Eritsuka n’omwaka ono, thukendibya n’obuthuku obukaghunza obw’eriyitheghekera ery’Ibuka ly’olhuholho lhwa Kristo. Ery’Ibuka lyamabya okwa kiro ky’ewiki, Omuhindano w’Engebe Yethu n’Omubiiri Wethu isyendibyayo ewiki eyo. Ery’Ibuka lyamabya okwa wikendi, omukania w’abandu bosi n’Erigha ly’Akaleberyo isibyendibyayo. Wune mwendikolesya ndeke obuthuku obwabiriry’ongerwako obu? Ngoku kyanabya omwa kighonye ky’erimbere, hatholere ihabya eriyitheghekera omukonga w’embaghane oyu. (Lk 22:7-13; km 3/15 1) Aliwe ithwe bosi thutholere ithwathegheka emithima yethu. Ekyo thwanga kikolha thuthi?

• Ghaniraya okwa mughaso ow’erisyahindana okw’Ibuka.​—1Kor 11:23-26

• Saba kandi lengekanaya okwa bughuma bwawu na Yehova.​—1Kor 11:27-29; 2Kor 13:5

• Soma kandi ghaniraya oko mwatsi owaseghemere okwa Masako owahambire okwa mughaso w’ery’Ibuka.​—Yn 3:16; 15:13

Abandi bathuliri bakasoma n’erighanirya okwa busomi bwe Biblia obuhambire okw’Ibuka obuli omwa katabu Erilebya Amasako Buli Kiro. Abandi bakasoma emilhondo ye Biblia eyiri ahikwa hano. Kandi nibya n’abandi bakalhaba omwa myatsi eyiri omwa Akaleberyo eyikakanaya okw’Ibuka n’olhwanzo olhwa Yehova na Yesu babirithukangania. Mbulha wamasombolha erikolesya nziraki ey’erigha, ambi iyakuwathikya erilholha embere erikuthunda hakuhi na Yehova na Mughalha wiwe.