MUBYE IMUNATHEGHIRYE!
Abanya Sayansi Babirisegherya Endambi y’Esaha Eyikakanganaya Erihwaho ly’Ekihugho y’Embere—E Biblia Yikabugha Yithiki?
Omwa Kwokubanza 24, 2023, abanya sayansi mubaleghire endambi y’Esaha a y’Erihwaho ly’Ekihugho hakuhi-kuhi n’omwakathi k’ekiro, eyikimanira enduli y’ekihugho.
“Endambi y’Esaha y’Erihwaho ly’Ekihugho” yikakanganaya ekitsibu ekikalire eky’abandu eriyighunzaho. Kyakabiri abanya sayansi mubasegherye endambi eyo hakuhi-kuhi n’omwakathi k’ekiro busana n’ebindu ebikabya ng’olhuhi olhwe Ukraine, eryubaha olhuhi lhw’esyobbomu sy’eniuklia n’emibere y’obuthuku eyikalire ey’ekihugho kyabo.—AFP International Text Wire.
“Kyakabiri, abanya sayansi mubakana bisulha ngoku hamasighalha sekendi 90 ‘Endambi y’Esaha y’Erihwaho ly’Ekihugho’ iyahika omwakathi k’ekiro—obuthuku bw’abandu eriyighunziraho ighuma obwamathabya hakuhi-kuhi ne Harmagedoni.”—ABC News.
“Egurupu y’abanya sayansi ey’ekihugho kyosi muyabughire yithi abandu eriyighunzaho kyangan’ongera kwilhaba kera.”—The Guardian.
Mbwino enduli y’abandu n’ekihugho yiri hakuhi? Mbwino thunatholere ith’ubaha ebikendibya omwa buthuku obukasa? E Biblia yikabugha yithiki?
Ebikendibya omwa buthuku obukasa
Ngoku kiri omwa Biblia, ‘ekihugho kikakotha’ kandi hakendi syabya ihane abandu abakendi syabya kukyo ‘kera na kera.’ (Omugambuli 1:4; Esyonyimbo 37:29) Neryo abandu sibendi thoghothya ekihugho kyethu kutse erileka ikithabya bwikalho bw’abandu.
Nomwakine, e Biblia yikanakanaya okwa nduli. Ng’eky’erileberyako, yikabugha yithi ‘ekihugho kyasyahwaho.’—1 Yoane 2:17.
Eriminya bingyi okwa kya Biblia yikamanyisaya yikakania okwa nduli y’ekihugho, soma omwatsi “Mbwino Enduli y’Ekihugho Yiri Hakuhi? E Apokalipsi Niki?”
Eriminya bingyi okwa kya Biblia yikabugha okwa ndambi eyo ebikayabya omwa kihugho bikendi beramo, soma omwatsi “Ekihugho Kikendihwaho Mughulhu Wahi?”
Eribya ithunawithe amalengekania awatholere
E Biblia yangana thuwathikya eribya ithune n’amalengekania awatholere nomwakine indi omwa kihugho lino mune ebitsibu. Thuthi?
E Biblia yikathuha amenge awuwene. (2 Timoteo 3:16, 17) Ng’eky’erileberyako, soma omwatsi “Ngoku Thwanga Kakirya Erihangya-hangya” erilhangira ngoku e Biblia yanga kuwathikya eribya iwune n’amalengekania awatholere nomuhane ebitsibu.
E Biblia yikaha amaha awuwene busana n’obuthuku obukasa. (Abanya Roma 15:4) Yikasoborera ebyonyine-nyine ebyangabya lino n’omwa buthuku obukasa ebikathuwathikaya erisighalha ithunathekene ebikabya omwa kihugho binemubya.
Iwe erithoka erighasirwa ndeke omwa Biblia, thukakusaba thuthi munabwire wulengesaye endegheka y’eryeghesibwa e Biblia ahathe erithuha.
a “Esaha Eyikakanganaya Erihwaho ly’Ekihugho yikolirwe erighusa okwa bandu kw’asali ngoku thuli hakuhi-kuhi n’erighunzaho ekihugho kyethu omwa by’etekinologia eby’akabi ebya thukayikolera. Esaha eyi ni ky’erileberyako, ekindu ikikathw’ibukaya ebitsibu ebya thutholere ithwakolhako thwamabya b’erilholha embere eribya ithune okwa kihugho.”—Bulletin of the Atomic Scientists.
You May Also Like
E BIBLIA ERISUBIRYA OKWA BIBULYO
Olhuhi Lhwe Harmagedoni Niki?
Ekinywe “Harmagedoni” kikabanika murundi mughuma omwa Biblia, aliwe olhuhi olhwa kikamanyisaya lhukanibweko omwa Masako wosi.
EBITHUHAMBIREKO
Saba Eribungirwa
Kanaya okwa kibulyo ekiseghemere okwa Biblia, kutse minya bingyi ebihambire okwa Bema ba Yehova.
