E UN muyabughire yithi:

•   Erilhua omwa Okwerikumi 7 erihika Okwerikumi 23, 2023, olhuhi olhuli ahakathi-kathi ke Gaza ne Israeli lhwabiri lhwiririramo erithibwa ly’abandu abalhabire oku 6,400 n’erihuthalibwa ly’abandu 15,200, abangyi omw’ibo byabya bandu ba buli kiro. Eryongera okw’ekyo, esyongumi sy’abandu babirithibitha erilhua omwa miyi yabu.

•   Aho thwahikira Omwa Okwomwenda 24, 2023, abandu ba buli kiro 9,701 babya ibamabirithibwa omwa lhuhi lhwe Russia ne Ukraine, n’abandi 17,748 ibamabirihuthalibwa e Ukraine.

 Ni maha wahi agho e Biblia yikaha abakaghalhawa busana n’olhuhi?

 E Biblia yikabugha yithi Nyamuhanga akendi ‘syakubya amalhwa omwa kihugho kyosi.’ (Esyonyimbo 46:9) Akendi syakolesya egavumente y’elhubulha, kutse Obwami, erisuba omwa mwanya w’esyogavumente syosi sy’abandu. (Danieli 2:44) Obwami bwa Nyamuhanga bukendi syaghunzaho ebitsibu by’abandu.

 Lebaya ebyo Yesu Kristo, Omwami w’Obwami bwa Nyamuhanga akendi syakolha:

•   “Asyalhamya abera abakamulhakira, n’abali n’obwagha, n’abakasighanibawa. Akaghanyira abera, n’abandu bolho-bolho. Akalhamaya esyongebe sy’abandu abali n’obwagha.”—Esyonyimbo 72:12-14.

 Erilhabira omwa Bwami biwe, Nyamuhanga akendi syaghunziraho ighuma erinuba n’eriaghalhwa ebikalhwiririra omwa syonyuhi n’oby’obwithi.

•   “Nikwa asyasangulha emisonia yosi oko meso wabo. Kandi olhuholho silhwendisyaswabyaho, erisusumana kutse eririra, kutse eriaghalhwa. Emyatsi y’erimbere yabirirenga.”—Eribisulirwa 21:4.

 Obwami bwa Nyamuhanga bukisiya ibw’uwania emyatsi. E Biblia muyalhaghulha “engulhu y’amalhwa n’olhombi lhw’amalhwa” ebyo thukalhangira bikabya munabwire. (Matayo 24:6) Ebi n’ebindi ebine mubya bikakanganaya ngoku thuli omwa “biro by’enyuma-nyuma” eby’erithabalha ly’abandu.—2 Timoteo 3:1.