Omo Kwomusanju 2022, ebikorwa ebikathikaya eby’erilhasanga abandu mubyabere erithimba omwa kihugho kyosi:

•   “Erilhaswa ery’omunya politiki oyuwasibwe kutsibu e Japan [oyuwanabere mukulhu w’abaminisita iya Shinzo Abe] mulyatabwire erihanga eryo n’eriswekya ekihugho kyosi, kwilhabirirya kundi erihanga eryo simuli ebikorwa by’obwithi bingyi kandi liwithe ebilhaghiro ebikalire ebihambire okw’ibya n’embundu.”—Okwomusanju 10, 2022, The Japan Times.

•   “Abanya Denmark bakinaswekire enyuma w’omulhume oyuli n’embundu eritha abandu basathu omwa duka e Copenhagen.”—Okwomusanju 4, 2022, Reuters.

•   “E South Africa: Abandu 15 mub’ithibirwe enyuma w’erilhaswa n’abalhume abali n’esyombundu omwa bbara omwa tawuni ye Soweto.”—Okwomusanju 10, 2022, The Guardian.

•   “Omwa kihumuru ky’ewikendi ey’Okwomusanju 4, abandu abalhabire oku 220 mubalhasirwe n’erikwa omwa Amerika.”—Okwomusanju 5, 2022, CBS News.

 Mbwino hane maha wosi-wosi indi eby’obwithi ng’ebi bikendi syahwaho? E Biblia yikabugha yithiki?

 E Biblia yikahulha obuthuku obwa thulimu mwa “ebiro by’enyuma-nyuma,” omughulhu abandu banga kanganirye emibere ey’eribya n’omuthima owakalire, ow’obutsindi, n’obutsururu. (2 Timoteo 3:1, 3) Ebikorwa eby’obutsindi ng’ebi bikaleka abandu ibabya ibane omwa buba. (Luka 21:11) Aliwe, e Biblia yikalhaghanisaya omughulhu eby’obwithi bikendi syahwaho neryo abandu “basyikalha omo mwanya w’obuholho, n’omo h’erikalha ahawathire, n’ah’erilhuhukira ahathulere.” (Isaya 32:18) Eby’obwithi bikendi syahwaho bithi?

 Nyamuhanga akendi syaghunzaho ababi n’erithoghothya ebyuma eby’amalhwa ebyosi.

•   “Ababi basyithirwa ehali erilhua omwa kihugho, n’abaghobya basyamurwa mukyo.”—Emisyo 2:22.

•   “[Nyamuhanga] akakubaya amalhwa omo kihugho kyosi; Akabbunanga amatha, n’eritsutsanga amathumo, kandi akahisaya esyoggali omo muliro!”—Esyonyimbo 46:9.

 Nyamuhanga akendi sy’ihaho ebikaleka ihabya ebikorwa by’obwithi omw’ikangirirya abandu er’ikalha omwa buholho.

•   “Sibyendi syaghalya kutse eriherya omwa kithwa kyaghe kibuyirire kyosi, kusangwa ekihugho kyasyusulha n’eriminya ly’Omwami Mukulhu, ngoku amaghetse akabwagha omwa ngetse.”—Isaya 11:9.

•   Nibya na lino, Nyamuhanga anemukangirirya abandu erithimba omwa kihugho kyosi eriyihighulha okwa by’obwithi n’okw’ikolesya ebyuma by’amalhwa, ‘erihesa emiyali yabo mw’esisuka n’amathumo wabo mwa bisara.’—Mika 4:3.

 Eriminya bingyi ebihambire okwa mulhaghe we Biblia ow’ekihugho ekithemo obuba, soma omwatsi “Kinathokekene Eribyaho Isihali Ekikakwitha Obuba?”

 Eriminya bingyi okwa ky’erighunziraho ighuma eby’obwithi, soma omwatsi “Erighunzerera, Obuholho Okwa Kihugho!”