Job 28:1-28
28 “Oasr luf ma silver uh pukpukyak we;
Oasr pac acn ma gold uh aknasnasyeyuk we.
2 Mwet uh pukanak osra liki ye fohk uh
Ac munanla copper uh in kofelik ac sororla liki eot uh.
3 Mwet uh suk pac acn ma lohsr oemeet in konauk ma oan we.
Elos suk in acn loal lun faclu
Ac pukanak yen lohsr uh in konauk eot uh.
4 Loes liki acn ma mwet uh muta we—
Acn ma falken mwet uh soenna fahsr we—
Mwet uh pikin laf ye eol uh,
Yen ma elos ac mukena orekma we.
Elos ac atla na ke sucl uh ke elos ac orekma in luf uh.
5 Mwe mongo kapak infohk uh yak,
A ye pacna infohk se inge
Ma nukewa itungyuki ac musalsalu.
6 Eot infohk uh oasr wek sapphire kac,
Ac kutkut in faclu oasr gold kac.
7 Won hawk uh tia ku in liye inkanek nu ke lufin puk ma saok uh,
Won vulture tia pac wi sohksok fin acn inge.
8 Wangin lion ku kutena kosro sulallal
Wi forfor ke inkanek muku inge.
9 “Mwet uh pikin eot ma arulana keke,
Ac ikruiya eol uh ke elos pukanla pe eol uh.
10 Ke elos ac putala lufin eot uh,
Elos konauk wek na saok.
11 Elos ac pikin nwe sun acn ma infacl uh soror we me,
Ac oru tuh ma wikla oan yen lohsr uh in ku in liyeyuk.
12 Tusruktu, pia acn ma lalmwetmet uh ku in koneyukyak we?
Kut ac luti ya kut in etala?
13 “Lalmwetmet uh tia ma ac ku in koneyukyak yurin mwet uh;
Wangin mwet etu lupan saokiya.
14 Yen loal in meoa uh, ku inkof uh
Fahk mu lalmwetmet uh tia koneyukyak we.
15 Silver ac gold tia ku in sang moli.
16 Gold ma wo oemeet, ku wek ma arulana saok,
Tia ku in saok oana lalmwetmet uh.
17 Lalmwetmet uh saok liki gold,
Ac saok liki sufa orekla ke gold, ku glass ma wo emeet uh.
18 Saok lun lalmwetmet uh yohk liki
Ma saok inkof uh, ku wek crystal ac ruby.
19 Wek topaz ac gold ma wo oemeet uh
Tia ku in lumweyuk nu ke saok lun lalmwetmet uh.
20 “Fin angan, na pia mutaweyen lalmwetmet?
Kut ac luti ya kut in etala?
21 Wangin ma oasr moul la ku in liye,
Finne won ke pacl el sohksok uh el tia pac liye.
22 Finne misa, ku mwe kunausla,
Eltal fahk mu eltal lohng mukena ke srumunyuk.
23 “God mukena pa etu inkanek nu we,
Ac etu lah lalmwetmet uh ac koneyukyak oya,
24 Mweyen El liye acn nukewa faclu,
Ac liye ma nukewa ma oan ye kusrao.
25 Ke God El sang ku nu sin eng uh,
Ac wotela lah ac pia lupan meoa uh;
26 Ke pacl se God se sulela lah af uh ac kahkla oya,
Ac inkanek ma pukunyeng in pulahl uh ac fahsr kac;
27 Pa ingan pacl se ma God El liye lalmwetmet, ac srikeya lupan woiya uh,
Na El akkeyala.
28 “God El fahk nu sin mwet uh,
‘Kowos fin ke lalmwetmet, kowos enenu in sunakin Leum.
Ac kowos fin lungse etauk, kowos enenu in forla liki ma koluk.’ ”
