iwe n’ab’eka yenyu mwanga ghasirwa omw’ihabulha lyayu ery’amenge n’emilhaghe yayu mibuyanga.
