Biro 19 Okwakathano, 2022, abakulhu 75 ab’ekitsumbi ky’endatha mubabwira ab’ekithongole eky’Obughuma bw’Ebihanda Ekya by’Obuyirinde ngoku “ebyalya byabya ibyamabiribulha busana n’ekihunzo ky’ekorona (COVID-19) n’emibere y’obuthuku erihinduka, kandi ngoku ekitsibu ekyo kinemwongera omwa kihugho kyosi busana n’olhuhi olhuli e Ukraine.” Buthuku buke-buke, egazeti eya The Economist muyakangania ngoku “lino ekihugho kinawithe ebitsibu binene, neryo ibbwa kandi busana n’olhuhi olho, abandu bangyi bakendi bulha ebyalya.” E Biblia muyalhaghulha ngoku eribulha ly’ebyalya ng’eryo likendi syabya omwa buthuku bwethu buno, aliwe kandi yikathuha obuwathikya ngoku thwanga ghumira ekitsibu ekyo.

•    Yesu mwalhaghulha athi: ‘Ekihanda kyasyalhwa n’ekindi kihanda, n’obwami bwasyalhwa n’obundi bwami, kandi hasyabya esyonzalha ehandi n’ehandi.’—Matayo 24:7.

•    Ekitabu kye Biblia eky’Eribisulirwa kikakanaya okwa balhume bbani ab’omusyo abakaghendaya syosabayiri ini. Omughuma w’okwa bakaghendaya esyosabayiri esyo akimanira esyonyuhi. Owundi oyumukwamire akimanira enzalha, ni bugha ambu, omughulhu kyanga kalire eribana ebyalya kandi ibyabya by’ebbeyi nene kutsibu. “Munalhangira esabayiri eyikinire, n’oyuwikere kuyo iniawithe omunzani omwa byalha biwe. Munowa owali nga mulenge . . . Athi, ‘Akalengyi kaghuma k’engano kakendi ghulha obuhingyi bw’ekiro! N’othulengyi thusathu thw’ekisusu thukendi ghulha obuhingyi bw’ekiro.’”—Eribisulirwa 6:5, 6, Contemporary English Version.

 Amaminyereri we Biblia aya awahambire okw’ibulha ly’ebyalya anemubererera lino omwa buthuku obwa Biblia yikahulhamo ‘ebiro by’enyumba-nyuma.’ (2 Timoteo 3:1) Eriminya bingyi ebihambire okwa “biro by’enyuma-nyuma” n’abalhume bbani abakaghendaya esyosabayiri abali omw’Ibisulirwa, lebaya evidiyo Ekihugho Kyabirihinduka Eritsuka 1914 kandi soma omwatsi “Abalhume Bbani Abakaghendaya Esyosabayiri Ni Bahi?”

•    E Biblia yiri mw’erihabulha erikakolha eryanga thuwathikya erighumira emibere eyikalire, imwamuli ebbeyi y’ebyalya eripanda kutse nibya n’ebyalya eribulha. Lebaya eby’erileberyako omo mwatsi “Ngoku Wangabyaho n’Omughulhu Hali Bike.”

•    E Biblia kandi yikathuha amaha ngoku emyatsi yikendi syuwana. Yikalhaghanisaya omughulhu ‘engano yasyabya nene omo kihugho’ n’obuli mundu iniabya n’ebyalya bingyi by’erirya. (Esyonyimbo 72:16) Eriminya bingyi ebihambire okwa maha awali omwa Biblia aw’obuthuku obukasa n’ekyangaleka iwayiketheragho, soma omwatsi “Amaha Awuwene aw’Obuthuku Obukasa.”