Abandu omwa kihugho kyosi banemughumira ekihuhania kinene kutsibu n’emibere y’obuthuku eyikalire kutsibu ebithe byathabya. Lebaya esyoripoti hino:

•   “Kuno ko kw’Okwomukagha okwamathabya mw’ekihuhania kinene kutsibu omwa myaka 174 eyamathalhaba aho abandu bakathatsukira erihandika ebihambire okwa mibere y’obuthuku.”—Edipatimente eby’Esuburu eya National Oceanic na Atmospheric Administration, U.S. ey’Okwomusanju 13, 2023.

•   “Lino omwa Italy, Spain, France, Germany ne Poland muli ekihuhania kinene kutsibu ekikalengekanibawa eriyongera erihika okwa lhulengo lhw’ekihuhania diguri 48 [48°C] okwa kizinga kye Sicily ne Sardinia – ekyangabya iky’ekihuhania kinene kutsibu ekyamathabya omwa Yuropu.”—European Space Agency, Okwomusanju 13, 2023.

•   “Ekihugho kikendibya kinemwongera erihuha, thulindirire erilhangira eriyongera ly’embulha nene kutsibu, ey’obuli ndambi, ekikendi lhwiririramo eribogha ly’amaghetse erikalire.”—Stefan Uhlenbrook, director of hydrology, water and cryosphere at the World Meteorological Organization, Okwomusanju 17, 2023.

 Mbwino erikanyirira ly’esyoripoti sy’eritsandira ighuma ly’emibere y’obuthuku sinemukwitha obuba? Thulebaye ekya e Biblia yikabugha ekihambire oko mwatsi mukulhu oyu.

 Ee. Ekihuhania kinene omwa kihugho kyosi n’eyindi miringo y’obuthuku eyikalire yihambene ndeke n’emibere eyo e Biblia yalhaghulha ey’omwa buthuku bwethu. Ng’eky’erileberyako, Yesu mwalhaghulha athi thwangalhangire “ebikubahisaya,” kutse “ebindu ebithe bya buli kiro kandi ebikitha obuba.” (Luka 21:11; Good News Translation) Eriyongera ly’ekihuhania omwa kihugho kyosi lyabirileka abangyi ibubaha bathi abandu bakendi tsandya ekihugho.

 Eyihi. Nyamuhanga mwahangika ekihugho eribya bwikalho bwethu obwa kera na kera; syendi syalighira abandu bakakithoghothya. (Esyonyimbo 115:16; Omugambuli 1:4) Kundi nibya, abiriyilhagha “erithoghothya abandu abakatsandaya ekihugho.”—Eribisulirwa 11:18.

 E Biblia yikakanganaya ngoku Nyamuhanga akendi syatheya ekihugho okwa bitsinduli ebikatsandaya eby’obuhangwa.

•   “[Nyamuhanga] mwabonderya akanyabungu, n’ebisunda mubyabondera.” (Esyonyimbo 107:29) Nyamuhanga awithe amaaka w’erisondolha eby’obuhangwa. Awithe obuthoki bw’erighunzaho ebitsibu by’obuhangwa ebikaleka lino abandu ibaghalhwa busana n’eby’obuthuku ebikalire kutsibu.

•   “Wukalembera ekithaka . . . wukabanira ekihugho ky’engano n’ebyalya.” (Esyonyimbo 65:9) Busana n’eritsumulha lya Nyamuhanga, ekihugho kikendisyabya paradiso.

 Eriminya bingyi ebihambire okwa mulhaghe we Biblia ow’erisuba-subania obuhangwa, lebaya omwatsi “Nindi Yuk’ilhamya Ekihugho?”