Omwa kihugho kyosi ebihugho bingyi bighabulene omwa by’ekipolitiki. Erikwamana n’erisekulya ery’ekithongole kye Pew Research Center erya 2022, “pasenti 65 ey’abandu abakulire ab’omwa bihugho 19 ebya kolhawamo erisekulya bakabugha bathi hali erithendi yitheghererania linene kutsibu omwa bandu ab’omwa bihugho byabu abakasighika ebyama muthina-muthina eby’ekipolitiki.”

 Wune walhangira ngoku erighabulhana omwa by’ekipolitiki linemukanyirira ewenyu? Busana naki ikyabya kithya? Mbwino hane eky’erikolha? Thalengekania okwa ekya Biblia yikabugha.

 E Biblia muyalhaghulha yithi omwa buthuku bwethu, obukahulhawamo ‘ebiro by’enyuma-nyuma,’ abandu bangyi bangabere n’emibere eyangalekire ikyathathokekana eribya bughuma.

•   “Oko biro by’enyuma-nyuma hasyabya emighulhu eyikalire. Kusangwa abandu basyabya abakayanza, . . . basyabya b’omuthima akalire.”—2 Timoteo 3:1-3.

 Abandu bangyi nomubanemulengaho erikolha kutsibu nuku esyogavumente sithoke, sikyathathokekana. Abandu abawithe amalengekania awathasosene bakabana ikyabiribakalira, nibya ikyathathokekana erikolera haghuma erighunzaho ebitsibu. Ebikalhwiririramu bikakakasya ebye Biblia yabugha kera.

•   “Mundu mughuma awithe obuthoki endatha okwa wundi erimuhuthalya.”—Omugambuli 8:9.

 Nomwabine, e Biblia yikakanganaya ekyangawathikya—egavumenti eyikathabalhawa n’omundu oyuwanga ghunzaho ebitsibu ebikaghalhaya abandu munabwire.

 E Biblia yikaminyikalhaya omusondoli ow’embaghane kandi oyutholere: Yesu Kristo. Yesu awithe amaaka, obuthoki, kandi anzire erilethera abandu abosi b’obughuma n’obuholho.

•   “Abathunganene basyakanya, n’obuholho bwasyakanyirira.”—Esyonyimbo 72:7, NWT.

•   “Ebihanda byosi byasyamukolera!”—Esyonyimbo 72:11.

 Yesu y’omusondoli oyutholere kundi akatsomana kandi anzire eriwathikya abandu, kutsibu-tsibu ababirikolhwa nabi.

•   “Asyalhamya abera abakamulhakira, n’abali n’obwagha, n’abakasighanibawa. Akaghanyira abera, n’abandu bolho-bolho; akalhamaya esyongebe sy’abandu abali n’obwagha. Akalhamayabo okw’inubya n’obwagha.”—Esyonyimbo 72:12-14.

 Igha bingyi ebihambire okwa Bwami bwa Nyamuhanga, egavumente y’elhubulha eyikasondalhawa na Yesu. Minya ngoku wanga ghasirwa n’erisighika omuthabali wabo.

•   Lebaya evidiyo Obwami bwa Nyamuhanga Niki?

•   Soma omwatsi “Obwami Bwa Nyamuhanga Egavumente Eyithe mw’Obulibathangania.”