Omwana amabya iyo thwameya okwa muyi, thutholere ithwamubwira thuthi thukanza erikania n’ababuthi biwe. Eki kikanganaya ngoku thusikirye ababuthi biwe. (Emi 6:20) Isithwaligha omwana amabugha athi thwingire omwa nyumba. Amabugha athi ababuthi biwe sibali hakuhi, thutholere ithwasubulha okwa yindi ndambi.

Omwana nomwangabya inina mukulhu, obundi myaka nga 15-19, ikikendibya ikikinatholere erimubulya ababuthi biwe nga bali hayi. Amabugha athi sibali hakuhi, ithwangana mubulya ababuthi biwe nga bangana muha obughabe bw’eriyithwiramu eby’angasoma. Bamabya ibabiri mulighira, ithwangana musighira omwatsi w’erisoma obundi n’erimukangirira e jw.org.

Thukasuba eyiri omunyethu oyuwanzisibawa, thutholere ithwamubwira thuthi thwanzire erilholha okwa babuthi biwe. Eki ikikendi leka ithwabasoborera ekikaleka ithwakania nayu n’eribakangania erihabulha ly’eriyikethera eriri omwa Biblia erihambire okwa maka. (Esy 119:86, 138) Ithwe erikangania ku thusikirye n’eritsomana ababtuhi biwe kikendiha obwema kandi kyanganathuha akaghisa k’eribwira abandi b’omw’eka eyo engulhu yuwene.—1Pet 2:12.