Genesis 5:1-32
5 Pa inge takin fwilin tulik natul Adam. (Ke God El tuh orala mwet uh, El oralosla in lumahl.*
2 El oralosla mukul ac mutan, ac akinsewowoyalos, ac sang inelos “Mwet.”)**
3 Ke Adam el yac siofok tolngoul matwal, el oswela wen se oana el, ac el sang inel Seth.
4 Tukun pacl sac, Adam el sifilpa moul yac oalfoko. Oasr pac tulik mukul ac tulik mutan saya natul,
5 ac el misa ke el yac eufoko tolngoul.
6 Ke Seth el yac siofok limekosr, oasr wen se natul pangpang Enosh,
7 ac toko el moul pac ke yac oalfoko itkosr. Oasr pac tulik saya natul,
8 ac el misa ke el yac eufoko singoul luo.
9 Ke Enosh el yac eungoul, oasr wen se natul pangpang Kenan,
10 na toko el moul pac yac oalfoko singoul limekosr. Oasr pac tulik saya natul,
11 ac el misa ke el yac eufoko limekosr.
12 Ke Kenan el yac itngoul, oasr wen se natul pangpang Mahalalel,
13 na toko el moul pac yac oalfoko angngaul. Oasr pac tulik saya natul,
14 ac el misa ke el yac eufoko singoul.
15 Ke Mahalalel el yac onngoul limekosr, oasr wen se natul pangpang Jared,
16 na toko el moul pac yac oalfoko tolngoul. Oasr pac tulik saya natul,
17 ac el misa ke el yac oalfoko eungoul limekosr.
18 Ke Jared el yac siofok onngoul luo, oasr wen se natul pangpang Enoch,
19 na toko el moul pac yac oalfoko. Oasr pac tulik saya natul,
20 ac el misa ke el yac eufoko onngoul luo.
21 Ke Enoch el yac onngoul limekosr, oasr wen se natul pangpang Methuselah.
22 Tukun pacl sac, Enoch el moul in sie sin sie yurin God ke yac tolfoko, ac oasr pac tulik saya natul.
23 El moul sun yac tolfoko onngoul limekosr.
24 El moul in sie sin sie yurin God, na el wanginla mweyen God El usalla.*
25 Ke Methuselah el yac siofok oalngoul itkosr, oasr wen se natul pangpang Lamech,
26 na toko el moul pac yac itfoko oalngoul luo. Oasr pac tulik saya natul
27 ac el misa ke el yac eufoko onngoul eu.
28 Ke Lamech el yac siofok oalngoul luo, oasr wen se natul,
29 ac el sang inel Noah.* Ac Lamech el fahk, “Tulik se inge ac fah use nu sesr mongla liki orekma upa nukewa lasr, liki fohk se na ma LEUM GOD El tuh filiya sie selnga nu kac.”*
30 Na toko Lamech el moul pac yac lumfoko eungoul limekosr. Oasr pac tulik saya natul
31 ac el misa ke el yac itfoko itngoul itkosr.
32 Tukun Noah el yac lumfoko matwal, oasr wen tolu natul pangpang Shem, Ham, ac Japheth.
Footnotes
^ 5:1–2 Gen 1:27–28
^ Mwet: in kas Hebrew uh, kalmen Adam pa “mwet”.
^ Mt 19:4; Mk 10:6
^ Heb 11:5; Jud 1:14
^ Noah: fahkyen ine se inge apkuran oana “mongla” in kas Hebrew.
^ Gen 3:17
