Omwa kihugho kyosi, abandu bangyi banemughumira eribogha ly’amaghetse erikatsandalikanaya. Lebaya esyoripoti hino:

•   “Hakuhi omwa myaka nga 140, etawuni ngulhu ye China muyawiremo embulha nene kutsibu biro bike halibere eribogha ly’amaghetse aw’omuthobero w’obuuli . . . bw’esyoyingyi 29.3 eryabya Kyamukagha erihika Kyakasathu.”—AP News, Okwomunani 2, 2023.

•   “Kyakani kyabya iky’ekiro ekyakabiri eky’ekiyagha kinene ekikahulhawamo Khanun ekyaleka ihabya embulha nene n’ebiyagha ebikalire kutsibu omwa southern Japan, eb’itha abandu babiri. . . . Ekiyagha ekyo kikalengekanibawa eribya ikyanganaleka embulha ey’omuthobero w’obuuli bw’esyomita 0.6 iyawa omwa bithwe bye central Taiwan.”—Deutsche Welle, Okwomunani 3, 2023.

•   “Eribogha ly’amaghetse eryabya okwa wikendi [omwa Nova Scotia] lyabya busana n’embulha nene kutsibu eyawa omwa kitsweka ekye Atlantic Canada enyuma w’emyaka 50.”—BBC News, Okwomusanju 24, 2023.

 E Biblia yikabugha yithiki okwa bindu ng’ebi?

 E Biblia yikabugha yithi thuli omwa mughulhu owakahulhawamo “ebiro by’enyuma-nyuma.” (2 Timoteo 3:1) Yesu mwabugha athi omwa buthuku bwethu, thwanga lhangire ebindu ‘ebikubahiriraya.’ (Luka 21:11) Erihinduka ly’obuthuku lyabirileka ihabya emibere y’obuthuku eyik’ubahisaya eyikongera erikalha eriminyerera, eyikongera eribya mughulhu wosi, n’eryongera erikalha.

 E Biblia yikathubwira yithi ebindu bingyi ebik’ubahisaya ebinemubya okwa kihugho munabwire, omo kwenene bikaleka ithwabya n’amaha. Busana naki? Yesu mwabugha athi: “Omughulhu mukalhangira emyatsi eyi yikahika muminye ko Bwami bwa Nyamuhanga buli hakuhi n’erihika.”—Luka 21:31; Matayo 24:3.

 Ebyathukalhangira bikabya bikakanganaya ngoku Obwami bwa Nyamuhanga bukisiya ibwasondolha eby’obuhangwa eby’okwa kihugho, imwamune n’omuthimbo-thimbo w’amaghetse.—Yobu 36:27, 28; Esyonyimbo 107:29.

 Eriminya bingyi ngoku Obwami bwa Nyamuhanga bukendi syasuba-subania ekihugho, lebaya omwatsi “Nindi Yuk’ilhamya Ekihugho?”