Omwa ripoti ey’Okwomukagha 2022, Prezidenti owe World Bank Group mwabughire athi, “Emingirirye ey’ekihugho kyosi kandi yiri omwa kabi. Lero lino ebbeyi y’ebindu yabiripanda kutsibu n’emingirirye iyabya iyikehire kutsibu.”

 Ekithongole ekya International Monetary Fund kikabugha kithi, “Ebbeyi y’amaghutha w’esyomatoka n’ey’ebyalya yabiripandir’ighuma, ekindu ekyabirihamba nabi kutsibu okwa bandu abali omwa bihugho ebithe yithoka.”

 E Biblia yikathuwathikaya eriyitheghererya ekikaleka ihabya ebitsibu by’emingirirye, ngoku thwanga bighumira, kandi nga hali mahaki aw’erisyabighunziraho ighuma.

•   E Biblia yikahulha omughulhu owathulimo ono mwa “biro by’enyuma-nyuma.”—2 Timoteo 3:1.

•   Yesu mwabugha athi “eryubahirirya,” kutse emyatsi eyikitha obuba, yangabere omwa buthuku obu. (Luka 21:11) Abandu bakubaha ebbeyi y’ebindu yikapanda. Abandu bakayilhalikirira busana n’obuthuku obukasa n’eribulha ng’abanemwendi thoka eribana ebiyithawa b’esyofamile syabu.

•   Ekitabu ky’Eribisulirwa mukyabugha kithi ebbeyi y’ebyalya yikendi syapanda okwa buthuku buno. “Munowa owali nga mulenge. . . . Mwabugha athi, ‘Akalengyi k’engano kutse ehilengyi hisathu hy’ekisusu hikendi syaghulha obuhingyi bw’ekiro.’”—Eribisulirwa 6:6, Easy-to-Read Version.

 Eriminya bingyi ebihambire okwa “biro by’enyuma-nyuma” n’obuminyereri obuli omwa kitabu ky’Eribisulirwa, lebaya evidiyo Ekihugho Kyabirihinduka Eritsuka 1914 kandi soma omwatsi “Abalhume Bbani Abakaghendaya Esyosabayiri Ni Bahi?”

•   “Kandi basyahimba amanyumba n’erikalha mugho. Basyahera amalima w’ebinyu n’erirya ebighuma byago. Sibendisyahimba, n’owundi akikalha muyo. Sibendi syabiba n’owundi akalyabyo.”—Isaya 65:21, 22.

•   “Engano yibyeho nene omo kihugho; N’ehithwe hyusule mw’ebyalya.”—Esyonyimbo 72:16.

•   “Omwami Mukulhu athi, Lino ngendi hika, kusangwa ab’obwagha bakanubibawa, n’abakendereribawa bakasima eriaghalhwa.”—Esyonyimbo 12:5. a

 Nyamuhanga akisiya iniaghunzaho emibere ey’emingirirye eyithemo obulingirirania, butsira omw’ihanga lighuma lisa aliwe omwa kihugho kyosi. Eriminya nga kikendi syathokekana kithi, soma omwatsi “Kinathokekene Indi Ihabya Obulingirirania Omwa by’Emingirirye Okwa Bosi?”

 Aliwe namunabwire, e Biblia yangana kuwathikya erighumira eripanda ly’ebbeyi y’ebindu. Omwa nziraki? Yiri mw’amenge awakakolha awakakanganaya nga thwanga kolesya thuthi ndeke esyosente. (Emisyo 23:4, 5; Omugambuli 7:12) Eriminya bingyi, soma omwatsi “Theghaya eby’Emingirirye Yawu” na “Ngoku Wangabyaho n’Omughulhu Hali Bike.”