Kikabughawa indi hakuhi abandu bbiliyoni ithanu babakendi lebya omupira w’ekithongole ekya FIFA World Cup owatsuka Okwerikuminakughuma 20 erihika Okwerikuminibiri 18, 2022. Abangyi bakalengekanaya bathi eby’amasatha ng’ebi byangana kolha bingyi kwilhaba erithaleka abandu babye bughuma ng’abakalebaya omupira.

•   “Eby’amasatha biwithe amaaka w’erihindulha ekihugho. Biwithe amaaka aw’erihira abandu mw’omuhwa. Biwithe amaaka aw’erileka abandu ibabya bughuma omwa nzira y’embaghane.”—Nelson Mandela, oyuwabya prezidenti owe South Africa.

•   “Omupira . . . akaleka abandu ibabya n’amaha awasosene, akaleka abandu ibatsemera haghuma, akaleka ibabya bughuma omwa ebyabanzire, akaleka abandu ibanzana, kuthya n’eribya n’ekindu kirebe ekya basosenemu.”—Gianni Infantino, prezidenti we FIFA. a

 Omupira w’Ekikopo ky’Ekihugho Kyosi kutse eby’amasatha ebyosi-byosi ibyana berererya ebilhubirirwa bingaha n’ebi? Mbwino hane maha wosi-wosi w’erisyabana obuholho n’obughuma?

 Omupira w’omwaka ono ow’Ekikopo ky’Ekihugho kyosi abirileka abandu ibathalengekania okwa mupira musa. Eby’amasatha ebi byabirileka abandu ibakania okwa by’erianza erighunzaho ebitsibu n’emyatsi y’eby’ekipolitiki eyihambire okwa bughabe bw’abandu, akasolholho omwa rangyi, n’obuthe bulingirirania omwa by’emingirirye.

 Nomwabine, abandu bangyi bakatsemera erilebya eby’amasatha ebikabyamo ebihugho bingyi ng’Omupira w’Ekikopo ky’Ekihugho kyosi. Aliwe, nomwakine kithi abandu babyanzire kutsibu, eby’amasatha ebi sibyanga leka abandu bakabya bughuma kera na kera. Omwakanya k’ekyo, mughulhu mungyi bikabya ibikakanganaya emibere y’eripona abandi n’ebikorwa ebya Biblia yabugha yithi byanga kengenie obuthuku obukahulhawamo “ebiro by’enyuma-nyuma.”—2 Timoteo 3:1-5.

 Omwa Biblia muli amaha w’okwenene aw’ekihugho kyosi eribya bughuma. Yikalhaghanisaya ngoku abandu abosi okwa kihugho bakendi syabya omwa bughuma ahisi sy’egavumente y’elhubulha eyikahulhawamo “Obwami bwa Nyamuhanga.”—Luka 4:43; Matayo 6:10.

 Omwami w’Obwami obo, Yesu Kristo, akendi syalhangira athi hakabya obuholho omwa kihugho kyosi. E Biblia yikabugha yithi:

•   “Abathunganene basyakanya, n’obuholho bwasyakanyirira.”—Esyonyimbo 72:7, NWT.

•   “Asyalhamya abera abakamulhakira . . . Akalhamayabo okw’inubya n’obwagha.”—Esyonyimbo 72:12, 14.

 Nibya namunabwire, erikangirirya lya Yesu lyabirileka esyomiliyoni sy’abandu omwa bihugho 239 ibabya bughuma. Babir’igha ngoku banga yihighulha okw’ipona abandi. Eriminya bingyi, soma emyatsi eyiwithe omuthwe “Eriponangana Lyangana Hwaho.”