Thalengekania okwa bino ebikabughawa n’abakulhu-bakulhu b’edini ab’amani erikwamana n’olhuhi olhuli e Ukraine:

•   “Omukulhu-kulhu w’edini y’Abaotodoksi e Russia, ya Kirill, syali ayira eky’akabugha okwa kya Russia eriyathahirira ekindi kihugho. . . . Edini yiwe yabirilholha embere eritsatsanga amabehi oku Ukraine, awabirileka Putin iniabugha athi amalhwa ayo atholere.”—EUobserver, Okwakasathu 7, 2022.

•   “Padiri Mukulhu ya Kirill . . . abirilhwira kutsibu okwa kya Russia eribambira e Ukraine omw’ibugha athi amalhwa aya ni kighuma ky’okwa bikarwanisaya ekibi.”—AP News, Okwakasathu 8, 2022.

•   “Omukulhu w’edini y’Abaotodoksi e Ukraine, ya Epiphanius I owe Kyiv, Kyabbalaza mwakanatsumulha abandu biwe athi ‘murwanisaye Abarussia abakathuthahirira’ . . . Kandi mwabughire athi eritha abasirikali be Russia si kibi.”—Jerusalem Post, Okwakasathu 16, 2022.

•   “Ithwe [ng’Akathunga k’Amakanisa we Ukraine n’Ebithongole by’Edini (UCCRO)] thukasighika amahe we Ukraine n’abosi abakasighikagho, thukabatsumulha omw’ilhwira oku Ukraine, kandi thukabasabira.”—Byabughawa na UCCRO, a Okwakabiri 24, 2022.

 Wukalengekanaya wuthiki? Amadini awakabugha athi akwamire Yesu Kristo anatholere iniahira omwa bandu babu mw’omuhwa ow’eringira omwa lhuhi? E Biblia yikabugha yithiki?

Ngoku amadini abiriyingirya omo lhuhi erilhua kera

 Ebya kera byabirikangania ngoku amadini abiribya iniane muligha, erisighika, kutse nibya erikulha-kulhania amalhwa kandi iniane muyilingirirania ng’awakalethaho obuholho. Ahabw’emyaka mingyi, Abema ba Yehova babiribisulha obuthebya bw’amadini ng’ayo. Thalebya eby’erileberyako bike ebiri omwa bitabu byethu.

•   Omwatsi owa “Amalhwa w’Amadini—‘Amabehi w’Akabi’” akakanganaya ngoku Edini y’Ekikatuliki y’eyaleka ihabya erithindwa ly’abandu banene omwa lina lya Nyamuhanga na Kristo.

•   Omwatsi owa “Edini y’Ekikatuliki Omwa Afirika” akaha eky’erileberyako ngoku edini yalemawa erikakirya amalhwa w’esyonganda, nibya n’erithindwa ly’abandu banene.

•   Emyatsi “Edini y’ey’Eritsweba?,” “Olhukwamirwa lhw’Edini Omwa Syonyuhi sy’Abandu,” na “Edini Yikabya n’Olhuhandi” yikasoborera ngoku abakulhu b’Ekikatuliki, ab’Ekiotodoksi, n’ab’Ekipira babirisighika esyombandi syosi ibiri esy’esyonyuhi nyingyi.

Amadini w’Ekikristayo anatholere iniasighika olhuhi?

 Ekya Yesu akangiriraya: “Wanze mulikyenyu ngoku wuyanzire.” (Matayo 22:39) “Mwanze esyonzighu syenyu.”—Matayo 5:44-47.

 Ekya Yesu abugha: “Obwami bwaghe si bw’ekihugho kino. Kumbe obwami bwaghe bulhue bw’ekihugho kino, kumbe abaghombe baghe bangalhwa isinangaghotherwa.” (Yoane 18:36) “Abosi abakawatha oko muyali, basyahera omo omuyali.”—Matayo 26:47-52.

 Thalengekania oku kino: Abakristayo bamathabya nibya isibabya b’erilhwa eritheya Yesu, in’ithwe thwangalhwa habw’enzumwa yosi-yosi? Soma omwatsi “Ekikristayo Kikanasighika Olhuhi?” erilebya ngoku Abakristayo abathaleghulha ab’erimbere bakwama eky’erileberyako kya Yesu n’esyongangirirya siwe.

Ni kyahi ekikendi syabya okwa madini awakasighika esyonyuhi?

 E Biblia yikakangiriraya yithi Nyamuhanga akaghana amadini awakayambahulha athi ak’imanira Yesu aliwe iniathakwama esyongangirirya siwe.—Matayo 7:21-23; Tito 1:16.

•   Ekitabu ky’Eribisulirwa kikakanganaya kithi Nyamuhanga akalhangira amadini ayo iniali kw’olhubanza lhw’omusasi “w’abosi abithawa omwa kihugho.” (Eribisulirwa 18:21, 24) Eriminya bingyi, soma omwatsi “E Babeli Mukulhu Niki?”

•   Yesu mwakangania ngoku amadini wosi agho Nyamuhanga abirighana akendi syathoghothibwa busana n’emibiiri yagho mibi, ngoku omuthi mubi awakahethaya ebighuma bibi “akakondawa n’erighuswa omwa muliro.” (Matayo 7:15-20) Soma omwatsi “Enduli y’Amadini w’Amabehi Yiri Hakuhi!” eriminya eki nga kikendi syabya kithi.

Abinye bisasani, erilhua okwa malembe erilholya okwa mali: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images