Fwackyuk 5:1-14
5 Nga liye sie book limlim ke lac po layot sin el su muta fin tron; afla ke sim lik ac loac, ac siliyuki ke sil itkosr.
2 Ac nga liye sie lipufan kulana su fahk ke pusra lulap, “Su fal in kunausla sil inge ac ikasla book limlim se inge?”
3 A wangin sie inkusrao, ku fin faclu, ku ye faclu, su ku in ikasla book limlim sac ac liye ma oan loac.
4 Ac nga tung ma lulap, mweyen wangin sie koneyukyak su fal in ikasla book limlim sac, ku liye ma oan loac.
5 Na sie sin mwet elder uh fahk nu sik, “Nimet tung. Liye, Lion soko ke sruf lal Judah, su ma ke fwilin tulik natul David, el kutangla, ac el ku in kunausla sil itkosr kac ac ikasla book sac.”
6 Na nga liye soko Lamb tu infulwen tron, ac ma moul akosr ac mwet elder elos raunella. Lamb soko ah oana elan anwuki. Oasr koac itkosr ac atronmuta itkosr kacl, su pa ngun itkosr lun God ma supweyukelik nu fin faclu nufon.
7 Lamb soko ah som ac eisla book limlim sac liki lac po layot sin el su muta fin tron.
8 Ke el oru ouinge, ma moul akosr ac mwet elder longoul akosr elos epasr ye mutun Lamb soko ah. Kais sie selos oasr sie harp yorol, ac ahlu gold sessesla ke mwe keng, su pa pre lun mwet lun God.
9 Elos yuk soko on sasu ac fahk:
“Fallana nu sum in eis book limlim se inge
Ac kunausla sil kac.
Tuh kom anwuki, ac ke srahm kom sang molin sukosok nu sin God
Ke mwet lun sruf nukewa ac kain in kas nukewa, mutanfahl nukewa, ac kain in tuhnin mwet nukewa.
10 Kom oru tuh elos in sie tokosrai in mwet tol, in kulansupu God lasr,
Ac elos fah leumi faclu.”
11 Ac nga sifilpa ngetak ac nga lohng pusren lipufan puspis—tausin ac million selos! Elos tu raunela tron ac ma moul akosr ac mwet elder uh,
12 ac elos on ke pusra lulap ac fahk:
“Fallana tuh Lamb soko ma anwuki tari
Elan eis wal ac kasrup, lalmwetmet, ac ku,
Sunak, ac wolana, ac kaksak!”
13 Ac nga lohng ke ma orekla nukewa inkusrao, ac fin faclu, ye faclu, ac in meoa—aok ma moul nukewa inkusrao lucng oayapa fin faclu ten—elos on ac fahk,
“Kaksak, ac sunak, ac wolana, ac ku
Ma pahtpat ac ma pahtpat,
Nu sel su muta fin tron ac nu sin Lamb!”
14 Ac ma moul akosr elos topuk ac fahk, “Amen!” Ac mwet elder elos faksufi ac alu.
