Ebinywe ebikakanganaya eriponangana, erikolha ebindu ebithuwene ahabw’eripona abandi, amalhwa w’ebihanda, n’esyonyuhi by’oswire omwa makuru.

•   “Busana n’amalhwa awali ahakathi-kathi ke Israeli ne Gaza n’ebyo abawithe emimanire eyikalire bakabugha byabirileka ebinywe by’eriponangana eby’osulha okwa mithahulha y’enganirania.”—The New York Times, Okwerikuminakughuma 15, 2023.

•   “Eritsuka biro 7, Okwerikumi, eriponangana erikalire kandi erik’ubahisaya lyabiriyongera omwa kihugho, ebinywe by’eriponangana n’erikolha ebindu ebithuwene ahabw’eripona abandi.”—Dennis Francis, presidenti owe United Nations General Assembly, Okwerikuminakughuma 3, 2023.

 Ebinywe ebikakanganaya eriponangana, amalhwa, n’esyonyuhi byatsuka kera. Kundi nibya, e Biblia yikakanaya okwa bandu abakera ‘abathegha ebinywe byabu ng’emisoha’ kandi abakulha-kulhanaya esyonyuhi n’amalhwa. (Esyonyimbo 64:3; 120:7; 140:1) Aliwe e Biblia yikasoborera ngoku eriponangana eryo thukalhangira munabwire linawithe kya likamanyisaya.

 E Biblia yikabisulha esyonzumwa ibiri esikaleka eriponangana iryabya lingyi.

1.  1. Muyalhaghulha obuthuku omughulhu “olhwanzo lhw’abangyi lhwasyaholhoka.” (Matayo 24:12) Omwakanya k’erikangania olhwanzo, abandu bangyi banga kanganirye emibere eyanga lekire ihabya eriponangana.—2 Timoteo 3:1-5.

2.  2. Obubi bwa Sitani Diabolo bukaleka ihabya eriponangana lingyi munabwire. E Biblia yikabugha yithi “ekihugho kyosi kiri omwa buthoki bw’omubi.”—1 Yoane 5:19; Eribisulirwa 12:9, 12.

 Aliwe, e Biblia yikabugha yithi Nyamuhanga akisiya iniaghunzaho ebikaleka ihabya eriponangana. N’ekindi, akendi ghunzaho eriaghalhwa lyosi erikasa busana n’eriponangana. E Biblia yikalhaghanisaya yithi:

•   Nyamuhanga “asyasangulha emisonia yosi oko meso wabu. Kandi olhuholho silhwendisyasabyaho, erisusumana kutse eririra, kutse eriaghalhwa. Emyatsi y’erimbere yabirirenga.”—Eribisulirwa 21:4.