Mbwino kikabya nga kikakukalira eriminya embaghane eyiri ahakathi-kathi k’ekwenene n’amabehi? Munabwire abandu bakaghendera okw’iyowa lyabu n’ebyo bikirirye omwakanya k’ekwenene. Ng’eky’erileberyako, ekinywe “amabehi,” ekyatsuka erikolesibwa erisoborera emibere eyi, lino-lino mukyakolesibirwe kutsibu. a Kikakolesibawa kutsibu omwa kihugho kyosi munabwire, omo abandu bangyi bikirirye bathi sihali ekwenene.

 Amalengekania aya si mahyaka. Myaka nga 2,000 enyuma, Omuthabali Omuroma ya Ponto Pilato inianathika-thikire, mwabulya Yesu athi: “Omwatsi w’ekwenene niki kwehi?” (Yoane 18:38) Nomwakine indi Pilato mwathalinda Yesu asubiraye, ekibulyo kiwe kyabya kikulhu. E Biblia yikaha eky’erisubirya ekya wanga tsemera, kandi yangana kuwathikya eribana ekwenene omwa kihugho kino ekirimo amabehi.

Mbwino ekwenene yinenaho?

 Ee. E Biblia yikakolesaya ekinywe “ekwenene” yikamanyisya ekihikire kuthya n’ekitholere omwa by’esyongeso. Yikakangiriraya yithi Yehova b Nyamuhanga y’Enzuko y’ekwenene, omw’imwahulhamo “Nyamuhanga w’ekwenene.” (Esyonyimbo 31:5) E Biblia yiri mw’ekwenene eyikalhua oku Nyamuhanga, kandi yikasosekanaya ekwenene eyo n’ekyakakalha, ngoku yangana thusondolha eriyihighulha okwa mabehi awali omwa kihugho.—Esyonyimbo 43:3; Yoane 17:17.

Wangabana wuthi ekwenene?

 Nyamuhanga syanzire thukaligha ekwenene eyiri omwa Biblia kitura muthwe. Omwakanya k’ekyo, akabugha athi thulebayeyo ndeke omw’ikolesya amaaka wethu w’erilengekania butsira eriyikethera eriyowa lyethu. (Abanya Roma 12:1) Anzire ithwamuminya n’erimwanza omw’ikolesya ‘obulengekania bwethu bwosi,’ kandi akathuhiramo omuhwa w’eriyikakasirya ekwenene eya thuk’igha omwa Biblia.—Matayo 22:37, 38; Emibiri 17:11.

Nindi oyuwatsukisaya amabehi?

 E Biblia yikabugha yithi oyuwatsuka eribugha amabehi y’enzighu ya Nyamuhanga, Sitani Diabolo, oyo e Biblia yikahulhamo “ise w’amabehi.” (Yoane 8:44) Mwabwira abandu b’erimbere b’amabehi awahambire oku Nyamuhanga. (Enzuko 3:1-6, 13, 17-19; 5:5) Eritsuka aho, Sitani abirilholha embere erilhalhania amabehi n’eribisa ekwenene eyihambire oku Nyamuhanga.—Eribisulirwa 12:9.

Busana naki amabehi akanyirire kutsibu munabwire?

 Omwa buthuku bwethu, obo e Biblia yikahulhamo “ebiro by’enyuma-nyuma,” Sitani akongera eritheba abandu. Mughulhu mungyi abandu bakabugha amabehi eritheba abandi n’eribaghobako. (2 Timoteo 3:1, 13) Kandi amabehi oswire omwa syodini nyingyi munabwire. Ngoku e Biblia yanalhaghulha ebihambire okwa buthuku bwethu, abandu ‘basyayibanira abakangirirya abakabugha ebinywe by’ekisehya,’ omw’ithwamu ‘eribunukalha okwowa omwatsi w’ekwenene.’—2 Timoteo 4:3, 4.

Busana naki ekwenene ni y’omughaso?

 Ekwenene yikaleka abandu ibayiketherana. Ahathe eriyiketherana, amanywani akathwika n’abandu ibaghabulhana. E Biblia yikabugha yithi Nyamuhanga anzire eriramya lyethu iryaseghemera okwa kwenene. Yikabugha yithi: “Abakamuramaya [Nyamuhanga] batholere ibamuramya omo kirimu n’omo kwenene.” (Yoane 4:24) Erithoka eriminya ekwenene ye Biblia nga yanga kuwathikya yithi eriminyerera amabehi w’amadini n’eriyihighulha kugho, soma emyatsi eyikwamangene eyiwithe omuthwe “Amabehi Awakaleka Nyamuhanga Iniabya nga Syawithe Olhwanzo.”

Busana naki Nyamuhanga anzire ingaminya ekwenene?

 Nyamuhanga anzire iwalhamibwa, kandi wutholere iwaminya ekwenene eyimuhambireko erithoka erilhamibwa. (1 Timoteo 2:4) Wamaminya ebihano bya Nyamuhanga ebihambire okwa kihikire n’ekiwire n’eribighenderako, iwukendibya munywani wiwe w’ahakuhi. (Esyonyimbo 15:1, 2) Erithoka eriwathikya abandu eriminya ekwenene, Nyamuhanga mwathuma Yesu y’okwa kihugho. Nyamuhanga anzire ithwahulikirira esyongangirirya sya Yesu.—Matayo 17:5; Yoane 18:37.

Nyamuhanga anemwendi syaghunzaho amabehi?

 Ee. Nyamuhanga akapona abakaghobera okwa bandi omw’ibatheba. Abiriyilhagha erighunzaho abandu abakathwamu erilholha embere eribugha amabehi. (Esyonyimbo 5:6) Nyamuhanga akendi syabya akakolha ekyo, akendi syabererya n’omulhaghe wiwe ono: “Omunywe w’okwenene asyahanganibwa kera na kera.”—Emisyo 12:19.