•   “E China yikaranga yithi omwaka ono muyabwene ekihuhania kinene n’ekyanda ebyo yithe yathabana.”—The Guardian, Okwomwenda 7, 2022.

•   “Omo myaka ithano eyikwamangene, ebitsweka by’omwa Afirika bikendi bana ekyanda ekikalire.”—UN News, Okwomunani 26, 2022.

•   “E Yuropu eyosi, obulhambu bwayu obulhabire oku kimu-kyakabiri buli omwa kabi k’eribana ekyanda, kandi eki ikikendibya iky’ekyanda ekithe kyathabya omo myaka 500.”—BBC News, Okwomunani 23, 2022.

 Ababisomerere bangyi bakalengekanaya bathi ebyanda ng’ebyo bikendi lholha embere nibya ibyakalha kutsibu. Hane amaha wosi-wosi obuthuku bw’embere erisyuwana ? E Biblia yikabugha yithiki?

 E Biblia muyalhaghulha ebikendi syabya omwa buthuku bwethu yithi:

•   ‘Hasyabya enzalha.’—Luka 21:11.

 Mughulhu mungyi ekyanda kikaleka ebyalya ibyabulha. Eribulha ly’ebyalya ng’eryo, n’eriaghalhwa n’olhuholho ebyo likaletha, kikaberereraya obuminyereri bwe Biblia.—Eribisulirwa 6:6, 8.

 E Biblia yikakanganaya enzumwa ngulhu eyikaleka ebyanda ibyongera erikalha. Yikabugha yithi:

•   ‘Siriri omw’isi w’omundu oyukalendera erisondolha olhughendo lhwiwe.’—Yeremia 10:23.

 Eki kikamanyisaya kithi abandu sibangathoka “erisondolha olhughendo” lhwabu, kutse eriyithabalha. Erithwamu lyabu libi mughulhu mungyi likaleka ihabya ebyanda n’amaghetse eribulha.

•   Abanya sayansi abanene bakaligha bathi ebya bandu bakakolha bya bilekire ihabya erihuhana ly’ekihugho, n’ekyabirilhwiririramu ly’eryongera ly’ebyanda omwa kihugho kyosi.

•   Omururu n’ebilhaghiro ebikahirawaho buthalengekania bikaleka ihabya erithema emisithu, eritsandibwa ly’ekihugho, n’erikolesya nabi eby’obuhangwa, ibyahira ebikaletha amaghetse by’omwa kabi.

 Nomwabine, e Biblia yikaha amaha.

 E Biblia yikalhaghanisaya yithi Nyamuhanga akendi syaghunzaho ekitsibu ky’amaghetse. Athi?

1.  1. Nyamuhanga akendi ‘syathoghothya abandu abakatsandaya ekihugho.’ (Eribisulirwa 11:18) Akendi syalhusyaho ekindu ekikaleka amaghetse iniabulha—abandu babi ab’omururu, abakakolha ebindu ebikatsandaya obuhangwa.—2 Timoteo 3:1, 2.

2.  2. ‘Ekithaka kyumire kyasyabya kitsinga ky’amaghetse.’ (Isaya 35:1, 6, 7) Nyamuhanga akendi syasuba-subania ebyabiritsandibwa busana n’ebyanda n’erisubya ekihugho kino mwa paradiso eyiri mw’amaghetse ndeke.

3.  3. ‘Wukalembera ekithaka, wukathuma embulha; wukaboghayakyo kutsibu.’ (Esyonyimbo 65:9) Omw’itsumulha lya Nyamuhanga, ekihugho kikendi syusulha mw’ebyalya ebyuwene n’amaghetse awuwene okwa bosi.