Deuteronomy 27:1-26
27 Na Moses el tu yurin mwet kol lun mwet Israel, ac fahk nu sin mwet uh, “Akos kas in luti nukewa ma nga sapkin nu suwos misenge.
2 Ke len se kowos ac alukela Infacl Jordan ac utyak nu fin facl se LEUM GOD lowos El asot nu suwos, kowos fah tulokunak kutu eot lulap, ac mosrwela ke fasr,*
3 na simusla ma sap ac mwe luti inge nukewa fac. Pacl se kowos ilyak nu in facl mut ac kasrup fohk we, ma LEUM GOD lun papa matu tomowos El wuleot nu suwos,
4 ac kowos sun lefahlo ke Infacl Jordan, tulokunak eot inge Fineol Ebal, oana ke nga fahkot misenge, ac mosrwela ke fasr.
5 Etoak sie loang we ke eot ma tia tafleyuk ke kufwen sroasr osra,*
6 mweyen kutena loang kowos etoak nu sin LEUM GOD lowos, enenu in orek ke eot tia tufahl. Kowos fah oru mwe kisa we ma enenu in firirla nufon.
7 Na kowos fah orek kisa in akinsewowo ac mongo kac, ac kowos fah engan ye mutun LEUM GOD lowos.
8 Kowos in simusla kas nukewa ke ma sap lun God in arulana kalem fin eot ma mosrweyukla tari ke fasr.”
9 Na Moses el tu yurin mwet tol Levi uh, ac fahk nu sin mwet Israel nukewa, “Kowos misla ac porongeyu. Misenge kowos mwet lac lun LEUM GOD lowos.
10 Ouinge kowos in aksol ac liyaung ma sap lal nukewa ma nga asot nu suwos misenge.”
Selnga Nu Fin Mwet Su Seakos
11 Na ke len sacna, Moses el fahk nu sin mwet Israel,
12 “Tukun kowos alukela Infacl Jordan, ke pacl se ma mwe akinsewowo uh ac fwackyak nu fin mwet uh, sruf inge pa ac tu Fineol Gerizim: Simeon, Levi, Judah, Issachar, Joseph, ac Benjamin.*
13 Ac ke pacl se ac fwackyak mwe selnga, sruf inge pa ac tu Fineol Ebal: Reuben, Gad, Asher, Zebulun, Dan, ac Naphtali.
14 Na mwet Levi fah fahk kas inge ke sie pusra lulap:
15 “ ‘Selnga lun God in oan fin kutena mwet su orek ma sruloala ke eot, sak, ku osra, ac alu nu kac in lukma. Alu nu ke ma sruloala uh mwe srungayuk yurin LEUM GOD.’
“Na mwet nukewa fah fahk, ‘Amen!’**
16 “ ‘Selnga lun God in oan fin kutena mwet su pilesru papa tumal ku nina kial.’
“Na mwet nukewa fah fahk, ‘Amen!’*
17 “ ‘Selnga lun God in oan fin kutena mwet su mokle masrol lun mwet tulan lal!’
“Na mwet nukewa fah fahk, ‘Amen!’*
18 “ ‘Selnga lun God in oan fin kutena mwet su kolla sie mwet kun liki inkanek lal.’
“Na mwet nukewa fah fahk, ‘Amen!’*
19 “ ‘Selnga lun God in oan fin kutena mwet su ikolya nununku suwohs liki mwetsac, mwet mukaimtal, ac katinmas.’
“Na mwet nukewa fah fahk, ‘Amen!’*
20 “ ‘Selnga lun God in oan fin kutena mwet su orek kosro yurin sie sin mutan kien papa tumal. Ouiya se inge akkalemye lah el oru sie mwe mwekin nu sin papa tumal.’
“Na mwet nukewa fah fahk, ‘Amen!’*
21 “ ‘Selnga lun God in oan fin kutena mwet su orek kosro yurin kutena kain in kosro.’
“Na mwet nukewa fah fahk, ‘Amen!’*
22 “ ‘Selnga lun God in oan fin kutena mwet su orek kosro yurin tulik mutan wial, ku tulik mutan nutin papa tumal sin siena nina, ku tulik mutan nutin nina kial sin siena papa.’
“Na mwet nukewa fah fahk, ‘Amen!’*
23 “ ‘Selnga lun God in oan fin kutena mukul su orek kosro yurin nina kien mutan kial.’
“Na mwet nukewa fah fahk, ‘Amen!’*
24 “ ‘Selnga lun God in oan fin kutena mwet su orek akmas in lukma!’
“Na mwet nukewa fah fahk, ‘Amen!’
25 “ ‘Selnga lun God in oan fin kutena mwet su eis mani in uniya sie mwet su wangin mwata.”
“Na mwet nukewa fah fahk, ‘Amen!’
26 “ ‘Selnga lun God in oan fin kutena mwet su tia akos ma sap ac mwe luti nukewa lun God!’
“Na mwet nukewa fah fahk, ‘Amen!’*
Footnotes
^ 27:2–8; Jos 8:30–32
^ 27:5–6; Exo 20:25
^ Dut 11:29; Jos 8:33–35
^ Amen: liye ke Kalmen Kutu Kas.
^ Exo 20:4; 34:17; Lev 19:4; 26:1; Dut 4:15–18; 5:8
^ Exo 20:12; Dut 5:16
^ Dut 19:14
^ Lev 19:4
^ Exo 22:21; 23:9; Lev 19:33–34; Dut 24:17–18
^ Lev 18:9; 20:11; Dut 22:30
^ Exo 22:19; Lev 18:23; 20:15
^ Lev 18:9; 20:17
^ Lev 18:17; 20:14
^ Gal 3:10
