Omo ngyakya ye Kyabbalaza, biro 10 Okwerikumi, 2022, esyobbomu sye Russia musyaswirirye esyotawuni nyingyi sy’omwa Ukraine ng’enzira y’erithuhulya busana n’erithulika linene ery’ebbomu eryabya biro bibiri enyuma, eryatsandaya ekilhalho ekikayunga e Crimea ne Russia. Ebi mubyabere abanya politiki ibamabiribugha bathi e Harmagedoni yanganabya.

•   ‘Sithuli thwathayikengemerera e Harmagedoni ya thuthya erilhua aha John F. Kennedy akathabera prezidenti we U.S. n’aho ekitsibu ky’ebbomu ye Cuba kikathabera. Sikyangabya indi ikyathokekana erikolesya esyombundu sy’eniuklia neryo imuthayisanga okwa Harmagedoni.”—Prezidenti we U.S. Joe Biden, Okwerikumi 6, 2022.

•   “Ngaligha ngoku eyi ni Harmagedoni, ekindu ekikendi hira ekihugho kyosi ky’omwa kabi.”—Prezidendi we Ukraine Volodymyr Zelensky, akabulibwa oko byangalhua omw’ikolesya esyombundu sy’eniuklia, BBC News, Okwerikumi 8, 2022.

 Mbwino erikolesya esyombundu sy’eniuklia kikendi leka ihabya e Harmagedoni? E Biblia yikabugha yithiki?

 Eyihi. Ekinywe “Harmagedoni” kikabanika murundi mughuma musa omwa Biblia omwa Eribisulirwa 16:16. Sikiri manyisaya olhuhi olhuli ahakathi-kathi k’ekihugho n’ekindi kihugho aliwe ni lhuhi ahakathi-kathi ka Nyamuhanga ‘n’abami b’ekihugho kyosi.’ (Eribisulirwa 16:14) Nyamuhanga akendi syakolesya olhuhi lhwe Harmagedoni erighunzaho obuthabali bw’abandu.—Danieli 2:44.

 Eriminya bingyi e Harmagedoni nga yikahamba yithi okwa kihugho, soma omwatsi Olhuhi Lhwe Harmagedoni Niki?

 Eyihi. Nomwakine indi abathabali b’ekihugho bangana syakolesaya esyombundu sy’eniuklia, Nyamuhanga syendi syaligha ekihugho kikahwerekerera. E Biblia yikabugha yithi:

•   “Ekihugho kikakotha.”—Omugambuli 1:4.

•   “Abathunganene basyikalha omo kihugho mwa buholho, n’erisighalyakyo kera na kera.”—Esyonyimbo 37:29.

 Aliwe, amaminyereri we Biblia n’ebikabya lino bikakanganaya ngoku thuli hakuhi n’embinduka nene kutsibu okwa kihugho. (Matayo 24:3-7; 2 Timoteo 3:1-5) Minya e Biblia nga yikabugha yithiki busana n’obuthuku obukasa erilhabira omwa ndegheka yethu ey’eryeghesibwa e Biblia omw’ikanirania ahathe erithuha.