Job 4:1-21
4 Na Eliphaz el fahk,
“Job, ku kom ac toasrla nga fin sramsram?
2 Nga koflana misla ac tia fahk nunak luk.
3 Kom luti mwet puspis tari,
Ac akkeye poun mwet su munas.
4 Ke pacl sie mwet el munasla ac tukulkul,
Kas lom tuh akkeyal elan tuyak.
5 Na inge ke kom pa sun ongoiya uh,
Kom arulana lofongla kac.
6 Kom tuh alu nu sin God, ac moul lom arulana suwohs;
Ke ma inge fal na in oasr lulalfongi ac finsrak lom.
7 Srike esam lah acnu oasr pacl se sie mwet suwoswos el sun ongoiya,
Ku sie mwet wangin mwata el wotla liki sou lal?
8 Nga liye tari ke mwet uh ac taknelik orekma sesuwos,
In ima lun ma koluk;
Na elos ac kosrani pac sesuwos ac ma koluk.
9 In kasrkusrak lun God,
El kunauselosla oana sie paka.
10 Mwet koluk elos kou ac wowo oana lion uh,
Tuh God El kutongulosi ac kotala wihselos.
11 Oana luman lion su wangin ma elan uniya ac kang,
Elos ac misa, ac tulik natulos nukewa fahsrelik.
12 “Sie pacl ah oasr kas se tuku kakasrisrikna;
Aok arulana srikla pusra, apkuranna ngan tia ku in lohng.
13 Pusra se inge lusrongla motul luk ah oana sie mweme koluk.
Nga rarrar,*
14 Ac monuk nufon usrusryak
ke sangeng.
15 Sie engyeng na srisrik ukya mutuk,
Ac monuk nufon tuninmihsrisrla ke sangeng.
16 Nga liye lah oasr ma se tu insac;
A nga ne ngetang nu kac, nga tia ku in akilen lah mea se.
Mihsna in pacl sac, ac nga lohng sie pusra kasla, fahk mu:
17 ‘Ya sie mwet ku in suwoswos ye mutun God?
Ya mwet se ku in nasnasna ye mutun El su oralla?
18 God El tia lulalfongi mwet kulansap lal inkusrao.
Finne lipufan uh, El konauk lah oasr pac ma elos sufalla kac.
19 Kom nunku mu El ku in lulalfongi sie ma su orekla ke fohk kle,
Sie ma orekla ke fohk, su fisrasr in itungyuki oana sie srenyuhu?
20 Sahp sie mwet ac ku in moul ke lotutang uh,
A ekela na el misa, wangin eteya.
21 Ma lal nukewa ac itukla lukel;
El ac misa, a srakna wangin etauk in el.’
Footnotes
^ Job 33:15
