Olhuhi olhuli e Ukraine, kuthya n’ebikalhwiririra omwa mibere y’obuthuku erihinduka, bik’ongera erileka ikyakalha eribana ebyalya omwa kihugho kyosi. Kutsibu-tsibu eki kyabiribya omwa bihugho ebiri mw’obunakwa eyo kikalire abangyi eribana ebyalya ebikaghunza.

•   “Olhuhi, erihinduka ly’obuthuku, eby’erikolesya eripanda ebbeyi n’ebindi bingyi byabirileka ikyakalha erihulhukya n’erihikya ebyalya okwa bandu.”—António Guterres, omuhandiki mukulhu we UN, Okwomusanju 17, 2023.

•   “Abasomire bakalengekanaya bathi e Russia eriyisununulha omwa ndaghane y’erithuma ebyalya omwa bindi bihugho kikendileka ebyalya ibyongera eribulha omwa kihugho kyosi n’erileka ebyalya ibyapanda ebbeyi omwa bihugho ebirimo obunakwa, kwilhabirirya omwa North Africa n’omwa Middle East.”—Atalayar.com, Okwomusanju 23, 2023.

 Minya ebya e Biblia yikabugha okw’ibulha ly’ebyalya n’obuthuku obukasa.

•   Yesu mwalhaghulha athi: “Ekihanda kyasyalhwa n’ekindi kihanda n’obwami bwasyalhwa n’obundi bwami, kandi hasyabya esyonzalha ehandi n’ehandi.”—Matayo 24:7.

•   Ekitabu kye Biblia eky’Eribisulirwa, omwa nzira y’omusyo kikakanaya okwa bakaghendaya esyosabayiri bbani. Omughuma w’okwa bakaghendaya abo ak’imanira esyonyuhi. Oyumukwamire ak’imanira enzalha, obuthuku omughulhu ebyalya bikendi syabya bikahirwa okwa kalengyi n’erighulibwa okwa bbeyi nene kutsibu. “Munalhangira esabayiri eyikinire, n’oyuwikere kuyo iniawithe omunzani omwa byalha biwe. Munowa owali nga mulenge . . . Athi, ‘Akalengyi kaghuma k’engano kakendi ghulha obuhingyi bw’ekiro! N’othulengyi thusathu thw’ekisusu thukendi ghulha obuhingyi bw’ekiro.’”—Eribisulirwa 6:5, 6, Contemporary English Version.

 Amaminyereri we Biblia aya awahambire okw’ibulha ly’ebyalya anemubererera lino omwa buthuku obwa Biblia yikahulhamo ‘ebiro by’enyumba-nyuma.’ (2 Timoteo 3:1) Eriminya bingyi ebihambire okwa “biro by’enyuma-nyuma” n’abalhume bbani abakaghendaya esyosabayiri abali omw’Ibisulirwa, lebaya evidiyo Ekihugho Kyabirihinduka Eritsuka 1914 kandi soma omwatsi “Abalhume Bbani Abakaghendaya Esyosabayiri Ni Bahi?”

•   E Biblia yiri mw’erihabulha erikakolha eryanga thuwathikya erighumira emibere eyikalire, imwamuli ebbeyi y’ebyalya eripanda kutse nibya n’ebyalya eribulha. Lebaya eby’erileberyako birebe omo mwatsi “Ngoku Wangabyaho n’Omughulhu Hali Bike.”

•   E Biblia kandi yikathuha amaha ngoku emyatsi yikendi syuwana. Yikalhaghanisaya omughulhu ‘engano yasyabya nene omo kihugho’ n’obuli mundu iniabya n’ebyalya bingyi by’erirya. (Esyonyimbo 72:16) Eriminya bingyi ebihambire okwa maha awali omwa Biblia aw’obuthuku obukasa n’ekyangaleka iwayiketheragho, soma omwatsi “Amaha Awuwene aw’Obuthuku Obukasa.”