Engebe y’Erighanira Ighuma Erirya Enyama Yosi-yosi—E Biblia Yikabugha Yithiki?
Erithimba omwa kihugho kyosi abandu bangyi banzire eriminya ebihambire okwa ngebe y’erithendirya enyama yosi-yosi.
“Eky’erithendianza erirya enyama yosi-yosi ni malengekania n’engebe eyo abandu bakabyamo bakanza eriyihighulha okw’ikolha ebisoro bya nabi, eribyaghalya, eribirya, eribana esyongyimba, kutse busana n’ebindi bighendererwa.”—The Vegan Society.
Eryongera okw’ikwira ebisoro by’obulighe, abandi bandu babiribya omwa ngebe y’erithendirya enyama yosi-yosi busana n’erianza eryuwania eby’obuhangwa, amaghalha wabu, kutse busana n’edini.
“Eky’erithendianza erirya enyama yosi-yosi kiri mbaghane okw’ithwamu lyosi-lyosi ery’emirire, kundi mughulhu mungyi abandu bakakilhangira ng’enyikirirya, erithwamu erihambire okwa by’esyongeso, kandi ng’enzira eyo obuli mundu ang’uwaniryamo ekihugho.”—Britannica Academic.
Mbwino eky’erithendianza erirya enyama yosi-yosi y’enzira eyuwene ey’eryuwaniryamo ekihugho omwa buthuku obukasa? E Biblia yikabugha yithiki?
Amalengekania agho Omuhangiki wethu awithe okwa bandu n’ebisoro
E Biblia yikakanganaya ngoku Omuhangiki wethu, Yehova Nyamuhanga, a akalhangira abandu ibalengire kutsibu ebisoro kandi abiriha abandu b’obuthoki bw’eribisondolha. (Enzuko 1:27, 28) Erithwalira haghuma, Nyamuhanga mwalighira abandu erirya ebisoro. (Enzuko 9:3) Nomwabine, syalilighirana n’eky’eriaghalya ebisoro.—Emisyo 12:10.
Erikwamana ne Biblia, n’ithwe thwangathwamu nga thulye enyama kutse eyihi. b Neryo ekya thwangathwamu sikirileka thukabya babuya embere sya Nyamuhanga. (1 Abanya Korinto 8:8) Isihabya oyukatsweba owundi busana n’erithwamu liwe bikahika okwa eky’akendirya.—Abanya Roma 14:3.
Ekikendi syaleka obuthuku obukasa ibuwana
E Biblia yikabisulha ngoku engebe eya thukathwamu eribyamo siyangaghunza omwa kihugho mw’ebitsibu. Ebitsibu bingyi bikasa busana n’eby’ekipolitiki, abandu, n’eby’emingirirye by’ekihugho kino, ebyo abandu bathe bangaghunzaho. E Biblia yikabugha yithi:
“Ekihengemire sikyangathoka erilhungulhwa.”—Omugambuli 1:15.
Omuhangiki wethu akendi syaghunzaho ebitsibu ebya thukabana. Omwa nzira y’omusyo, e Biblia yikasoborera ekya akendi syakolha.
“Neryo munalhangira olhubulha lhuhya-lhuhya n’ekihugho kihya-kihya, kusangwa olhubulha lhw’erimbere n’ekihugho ky’erimbere mubyalenga, n’engetse isiyikiriyo.”—Eribisulirwa 21:1.
Nyamuhanga akendi syasubya “olhubulha lhuhya-lhuhya,” Obwami bwiwe, egavumente y’elhubulha omo mwanya esyogavumente sy’abandu, kutse “olhubulha lhw’erimbere”. Obwami bwiwe bukendi syalhusyaho “ekihugho ky’erimbere,” ababi, neryo ibwathabalha okwa “kihugho kihya-kihya,” kutse abakaghondera obuthabali bwiwe ahathe erikakwa.
Omwa buthabali bw’Obwami bwa Nyamuhanga musa mw’abandu bakendi sy’ighira erikalha buholho n’ebisoro n’erisikya eby’obuhangwa.—Isaya 11:6-9.
