Jeremiah 15:1-21
15 Na LEUM GOD El fahk nu sik, “Moses ac Samuel finne tu inge in kwafe nu sik ke mwet uh, nga fah tiana pakomutalos. Sap elos in som liki ye mutuk.*
2 Ke elos siyuk sum lah elos ac som nu ya, fahkang nu selos lah nga fahk ouinge:
“Kutu selos ac fah misa ke mas—
Na pa ingan acn elos ac som nu we!
Kutu selos ac fah misa ke mweun—
Na pa ingan acn elos ac som nu we!
Kutu selos fah misa ke masrinsral—
Na pa ingan acn elos ac som nu we!
Kutu selos ac fah utukla nu ke nien kapir—
Na pa ingan acn elos ac som nu we!*
3 Nga, LEUM GOD, sulela tari ma upa akosr inge in sikyak nu selos: elos fah anwuki ke mweun; kosro ngalngul fah amakunla manolos; won ac fah kangla ikwalos, ac kosro lemnak fah kangla ma lula kac.
4 Nga fah oru mwet nukewa faclu in fwefela kaclos ke sripen ma koluk lulap Manasseh, wen natul Hezekiah, el oru in Jerusalem pacl se el tuh tokosra lun acn Judah.”*
5 LEUM GOD El fahk,
“Mwet Jerusalem, su ac pakomutowos,
Ac su ac tungi kowos?
Su ac sisla pacl la in tui
Ac siyuk lah kowos fuka?
6 Kowos sisyula;
Kowos totulikla likiyu.
Ke ma inge nga srukak pouk ac itungkowosi
Mweyen nga totola in kutong kasrkusrak luk.
7 In siti nukewa in facl se inge
Nga siskowosyak nu ke eng uh, oana ke kulun wheat uh sisiyak nu ke eng uh.
Nga kunauskowosla, mwet luk.
Nga uniya tulik nutuwos
Mweyen kowos tiana tui liki ouiyen moul koluk lowos.
8 Puslana katinmas in facl suwos
Liki puk wekof uh.
Nga uniya mukul fusr nutuwos an ke pacl na elos sun kuiyalos,
Ac oru nina kialos in keok.
In kitin pacl na nga srunglulos
Ke mwe akkeok ac mwe aksangeng.
9 Nina se ma tulik itkosr natul misa
El mulalla ac suk mongol.
Kalem lun len uh yorol ekla lohsr.
El mwekinla ac oela insial ke asor.
Nga fah lela mwet lokoalok lowos in onelosla
Su srak moul inmasrlowos.
Nga, LEUM GOD, pa fahk ma inge.”
Jeremiah El Torkaskas Nu Sin LEUM GOD
10 Nga mwet na supwar se! Efu ku nina kiuk el osweyula nu faclu? Mwet nukewa in mutunfacl se inge amei ac akukuin yuruk. Nga tiana sang mani nu sin mwet ma ngisreyu, ac nga tia pac ngisre mani sin mwet. Ne ouinge elos nuna selngawiyu na.
11 LEUM GOD, lela selnga nukewa lalos uh in akpwayeiyuk nga fin tia kulansupwekom wo, ac nga fin tia kwafe sum ke mwet lokoalok luk in pacl elos sun ma upa ac ongoiya nu selos.
12 (Wangin mwet ku in koteya osra uh, yokna osra ma tuku epang me ma karyak ke bronze.)
13 LEUM GOD El fahk nu sik, “Nga fah supwala mwet lokoalok in usla mwe kasrup ac ma saok lun mwet luk, in kaelos ke koluk lalos elos oru apunla acn selos.
14 Nga ac oru elos in kulansupu mwet lokoalok lalos in sie facl elos tia etu kac, mweyen kasrkusrak luk oana e uh, su ac firir nwe tok.”
15 Na nga fahk, “LEUM GOD, kom etu. Esamyu ac kasreyu. Lela nga in foloksak nu selos su kalyeiyu. Nimet arulana mongfisrasr nu selos, pwanang elos in uniyuwi. Esam lah elos akkolukyeyu ke sripom.
16 Kom kaskas nu sik, ac nga porongo kas nukewa lom. LEUM GOD Kulana, nga ma lom, ac kas lom nwakla insiuk ke engan ac insewowo.
17 Nga tia wi sisla pacl luk in israsr ac pwar yurin mwet ngia. A nga mukena muta oana kom sapkin, ac sessesla ke kasrkusrak.
18 Efu ku nga nuna keok na? Efu ku kinet keik uh koflana unweyukla in mahla? Yah kom ac aksupwaryeyu oana soko infacl srisrik ma oan nwe mihnla?”
19 Na LEUM GOD El topukyu ouinge: “Kom fin foloko, nga ac sifil eis kom ac kom ac fah sifilpa mwet kulansap luk. Kom fin tila fahk ma wangin sripa a kom fahkak ma yohk sripa, na kom ac fah sifilpa mwet palu luk. Kom in tia som nu yurin mwet uh—lela elos in tuku nu yurum.
20 Nga ac orekom in oana sie pot bronze kulana nu selos. Elos ac mweun lain kom, tusruktu elos fah tia kutangkomla. Nga fah wi kom in langoekom ac molikomla.
21 Nga fah liyekomyang ac loangekom liki inpoun mwet koluk ac mwet sulallal. Nga, LEUM GOD, pa fahk ma inge.”
