E Russia Yikathahirira e Ukraine
Okwa syosaha esy’engyakya-ngyakya esy’ebiro 24 Okwakabiri, 2022, e Russia muyatsukire erithuma abasirikali bayu b’omwa Ukraine, nomwakine indi abathabali b’ekihugho babya ibanemulengaho erilhangira bathi sihalibya olhuhi. Amalhwa aya anganahamba athi okwa kihugho kyosi? Omuhandiki Mukulhu ow’Obughuma bw’Ebihanda (UN), ya António Guterres, mwabughire bino ebiro bike ahanyuma: “Sithwasi eriaghalhwa, eritsandalikania, n’etabu ebikendilhua omwa malhwa aya ekya bikendi kolha omwa Yuropu n’okwa buyirinde bw’ekihugho kyosi.”
Erikwamana ne Biblia, ebikabya ng’ebi bikamanyisayaki?
Yesu Kristo mwalhaghulha omughulhu “ekihanda kyasyalhwa n’ekindi kihanda, n’obwami n’obundi bwami.” (Matayo 24:7) Soma omwatsi “Ekiminyikalho ‘eky’Ebiro by’Enyuma-nyuma’ Ni Kyahi?” erilhangira ngoku e Biblia yikakanganaya yithi munabwire esyonyuhi sikaberereraya obuminyereri bwa Yesu.
Ekitabu ky’Eribisulirwa kikakanganaya esyonyuhi ng’oyukaghendaya “esabayiri oyulhukulha-kulha” kandi ‘oyukalhusaya obuholho okwa kihugho.’ (Eribisulirwa 6:4) Soma Omwatsi “Abakaghendaya Esyosabayiri Bbani—Ni Bahi?” eriminya ngoku obuminyereri obu buhambire okwa syonyuhi munabwire.
Ekitabu kya Danieli mukyalhaghulha obuyighu ahakathi-kathi ‘k’omwami w’elhuthambi lhw’endatha’ ‘n’omwami w’elhuthambi lhw’eyikwa.’ (Danieli 11:25-45) Lebaya evidiyo Eribererera ly’Obuminyereri—Danieli Sura 11 nuku wuminye ekikaleka e Russia n’abakasighikayo ibabya ibangana minyikalibwa ng’omwami w’elhuthambi lhw’endatha. a
Kandi ekitabu ky’Eribisulirwa kikakanaya oko “malhwa w’ekiro kinene kya Nyamuhanga Omuthoki w’Ebyosi.” (Eribisulirwa 16:14, 16) Aliwe, olhu si lhuhi ahakathi-kathi k’ebihanda ngoku thukalhangira lino. Soma omwatsi “Olhuhi lhwe Harmagedoni Niki?” eriminya bingyi ebihambire okwa kindu ky’obuthuku obukasa ekyo.
Busana naki iwabya n’amaha awuwene busana n’obuthuku obukasa?
E Biblia yikabugha yithi Nyamuhanga akendi ‘syakubya amalhwa omo kihugho kyosi.’ (Esyonyimbo 46:9) Soma omwatsi “Amaha Awuwene aw’Obuthuku Obukasa” eriminya bingyi ebihambire okwa buthuku obukasa obwa Nyamuhanga akalhaghanisaya.
Yesu mwakangirirya abigha biwe athi basabe bathi Obwami bwa Nyamuhanga bwase. (Matayo 6:9, 10) Obwami obo ni gavumente ey’elhubulha eyikendi syaberererya erisonda lya Nyamuhanga okwa kihugho, kandi erisonda lya Nyamuhanga mwamuli obuholho. Eriminya ngoku Obwami bwanga kughasira, lebaya evidiyo Obwami bwa Nyamuhanga Niki?
Omwa Ukraine muli Abema ba Yehova abalhabire omu 129,000. Ng’abandi Abema abali omwa bindi bihugho, bakagherereraya Yesu omw’isighalha isibawithe lhuhandi omwa by’ekipolitiki kandi bakaghana erisangira omo malhwa. (Yoane 18:36) Omwa kihugho kyosi, Abema ba Yehova bakalholha embere erithulhughania “engulhu yuwene y’Obwami” ng’ekindu kisa ekikendi syaghunzaho ebitsibu by’abandu, imwamuli n’esyonyuhi. (Matayo 24:14) Thukakukokaya erithuhikako wan’igha bingyi ebihambire oko mwatsi we Biblia ow’amaha.
a Eribana omwatsi wosi owahambire okwa buminyereri obu, lebaya omwatsi “‘Omwami w’Elhuthambi lhw’Endatha’ Omwa Mughulhu w’Enduli” na “‘Omwami w’Elhuthambi lhw’Endatha’ Nindi Munabwire?”
You May Also Like
MUBYE IMUNATHEGHIRYE!
Ekitsibu ky’Abandu Erithibitha Erilhua Omwa Ukraine—Ekya Biblia Yikabisulha
E Biblia yikasoborera ekikaleka eki ikyabya kuthya n’ekikendi syakighunziraho ighuma.
ESSENTIAL BIBLE TEACHINGS
Obwami bwa Nyamuhanga Niki?
Omw’ithulira liwe eryosi, Obwami bwa Nyamuhanga bwa Yesu akangirirayako kwilhaba owundi mwatsi wosi-wosi. Ahabw’ebighonye bingyi, abigha biwe babirisaba bathi Obwami obo bwase.
