Omwa Kwakathano 23, 2023, omukulhu w’eby’amaghalha ow’omwa United States mwaghusire okwa bandu kw’akasali athi emithahulha y’enganirania yinemuhamba nabi okwa balere bangyi.

•   “Nomwabine indi emithahulha y’enganirania yangana ghasira abaana n’abalengwa balebe, hane obwema obulhangirikire obukakanganaya ngoku emithahulha y’enganirania yangana tsandya amaghalha w’obwongo kuthya n’amaghalha w’omubiri aw’abaana n’abalengwa.”—Social Media and Youth Mental Health: The U.S. Surgeon General’s Advisory, 2023.

 Erisekulya erikasoborera esyonzumwa esikaleka ithwabya b’erilengekania okw’ekyo.

•   Abalengwa ab’emyaka 12 erihika 15 “abakaghunza esyosaha nyingyi okwa 3 obuli kiro ibane okwa mithahulha y’enganirania bo babya kutsibu-tsibu omwa kabi k’eribana ebitsibu by’obwongo imwamuli obwongo erighana n’eribya omwa maghaniryo.”

•   Omwa b’emyaka 14, “erikolesya kutsibu emithahulha y’enganirania lyangana leka ihabya eribulha othulho, erikolhwa nabi okwa Intaneti, eripona emisosere yabu y’omubiri, eriyilhangiramo wabbule, n’eribyako ehiminyikalho hinene hy’obwongo erighana. Kandi eki kikabya kutsibu okwa basika kwilhaba abojo.”

 Ababuthi bangatheya bathi abaana babu okwa bitsibu ebi? E Biblia yikaha erihabulha erikakolha.

 Minya ebiri okwa mithahulha y’enganirania. Ng’ababuthi mulengekanaye okwa bitsibu ebyanga lhwiririramo n’erithwamu omwana wenyu ng’anatholere iniakolesya emithahulha y’enganirania kutse eyihi.

•   Omusingyi we Biblia: “Wukangiriraye omwana omwa nzira eyimutholere erilhabamo.”—Emisyo 22:6.

•   Eriminya bingyi, soma omwatsi “Mbwino Omwana Waghe Anakolesaye Emithahulha y’Erikanirania?”

 Wamalighira omwana wawu erikolesya emithahulha y’enganirania, ibya iwunasi ebitsibu ebyanga lhwiririramo kandi minya eby’omwana wawu akakolha okwa Intaneti. Wuthi?

 Theghaya omwana wawu y’okwa byanga mutsandya. Thendeka omwana wawu nuku aminye n’eriyihighulha okwa byanga mutsandya.

•   Omusingyi we Biblia: “Simuleke obusingiri, kutse ebithisirire byosi, kutse obururu, bikahulhwa omo kathi-kathi kenyu. . . . Kandi siritholere muk’ahulha emyatsi eyik’itha esisoni, kutse ebinywe by’obukiru.”​—Abanya Efeso 5:3, 4.

•   Eribana amenge awatholere, soma omwatsi “Erikangirirya Omulengwa Wawu Ngoku Angayitheya Bikahika Okwa Mithahulha y’Erikanirania.”

 Hira h’olhubibi. Ng’eky’erileberyako, hiraho ebilhaghiro ebihambire okwa mughulhu omwana wawu angakoleseryamo emithahulha y’erikanirania kandi habw’obuthuku bungahi.

•   Omusingyi we Biblia: “Muyitheghaye ndeke . . . ng’abandu b’amenge. Simulhabaye ebiro ebi bya buyira.”—Abanya Efeso 5:15, 16.

•   Kolesaya evidiyo y’ehikatuni ehikatherawa Kolesaya Ndeke Emithahulha ye Intaneti ey’Erikanirania eriwathikya omwana wawu eriyitheghererya ekikaleka olhubibi ilhwayithaghisibwa.