“Omwa buthuku obuthe bwa haali, emibere y’obuthuku yikayatsandira ighuma. Esyotawuni nene-nene sikayaleretha okwa maghetse. Ekihuhania kinene eky’omwisi. Ebiyagha ebik’itha obuba. Amaghetse eribulha ehosi. Eritsweka ly’esyomiliyoni sy’emiringo y’ebirimwa n’ebisoro. Ebi siyipika-pikira kutse kisehya. Ebyo bya sayansi yikathubwira ebikendi lhwiririra omwa bilhaghiro eby’esyogavumente siwithe lino ebihambire okw’isondya amaghutha w’ebyuma n’amasenyerezi.”—Byabughawa na António Guterres, omuhandiki-mukulhu owa Obughuma bw’Ebihanda (UN), akakania okwa ripoti ey’abakalebereraya erihinduka ly’emibere y’obuthuku abe Intergovernmental Panel on Climate Change eyahulhukibawa ey’Okwakani 4, 2022.

 “Abanya sayansi banemughusa omulenge bathi omo myaka eyikasa ahambere aha, esyopaka esyosi esihikire hakuhi 423 [omwa United States] sikendi hambwako busana n’eritsandalikanibwa ly’emibere ly’obuthuku, kwilhabirirya kundi esyopaka esi sisyang’imanira ekihuhania kinene. Ebik’ubahisaya ebi bik’owika nga ni buminyereri bwe biblia: emiriro n’eribogha ly’amaghetse, esyonzururu eriyeya, esyongetse eribogha n’ekihuhania kinene eky’omwisi.”—“Eribogha Linene ly’Amaghetse omwa Yellowstone, Akaminyikalho k’Emihitho Eyikayasa,” The New York Times, Okwomukagha 15, 2022.

 Mbwino ebitsibu ebihambire okwa by’obuhangwa binemwendi syahwaho? Kyamabya ikwakiri kithya, nindi oyukendi syabighunzaho? Lhangira ekya Biblia yikabugha.

 E Biblia yikabugha yithi Nyamuhanga akendisya ‘thoghothya abandu abakatsandaya ekihugho!’ (Eribisulirwa 11:18) Omulhondo we Biblia oyu akathweghesaya ebindu bisathu:

1.  1. Eby’abandu bakakolha bikendi tsandya ekihugho kya kutsibu.

2.  2. Eritsandibwa ly’ekihugho likendi syahwaho.

3.  3. Nyamuhanga yukendi syaghunzaho ebitsibu by’obuhangwa butsira abandu.

 E Biblia yikabugha yithi “ekihugho kikakotha.” (Omugambuli 1:4) Kikendi syabya ikine mw’abandu.

•   “Abathunganene basyikalha omo kihugho mo buholho, n’erisighalyakyo kera na kera.”—Esyonyimbo 37:29.

 Obubuya bw’ekihugho kyethu obwosi bukendi syasuba-subanibwa.

•   “Embwarara n’olhukurutsu byasyatsema, n’embwarara yasyatsanga n’erihulhukya omusanga ng’erikanga.”—Isaya 35:1.