Nehemiah 9:1-38
9 Ke len se aklongoul akosr in malem sacna, mwet Israel elos toeni in lalo. Elos nokomang nuknuk yohk eoa ac filiya fohkfok fin sifalos, mwe akkalemye asor lalos ke ma koluk lalos.
2 Na elos su ma in fwil nutin Israel na pwaye, elos srelosla liki mwetsac nukewa, ac elos tuyak ac fahkak ma koluk lalos ac ma koluk lun mwet matu lalos meet ah.
3 Ke elos tu na, Book in Ma Sap lun LEUM GOD lalos ritiyuk nu selos ke lusen ao tolu, ac ke ao tolu tokoyang elos fahkak ma koluk lalos ac alu nu sin LEUM GOD lalos.
4 Oasr acn se loangyak nu sin mwet Levi, na mwet inge elos tuyak fac: Jeshua, Bani, Kadmiel, Shebaniah, Bunni, Sherebiah, Bani ac Chenani. Elos pre ke pusra lulap nu sin LEUM GOD lalos.
5 Mwet Levi inge: Jeshua, Kadmiel, Bani, Hashabneiah, Sherebiah, Hodiah, Shebaniah, ac Pethahiah, elos ikasla pacl in alu ac fahk,
“Tuyak ac kaksakin LEUM GOD lowos;
Kaksakunul nwe tok ma pahtpat!
Lela mwet nukewa in kaksakin Inel wolana
Finne kaksak lasr tia ku in sun lupan kaksak fal nu sel.”
Pre In Fahkak Ma Koluk
6 Na mwet Israel elos pre ac fahk:
“O kom, LEUM GOD kom mukefanna LEUM GOD.
Kom orala kusrao ac itu nukewa inkusrao.
Kom orala finmes ac ma nukewa fac, oayapa meoa ac ma nukewa loac.
Kom asang moul nu sin ma nukewa.
Ku nukewa ma oan inkusrao pasrla ac alu nu sum.
7 Kom, LEUM GOD, sulella Abram
Ac pwanulla liki acn Ur in Babylonia.
Kom ekulla inel nu ke Abraham.*
8 Kom konauk lah el inse pwaye nu sum,
Ac kom orala sie wulela inmasrlom el.
Kom wulela tuh kom fah sang facl lun mwet Canaan,
Ac facl lun mwet Hit ac mwet Amor,
Facl lun mwet Periz, mwet Jebus, ac mwet Girgas,
Nu sel, tuh fwil natul in muta we.
Kom oru oana wuleang lom, mweyen kom suwohs.*
9 “Kom liye lupan keok lun mwet matu lasr in acn Egypt.
Kom lohng ke elos pang nu sum sisken Meoa Srusra.*
10 Kom orala mwenmen usrnguk lain tokosra,
Lain mwet fulat lal ac mwet in facl sel,
Mweyen kom etu lupan akkeokyeyen mwet lom.
Pwengpeng lom in pacl sac srakna oan nwe misenge.*
11 Kom sralik inkof uh ye mutalos
Ac pwanulos sasla fin acn pao.
Mwet su ukwalos elos walomla in kof loal
Oana sie eot tilla in meoa pulkulak.*
12 Kom pwanulos ke sie pukunyeng ke len,
Ac ke fong kom tolak inkanek lalos ke e.*
13 Kom tufoki liki inkusrao nu fineol Sinai.
Kom sramsram nu sin mwet lom
Ac sang nu selos ma sap wowo ac mwe luti suwohs.*
14 Kom luti nu selos in liyaung len Sabbath mutal lom,
Ac kom sang ma sap lom ac oakwuk lom nu selos sel Moses, mwet kulansap lom.
15 “Ke elos masrinsral, kom kitalos bread inkusrao me.
Ke elos malu, kom aksororye kof nimalos ke eot uh me.
Ac kom fahk tuh elos in eis selos facl se su kom
Wuleang tuh kom fah sang nu selos.*
16 Tusruktu mwet matu lasr meet ah elos inse fulatak ac likkeke
Ac tia lungse akos ma sap lom.*
17 Elos tiana akos. Elos mulkunla
Orekma usrnguk nukewa kom tuh oru.
Ke sripen inse fulat lalos elos sulela sie mwet kol
In folokunulosla nu ke moul in mwet kohs in acn Egypt.
Tuh kom sie God su nunak munas.
Kom kulang ac pakoten, ac tia sa in kasrkusrak.
Yoklana lungkulang lom, ac kom tiana siselosla.*
18 Elos orala sie ma sruloala in luman soko cow mukul fusr,
Ac fahk mu el pa god se su kololos me liki Egypt!
Ke elos oru ouinge elos arulana akkasrkusrakye kom, LEUM GOD! *
19 Tuh kom tiana siselosla ingo in acn mwesis,
Tuh pakoten lom yoklana.
Kom tiana eisla pukunyeng ac e,
Su akkalemye inkanek lalos ke len ac ke fong.*
20 Ke ngun wo lom, kom fahkang nu selos ma elos in oru.
Kom kitalos manna, ac sang kof nimalos.
21 Ke yac angngaul lalos in acn mwesis
Kom sang enenu lalos nukewa:
Nuknuk lalos tiana kulawi,
Ac nialos tiana fafwak.
22 “Kom sang kutangla nu selos fin mutunfacl ac tokosrai puspis,
Ke acn su oan siskalos.
Elos eisla acn Heshbon, yen Sihon el leum we,
Ac acn Bashan, yen Og el tokosra we.*
23 Kom sang tulik puspis natulos, oana itu inkusrao,
Ac oru tuh elos in eisla ac muta fin acn
Su kom tuh wuleang nu sin mwet matu lalos mu kom ac sang nu selos.*
24 Elos eisla acn Canaan.
Kom kutangla fin mwet su muta we.
Kom sang ku nu sin mwet lom in oru kutena ma elos lungse oru
Nu sin mwet Canaan ac tokosra nukewa lalos.*
25 Mwet lom elos sruokya siti kuhlusyukyak ke pot ku,
Oayapa acn wo fohk we, ac lohm we sessesla ke mwe kasrup,
Ac lufin kof pukpukyak tari,
Sak olive, sak oswe fokinsak, ac ima in grape.
Elos mongo nwe ke na elos kihpi ac fatelik.
Elos engankin ma wo nukewa kom sang nu selos.*
26 “A mwet lom elos seakos ac lain kom.
Elos ngetla liki Ma Sap lom.
Elos uniya mwet palu su fahkak kas in sensenkakinulos,
Su fahk nu selos in foloko nu yurum.
Pacl puspis elos fahk kas in akkolukye kom,*
27 Pwanang kom fuhlela tuh mwet lokoalok lalos in kutangulosla ac leum faclos.
Ke pacl upa nu selos, elos pang nu sum tuh kom in kasrelos,
Ac kom topkolos inkusrao me.
Ke pakoten lulap lom kom supwama mwet kol nu yorolos,
Su molelosla liki mwet lokoalok lalos.
28 Ke sifil oasr misla inmasrlolos, elos sifilpa oru ma koluk,
Ac kom sifilpa fuhlelosyang nu inpoun mwet lokoalok lalos.
Sruk ke pacl elos auliyak ac siyuk kom in molelosla,
Kom lohng inkusrao me, ac pacl nu ke pacl
Kom molelosla ke pakoten lulap lom.
29 Kom sensenkakinulos tuh elos in akos mwe luti lom,
A ke nunak fulat lalos, elos likinsai ma sap lom,
Sruk karinganang Ma Sap lom pa inkanek in moul.
Ke keke in nunak ac likkeke lalos, elos tiana akos.*
30 Yac nu ke yac, kom mongfisrasr in akesmakinyalos.
Kom pirik mwet palu lom in kaskas nu selos,
A mwet lom elos tiana lohng,
Ouinge kom eisalosyang nu inpoun mutunfacl saya.*
31 Ne ouinge, ke sripen yokna pakoten lom
Kom tiana siselosla ku kunauselosla.
Kom sie God kulang ac pakoten!
32 “O God, kom God lasr, su arulana fulat
Ac mangol, ac yoklana ku lom!
Kom akpwayeye wuleang ac lungkulang lom.
Oe in pacl se tokosra lun acn Assyria elos akkeokye kut
Nwe misenge, arulana yohk keok lasr!
Tokosra lasr, mwet kol lasr, mwet palu ac mwet tol lasr,
Mwet matu lasr meet ah, ac mwet lasr nukewa wi sun keok.
Esam na keok lulap lasr!*
33 Fal na lah kom kalyei kut.
Kom suwosna, kut ne oru ma koluk.
34 Mwet matu lasr meet, oayapa tokosra lasr, mwet kol ac mwet tol lasr
Elos tiana liyaung Ma Sap lom.
Elos tiana porongo ma kom sapkin ac kas in sensenkakin lom.
35 Kom tuh akinsewowoye tokosra su leum fin mwet lom
Ke elos muta ke sie acn yohk ac wo fohk we, ma kom sang nu selos;
Tusruktu elos tiana forla liki orekma koluk lalos in kulansupwekom.
36 Na inge kut mwet kohs in facl se kom tuh ase nu sesr,
Aok, in acn wowo se inge su kite kut mwe mongo.
37 Kutena ma kosrani ke acn uh, ma na nu sin tokosra uh,
Su kom oakiya facsr ke sripen kut orekma koluk.
Elos oru oana lungse lalos nu sesr ac nu sin kosro natusr,
Ac kut muta in ongoiya lulap!”
Mwet Uh Sain Inelos Ke Sie Oakwuk Sasu
38 Ke sripen ma sikyak inge nukewa, kut mwet Israel insese in simusla sie wuleang ku, na mwet kol lasr ac mwet Levi ac mwet tol lasr elos filiya sil lalos kac.
Footnotes
^ Gen 11:31; 12:1; Gen 17:5
^ Gen 15:18–21
^ Exo 3:7; Exo 14:10–12
^ Exo 7:8—12:32
^ Exo 14:21–29; Exo 15:4–5
^ Exo 13:21–22
^ 9:13–14; Exo 19:18—23:33
^ Exo 16:4–15; Exo 17:1–7; Dut 1:21
^ 9:16–17; Oek 14:1–4; Dut 1:26–33
^ Exo 34:6; Oek 14:18
^ Exo 32:1–4
^ 9:19–21; Dut 8:2–4
^ Oek 21:21–35
^ Gen 15:5; 22:17; Jos 3:14–17
^ Jos 11:23
^ Dut 6:10–11
^ 9:26–28; Mwet Nun 2:11–16
^ Lev 18:5
^ 2 Tok 17:13–18; 2 Chr 36:15–16
^ 2 Tok 15:19, 29; 17:3–6; Ezr 4:2, 10
