Abathabali b’ekihugho n’ebithongole eby’ekihugho kyosi sibali bathathoka erilethaho obuholho. Munabwire, habiribya esyonyuhi nyingyi kwilhaba aho Olhuhi lhw’Ekihugho Kyosi Olhwakabiri lhukathabera. Hakuhi abandu esyobbiliyoni ibiri—abangine na kimu kyakani ky’omughanzo w’abandu abali omwa kihugho kyosi—bikere omwa myanya eyiri mw’esyonyuhi ng’esyo.

 Busana naki abandu sibanga lethaho obuholho? E Biblia yikabugha yithiki?

1.  1. Abandu bakakanganaya emibere eyikaleka ibalemwa nibya n’erilengaho erihiraho obuholho. E Biblia muyalhaghulha yithi omwa buthuku bwethu, ‘abandu bangabere abakayanza, erianza ebindu, abakayipipa, abakayiheka, . . . abathesoma, . . . isibeghanyira, . . ab’omwagha, abatsibu, . . . abathetsomana, obw’omuthwe abimbire.”—2 Timoteo 3:2-4.

2.  2. Abandu abosi haghuma kutse obuli mundu ahabwiwe sibanga thoka erighunzaho ebitsibu byabo ahathe obuwathikya bw’Omuhangiki, Yehova a Nyamuhanga. E Biblia yikabisulha yithi “siriri omwisi w’omundu oyukalendera erisondolha olhughendo lhwiwe.”—Yeremia 10:23.

3.  3. Ekihugho kiri omwa busondoli bw’omuthabali w’amaaka kandi omubi, Sitani Diabolo, “oyukatheba ekihugho kyosi.” (Eribisulirwa 12:9) Ekihugho kyamalholha embere eribya “omwa buthoki bw’omubi oyo,” hakendibya ihane esyonyuhi n’ehitabanguko.—1 Yoane 5:19.

 E Biblia yikathukakasaya ngoku hakendisyabya obuholho, butsira omwa kaghalha k’abandu, aliwe omwa kaghalha ka Nyamuhanga.

•   “‘Kusangwa Omwami Mukulhu athi, nyinasi amalengekania agho ngalengekanaya busana nenyu, amalengekania w’obuholho, si w’ekibi, eribaha amaha oko biro byenyu ebikasa.’”—Yeremia 29:11.

 Nyamuhanga akendi syaberererya athi omulhaghe oyo? “Nyamuhanga oyukathuha obuholho, asyahinolera Sitani.” (Abanya Roma 16:20) Nyamuhanga akendisya kolesya egavumente y’elhubulha, eyo e Biblia yikahulha mwa “Obwami bwa Nyamuhanga,” erilethaho obuholho omwa kihugho kyosi. (Luka 4:43) Omwa buthabali bwa Yesu Kristo, omwami w’Obwami obo, abandu bakendi sy’eghesibwa ngoku bangabya omwa buholho.—Isaya 9:6, 7.

•   Eriminya bingyi, soma omwatsi “Obwami bwa Nyamuhanga Bukendi Syakolhaki?”