Erikania Binene: Isiwalengekanaya wuthi mbwino wutholere iwasoborera obuli kandu. Yesu iniakakolesaya ebibulyo eriwathikya abandu eriyilengekanirya n’erithoka erihika okw’ithwamu ekihikire. (Mt 17:24-27) Erikolesya ebibulyo likaleka erigha iryaghenda ndeke kandi likakuwathikaya eriminya ebya mwigha wawu akayitheghereraya n’eby’ikirirye. (be-E 253 enu. 3-4) Wamabulya omwigha y’ekibulyo, leka erimuharabania, linda asubiraye. Omwigha amasubirya ekiwire, omwakanya k’erimubwira ekihikire, muwathikaye eriyilhangirira ekihire omw’ikolesya ehindi hibulyo. (be-E 238 enu. 1-2) Soborera esyonzumwa ahathe erisyanguhya nuku omwigha athoke erikenga ndeke.—be-E 230 enu. 4.

Erikalya Omwatsi: Yitheghaye okw’anza eribugha ebyosi ebya wasi oko mwatsi. (Yn 16:12) Hira omuwathu w’okwa nzumwa ngulhu eyiri omwa nungu. (be-E 226 enu. 4-5) Eribugha obuli kandu akahambire oko mwatsi, n’omubyangabya ibihikire kandi ibyuwene, ikyangana leka enzumwa ngulhu iyasighalha enyuma. (be-E 235 enu. 3) Omwigha amabiriyitheghererya enzumwa ngulhu, mughende okwa yindi nungu.

Erianza Erithaghunza Omwatsi owa Muk’igha: Ekighendererwa kyethu kikulhu ly’erihika okwa mithima, butsira erighunza omwatsi owa thuk’igha. (Lk 24:32) Kolesaya ndeke amaaka w’Ekinywe kya Nyamuhanga omw’ihira omuwatho w’okwa masako amakulhu-makulhu awali omw’isomo erya muliko. (2Kor 10:4; Ebr 4:12; be-E 144 enu. 1-3) Kolesaya eby’erileberyako ebyolhobire. (be-E 245 enu. 2-4) Lengekanaya okwa bitsibu ebya mwigha wawu akalhabamu n’ebyikirirye, neryo lengaho erimulholeryako ebya muk’igha. Mubulhaye ebibulyo nga bino: “Wukayowa wuthi okwa bya wam’igha hano?” “Eki kikathweghesayaki oku Yehova?” “Wukalhangira ni mughasoki owali omw’ighendera okwa busondoli ng’obu?”—be-E 238 enu. 3-5; 259 enu. 1.