E Biblia yikakanaya okwa Harmagedoni, butsira ng’olhuhi olhukendi syalhwirwa omwa kitsweka kighuma kisa, aliwe ng’olhuhi olhukendi syabya omwa kihugho kyosi ahakathi-kathi k’esyogavumente syosi sy’abandu na Nyamuhanga.

•   “Ebi ni birimu by’esyombinga. . . . Bikaya okwa bami b’ekihugho kyosi, erihindaniabo omwa malhwa w’ekiro kinene kya Nyamuhanga Omuthoki w’Ebyosi. . . . Mobahindania abami haghuma ahakahulhawa omwa Kihebrania mwa Harmagedoni.”—Eribisulirwa 16:14, 16.

 Ekinywe “Harmagedoni” kilhuire omwa kinywe ky’Ekihebrania Har Meghid·dohnʹ, ekikamanyisaya “Ekithwe kye Megido.” Megido yabya tawuni omwa Israeli eyakera. Busana n’ekyo, abandi b’ikirirye bathi olhuhi lhwa Harmagedoni lhukendi syalhwirwa omwa Israeli. Aliwe, ekitsweka kye Megiddo kutse ekindi ekitsweka kyosi-kyosi omwa Middle East ni mwanya muke kutsibu indi “bami b’ekihugho kyosi” n’amahe wabu si banga thoka erilhwira mugho.

 Omwatsi owali omwa kitabu ky’Eribisulirwa akanibawa omwa “biminyikalho,” kutse omwa nzira y’omusyo. (Eribisulirwa 1:1, NWT) E Harmagedoni siyiri manyisaya omwanya hene-hene, aliwe emibere y’ekihugho kyosi omo ebihanda byosi bikendi syahindanibwa haghuma omurundi w’erighunzerera bakahakanisya ehamuli ya Nyamuhanga y’erithabalha.—Eribisulirwa 19:11-16, 19-21.