Biro 24 Okwakathano, 2022, ekindu ekik’itha obulighe ekikakukubalhaya mukyabya omwa tawuni nyike eye Uvalde, Texas, U.S.A. Erikwamana n’egazeti eya The New York Times, “ow’embundu mwithire abaana 19 n’abasomesya babiri . . . okwa sukuru eya Robb Elementary.”

 Eky’obulighe, ebindu ebikakukubalhaya ng’ebi bikanyirire kutsibu. Egazeti eya USA Today muyabugha yithi omwa United States musa, “omwaka owahwere, mumwabere erilhasangwa ly’okwa masukuru ngendo 249—kwilhaba owundi mwaka wosi-wosi eritsuka omwa 1970.”

 Busana naki ebindu ebikathikaya ebi bikabya? Thwanga ghumira thuthi ebindu bibi ng’ebi? Mbwino hane maha wosi-wosi eby’obwithi erisyahwaho? E Biblia yikaha eby’erisubirya.

•    E Biblia yikahulha obuthuku obwa thulimu mwa ‘ebiro by’enyuma-nyuma’ omughulhu abandu bangyi bangabere ‘b’omuthima akalire’ kandi ‘abatsibu,’ erimanyisya indi bangakolire eby’obutsurumi n’eby’obwithi. Abakakanganaya emibere ng’eyo bangayongere ‘eribya babi.’ (2 Timoteo 3:1-5, 13) Eriminya bingyi, soma omwatsi “E Biblia Muyanalhaghulha Emibere Abandu Bakalengekanirayamu n’Erikolha Munabwire?”

 Abangyi bakayibulhaya, ‘Busana naki Nyamuhanga iniathakakirya ebindu bibi ng’erilhasangwa ly’okwa masukuru?’ Eriminya ekya Biblia yikasubiraya, soma omwatsi “Ebindu Bibi Bikabya Okwa Bandu Babuya—Busana Naki?”

•    “Ebyosi ebyasakawa erimbere omo Masako byasakawa busana n’erithukangirirya. Neryo Amasako akathuha eriyitsingirira n’erihanda omuthima, ithwathoka eribya n’amaha.”—Abanya Roma 15:4.

 Emisingyi ye Biblia yangana kuwathikya erighumira ekihugho ky’obutsurumi kino. Eriminya bingyi, lebaya egazeti ye Awake! eyiwithe omuthwe “Obutsurumi Bunemwendi Syahwaho?”

 Amenge ngoku ababuthi banga wathikya abaana babu erighumira esyongulhu esik’itha obuba, soma omwatsi “Amakuru Awak’itha Obuba Ngoku Akahamba oko Baana Bawu.”

•    “Akalhamayabo okw’inubya n’omwagha.”—Esyonyimbo 72:14.

•    “Nabo basyahesa emiyali yabo mw’esisuka, n’amathumo wabo mwa bisara; ekihanda sikyendi syasumba omuyali erilhwa n’ekindi kihanda, kutse sibendi syaswigha amalhwa.”—Mika 4:3.

 Nyamuhanga akendi syakolha ebya bandu bathe bangathoka erikolha. Obwami bwiwe bw’elhubulha bukendi syaghunzaho ebindu byosi by’amalhwa n’erighunzaho obuli mulingo wosi w’obutsurumi. Eriminya bingyi okwa by’Obwami bwa Nyamuhanga bukendi syakolha, soma omwatsi “Omw’Isi sy’Obwami bwa Nyamuhanga ‘Obuholho Bwasyakanya.’”