Omo Kwomusanju 2022, eripoti muyikanakangania ngoku ekihuhania mukyabere kinene kutsibu omwa kihugho kyosi:

•   “Engendo eyakabiri omo kwezi kuno, abakulhu omwa China mubaghusire okwa bandu kw’akasali bathi ekihuhania kikendibya kinene kutsibu omwa syotawuni nga 70.”—Okwomusanju 25, 2022, CNN Wire Service.

•   “Emiriro omwa misithu yinemuyongera omwa Yuropu busana n’ekihuhania eribya kinene.”—Okwomusanju 17, 2022, The Guardian.

•   “Kyasande, ekihuhania mukyabere kinene kutsibu ekithe kyathabya omwa syotawuni sye United States ng’omwa East Coast n’ebitsweka eby’Eyikwa n’eby’okwa lhuhandi lhw’Ebulengera Lyuba ekyanda kinemulholha embere.”—Okwomusanju 24, 2022, The New York Times.

 Ebyosi ebi bikamanyisayaki? Mbwino erighunzerera ekihugho kikendibya isikikitholere eribyako engebe? E Biblia yikabugha yithiki?

 Ee. Ekihuhania ky’omwa kihugho kyosi kikahambangana ndeke n’emyatsi eya e Biblia yalhaghulha eyihambire okwa buthuku bwethu. Ng’eky’erileberyako, Yesu mwalhaghulha athi thwanga lhangire “ebikitha obuba,” kutse “ebithe bya buli kiro n’ebindu ebikubahisaya.” (Luka 21:11; Good News Translation) Ekihuhania eribya kinene kutsibu omwa kihugho kyosi lyabirileka abangyi ibubaha bathi ebya bandu bakakolha bikendi tsandirya ighuma ekihugho.

 Eyihi. Nyamuhanga mwahangika ekihugho eribya bwikalho bw’abandu obwa kera na kera. (Esyonyimbo 115:16; Omugambuli 1:4) Omwakanya k’erileka abandu bakitsandaye, akendi “thoghothya abandu abakatsandaya ekihugho” ngoku anabiriyilhagha.—Eribisulirwa 11:18.

 Thalengekania okwa maminyereri ng’abiri awakakanganaya ebindi ebya Nyamuhanga abirilhagha:

•   “Embwarara n’olhukurutsu byasyatsema, n’embwarara yasyatsanga n’erihulhukya omusanga ng’erikanga.” (Isaya 35:1) Nyamuhanga syendi syalighira ekihugho kikabya mbwarara eyithe yang’ikalhuamo, aliwe akendi syuwania emyanya eyabiritsandibwa.

•   “Wukalembera ekithaka, wukathuma embulha; wukaboghayakyo kutsibu.” (Esyonyimbo 65:9) Omwa buwathikya bwa Yehova, ekihugho kikendi syabya paradiso.

 Eriminya bingyi ebihambire okwa mibere erihinduka ly’obuthuku likaberererayamu obuminyereri bwe Biblia, soma omwatsi “Emibere y’Obuthuku Erihinduka n’Obuthuku Bwethu Obukasa—Ekya Biblia Yikabugha.”

 Eriminya bingyi ebihambire okwa mulhaghe we Biblia ow’eryuwania ekihugho, lebaya omwatsi “Nindi Yuk’ilhamya Ekihugho?”